美股由2022年初開始展開今輪的跌浪，道指由36900多點，下跌至31135點；納指則由16200多點，下跌至11719點，道指由高位回落咗約15%，而納指則回落咗27%。
大家會問，點解疫情後，外國開放通關，經濟唔係應該會好番D咩，點解股市反而係今年係咁跌呢? 股市從來都係炒預期的，疫情緩和番，大家就會預期聯儲局會收水加息，特別係依家通脹好sticky，居高不下，WTI原油價格雖然已經由120蚊，落番80幾蚊，但8月的美國通脹，仲係8.3%，咁高，嚇到市場將9月加息加到一厘的預期，踢到上三成機會咁高。
依家美股的下跌，就反映咗息升的直接影響，即刻risk free rate(無風險利率) 同埋其他資產的收益就升晒上去，咁股價就要下跌，踢番股息率(dividend yield)上去，咁股票相對其他資產的吸引力先會好番d。咁依家美股由高位跌咗咁多，PE又點呢? 睇番標普500的Historical PE仲係好高，係19倍，而FORWARD PE就大約17倍，低過historical PE，咁即刻個市場仲預期緊，美國企業盈利仲會增長，個FORWARD PE先會低過HISTORICAL PE，好明顯市場仲好樂觀，未去到擔心大幅加息會拖低經濟增長同企業利潤增長。市場的CONSENSUS就係咁，大部份人的睇法，唔代表估得啱，當然可以大部份人一齊錯啦。
如果今次大幅加息，最終真係令美國企業盈利普遍出現倒退的話，咁依家個FORWARD PE就估錯咗，假設EPS倒退10%，咁FORWARD PE就變成21X，又有壓力再跌多Ｄ啦，如果倒退15%，就變咗22X以上。到底美國今次有無能力可以好快咁壓低番通脹，而唔令到經濟下滑呢？相信都好難了，我地見到美國時薪按年增長只有5.2%，根本就追唔上通脹，人民的購買力自然會下跌，變相又拖累消費增長，高息又會增加企業融資成本，減低企業的投資意願及資本開支，所以經濟好難唔跌。我地又睇下IMF點睇美國的經濟，IMF估，如果美國加到４厘，就可以壓到通脹的話呢，咁經濟係2023年第一季按季增長會大幅放緩，但都未必會負增長，但如果加到５厘先壓得住通脹的話，咁經濟就會出現倒退，失業率就會持續上升至2024年中，呢兩年都會幾難捱了。
我地睇番美國國庫債券各年期的利率水平，就會見到，今年呢9個月，條YIELD CURVE的變動，４月個時，曾經出現過inverted yield curve，10年期的債券孳息，居然低過2年、3年、5年、7年，不過，好快又回復正常，依家8月、9月持續出現inverted yield curve，而幅度亦更加明顯，1年孳息高達3.95厘，而十年就只得 3.41厘。孳息曲線倒掛，預示咗經濟會進入衰退。美國經濟如果難逃一劫的話，咁美企盈利又談何有增長呢，美股的跌勢就未完囉。而橋水RAY Dalio就話，如果加息加到4.5厘，美股要跌兩成。
「新興市場之父」個光頭佬麥樸思(Mark Mobius)，走出黎話美國加息最高可能加到9厘呀，真係識得搶鏡啦，知道語不驚人死不休的道理，先見到報，佢個估計仲高過ＩＭＦ同Ｄalio，佢個理據好簡單，就係通脹依家８％，所以要加到９％，相信未來更加極端的睇法會不斷出現，大家係度估鬥大咁，你地又估下。對於我地黎講，想知要加到幾多，就要睇多幾個月，睇下通脹係唔係慢慢落返ｄ，睇番個趨勢，見轉勢時先去估嘛，就容易中。
大家扣好安全帶未呀，今日就講到呢度啦，我地下次見，bye bye
美股表現近年持續強勁，不知如何入手？我們精選了10隻高增長美股，並撰寫了《不應錯過的10隻高增長美股》免費報告。立即按此下載！
想提早退休? 想提高每月的被動收入?
我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣，請立即按此免費下載！
本文所提供的信息僅供一般參考之用，並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)
