【MPF醫務室】MPF輸最甘個隻有無你份？最好表現又係邊批？

近排都好耐無同大家報過mpf的回報了，個市跌到咁，相信好多人都無眼睇了，幾十年後的MPF就更加唔想睇了，升又好跌又好，望住又用唔到又攞唔到出黎，就算想移民英國都攞唔到。之前手多多，曾經「永久離港」提早攞咗出黎的人，就算返番黎，依家政府派錢，都要自證並非已永久離港或有意圖永久離港，唔係連消費券都攞唔到，真係相當麻煩，擺到明唔妥D移民的人，更加唔妥以永久離港攞走強積金的人，依家乜以儆效尤囉。如果你唔係一去不返，仲諗住留條後路返黎，就唔好打強積金的主意啦，唔係以後麻煩野相信陸續有黎。

講下講下，又離咗題，今日係想同大家講下，截至6月底的一年期回報，市差就大家都知架啦，咁差的市況，唔洗我講大家都知，只有保守保證基金先可以力保不失架啦，11隻正回報的基金，全部都係呢個類別的，無一隻例外。而表現最高個隻，係宏利MPF利息基金，年回報0.46%，其他則介乎0.01%至0.25%，少得好可憐。不過，揸住呢D基金過世的話，就真係唔係咁好啦，年年都剩係得個0點幾個%回報，難度真係為咗唔蝕錢就算咩?

見到呢邊廂少得可憐的回報，再望下包尾排行榜係D乜? 最尾個隻大部份人都無架，因為係新地強積金僱主營辦計劃的混合資產基金 – 41% 至 60% 股票，唔係新地員工就唔關你事啦，你都買唔到架啦，佢一年跌足37%，嚇死人呀。咁緊隨其後的三隻，全部係大中華股票基金呀，全部跌32%以上，分別係萬全、中銀保誠我的強積金同埋信安明智之選的大中華股票基金。真係美國狂加息，點解遭殃的永遠係中港呢? 跟住個兩隻就係東亞的香港股票基金，都係跌32%以上。一路掃落去，個榜全部都係大中華股票基金同中國股票基金，掃到落第15位，先到宏利隻歐洲基金，跌咗29%。如果唔係萬全隻美國股票基金，跌得特別多，排到上第16位，真係掃到落70幾都未見到美國股票基金的踪影。

睇長少少的話，就會見到原來仲有唔少基金的5年年率化回報仲保持到係9%樓上，呢幾隻基金全部係美國股票基金呀，包括中銀保誠的北美指數追蹤基金、萬全的美國股票基金、恒生同匯豐的北美股票基金，最後就係東亞的北美股票基金。美國就霸晒五年排行榜的第一梯隊，咁第二梯隊有D乜?超過8%的除咗有安聯的太平洋基金、同埋中銀保誠的我的中國股票基金之外，剩番的又係美國股票基金，包括友邦同埋信安。至於五年的年率化回報最差的基金，相信都好難估到啦，因為太少眾了，係基金規模得個1900萬港元的海通韓國基金，年率化回報負超過5%。

睇埋推出至今最高年率化回報係邊隻? 原來係中銀保誠的北美指數追蹤基金，有成10.24%的年回報。推出至今有多過三厘的有252隻，但做到10%得兩隻，做到9%得5隻，8%有8隻，係四百幾隻基金之中，要仆中真係唔係咁易囉。推出至今年率化回報負9%都有兩隻呀，就係恒生同匯豐計劃的恒生中國企業指數基金呀，真係差到一個點囉。

你地買咗邊隻基金呀，可以同大家分享下，分享喜悅或者想訴下苦都無任歡迎，今日就講到呢度啦，我地下次見，BYEBYE

更多內容：