不知不覺，經營呢個channel都兩年啦，同大家吹咗兩年水，都係我講多，無乜人有反應，做獨腳戲做到有d悶，個市又麻麻地，大家都無乜心情trade架啦，經濟又唔太好，外圍局勢又隨時升溫，係咁的大環境下，就連個8號波都不如人願，晨早就打完走埋，搞到個個十點幾出去迫上班，都唔知同大家講乜好了。
係呢個咁的時勢，就真係cash is King，係咁加息嘛，d錢放係銀行乜都唔洗做，定期依家都三厘幾啦，仲似乎未見頂添，真係收住息瞓着覺都笑醒啦。何況仲有周街平野任執，又係考你眼光同埋財力的時候囉。好多公司未知驚，好景個時洗大咗洗慣咗，無咗危機意識，無做到量入為出，一個巨浪打埋黎，到時等打救就自求多福啦，唔好以為d獨角獸公司，可以持續咁虧落去先得架，始終都係有夢醒時份，個d靠講故仔包裝吹到好大而又要人不斷fall水先撐到落去的公司，水喉始終有完的一日，greater fool傳到the greatest fool都係要爆架啦。華為任正非活下來的言論，將寒意傳偏整個世界。
係咁的時勢，有單可能的收購就令人打晒問號，正常人都好難理解，點解會係呢d咁的市況，買d睇落無乜核心競爭優勢的業務呢，仲要市場傳到個作價估值好鬼高，可能會以約25到30X咁鬼高的PE去收購。如果大家有睇開財經消息，或者有掃開d社交網站，都知我講緊乜啦。
令人好錯愕的呢單可能收購，就係招商局海通貿易想買優 品 3 6 049%股權呀。優品360，唔洗我多講啦，係香港開咗成130間店，相信大家都總會經過見到或者幫襯過，近年係疫情下，門店愈開愈多，生意係做多咗，但呢行的毛利率就相當低啦，過去五年都係係31.8%至33.7%上落，扣埋d銷售分銷開支，行政開支，融資成本，就所剩無幾啦， 過去五年，淨利潤率介乎1%至5.5%。乜係淨利潤率呢，如果你賣咗件貨收到100蚊，扣晒d開支後，你淨賺1蚊，咁你的淨利潤率就係1除以100，即係1%囉，淨利潤率低，即係盤生意的bargaining power唔高，都係要靠薄利多銷咁囉，都算辛苦錢黎架。
所以，居然市場傳到個估值咁高，真人相當令人難以置信。雖然話收購成功的話，優品360可借助招商局海通貿易打入中國，由2間分店，迅速發大黎搞，但都唔洗溢價咁多去收購掛，而且佢要自己由頭做起，都唔會太難啫。雖然話有d貨品係360獨家代理的產品，但食品呢d野，競品實在太多啦，作為消費者又唔一定要買佢個d獨家產品啫，除非性價比特別高啫。
最重要係，根本成單收購十畫都先得一撇啫，兩家公司依家只係簽咗Mou之嘛，隨時可以傾唔埋，九個月後個協議就自動取消，當無咗回事架啦。依家個市就借消息炒起優品360的股價，炒到成廿幾倍市盈率，到時一話收購唔成功，又打回原形架啦。咁不如你嘗試代入招商局海通貿易的角度去諗下，佢點解要咁高價去買先? 難道真係國企有錢就任性咩? 當然如果係帶住國家任務而黎的話，希望收購完就唔好好似金拱門咁，連個最平最抵的新地筒都加價。咁你地會係趁消息出貨，定係畀人派貨的一員呢。
今日就講到呢度啦，我地下次見，bye bye
美股表現近年持續強勁，不知如何入手？我們精選了10隻高增長美股，並撰寫了《不應錯過的10隻高增長美股》免費報告。立即按此下載！
想提早退休? 想提高每月的被動收入?
我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣，請立即按此免費下載！
本文所提供的信息僅供一般參考之用，並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)
