近年，無論你點樣唔想理政治的野，政治都會自己走入你耳仔度。唔想再睇到政府的野，但紅隊兩個字就係咁係FB、YOUTUBE出現，唔到你唔理。
然後，台灣的消息近排就係咁飄入耳度，周邊的軍演，美國的人員一個又一個到訪，好似挑釁咁，搞到呢邊的局勢異常緊張，連搭lift個幾秒鐘時間，lift入面部電視，都講緊台灣呀，由細到大，都無諗過台灣會成為世界局勢的關注點，更加唔會想像到，係中美角力下，個磨心突然由香港轉咗去台灣，香港好似被大家放棄咗咁，走的走，移民的移民。
最近睇到幅圖，見到香港各年齡層的人口流失的情況，都相當令人擔憂。對於仲住係香港的我黎講，睇到非常心噏，諗番以前，細個個時，大家都爭住黎香港，香港係一個大家捧係手心的東方之珠，一個充滿機會的地方，一個只要肯努力就遍地黃金的地方，一個無乜自然災害無大地震的地方，一個唔需要擔驚受怕治安亦都相當唔錯的地方，一個四季分別不太冷不太熱的地方，一個要山有山要水有水的地方。
近排行落街，見到地鐵的廣告板着燈的愈來愈少，吉咗的愈黎愈多，就愈黎愈感慨。呢兩年黎，相信大家都見到，三餸飯四餸食開到周街都係，呢d無乜裝修，小本經營的店，如雨後春筍咁，取代咗過去滿街的鐘錶珠寶化妝門店，錢大媽、佳寶、360愈開愈多，呢D平價實惠的店舖，取代咗以前高檔亮麗的門店。望咗呢個轉變，心情實在好難舒暢，仲可以話係非常低落。
細個的時候，每過一段時間，行到一D一排無去過的地區，總會有某些區域翻新了，多咗D衝上雲霄的商廈，耀眼的玻璃幕牆，大型冷氣商場仲一個接一個開幕，高檔品牌高調進駐，新奇好玩刺激的野，多到玩唔晒，連D又濕又熱又臭的街市都一個一個咁翻新，變身成乾爽乾淨無異味兼有冷氣的街市，令人遛連忘返，見證住香港急速發展的年代，依家入到去錢大媽，聞到個陣味，總有倒退回廿三十年前的感覺。
會咁感慨，除咗係因為望住身邊的景物全非外，仲有就係一起長大的同學走了，認識的朋友走了，仲留係度的你同我，又係唔係自願的呢? 同年的人，有D為咗生計，養妻活兒，好難放下一切由頭再黎。做到的人，呢份勇氣，亦都好令人佩服。畢竟人生無TAKE TWO，要為自己的選擇負責任。
今日同大家分享呢幅度，係我地用政府統計處的數據PLOT出黎架，絕對無花無假。平時上網見到，無啦啦無SOURCE的一幅截圖，我一般都會半信半疑，但呢幅係自己親手PLOT出黎的，就認真去對待。呢幅圖係點黎? 就係政府統計處按性別同年齡劃分的人口數字，我地將2022年中的數字，減一減2020年中的數字，就見到唔同歲數(X AXIS)係呢兩年的人口變化，紅色係女人，藍色係男人。當然見到人口數字下跌，第一時間，可能會聯想到疫情，係唔係死得人多，令人口下跌，可惜完全唔係囉，因為香港疫情累計的死亡數字只係得9000幾人，而呢幅圖的Y-AXIS，個單位係千呀，人口流失的數量相比死亡的數字，真係九牛一毛囉。
呢幅圖，你第一眼見到乜? 原來由2020年中至2022年中，呢兩年來，香港的未來楝樑走咗唔少，淨番D老人係度，可想而言，香港的醫療福利係幾咁吸引呢，哈哈，苦笑一下。50幾歲打下的，先有較大幅度的減少，而24歲的女人，就係重災區呀，係呢兩年係DROP得最多的，唔係有萬幾個靚女走咗? 我的嗎呀，我的天呀，希望走的唔係靚女啦…
點都好啦，最青春無敵，廿幾歲的個班人，自然更有本錢，可以義無反顧，去擁抱自己鍾意的未來。你又望望自己年齡層個批，又係唔係走得最厲害的個批呢? 對於移咗民去台灣的朋友，對於台灣的未來，又唔知係點諗架呢。
今日講到呢到啦，希望大家鍾意啦，我地下次見，BYEBYE
更多內容：
美股表現近年持續強勁，不知如何入手？我們精選了10隻高增長美股，並撰寫了《不應錯過的10隻高增長美股》免費報告。立即按此下載！
想提早退休? 想提高每月的被動收入?
我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣，請立即按此免費下載！
本文所提供的信息僅供一般參考之用，並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)
