強積金又出事啦，安聯爆大鑊，強積金都中招，咁大件事無人講?!
如果你買咗個投資產品，當佢跌咗42.15%，間投資公司就同你講跌咗4.15%，當個產品跌咗18.26%，間投資公司就同你講隻產品跌咗9.26%。咁有創意嘅報告表現方法，講出嚟個回報，痴根過痴根大通，吹水過牛頭角橋水基金。大家一定估唔到，用呢個方法咁離譜嘅報告方法，竟然係一間你我都識嘅投資公司，當中嘅美國分公司，仲要喺美國證監會有註冊嘅。而且呢間我哋大家都識嘅投資公司，係有管理MPF 㗎，你啲MPF係咪佢管呢？至於呢間咁有創意嘅基金公司係邊間？我哋大家一齊睇吓啦。
喺今年五月17日，美國嘅證監會SEC,就出咗一份通告，指出安聯投資嘅美國公司，Allianz Global Investors U.S. llc,係2020年有違規嘅情況出現。果間美國公司旗下有一隻投資策略，叫structured alpha,本來個策略表現一直都唔錯，吸金情況都理想，但到咗2020年疫情開始爆發期間，佢哋就發現世事原來不像預期，回報霎時之間就表現變差好多，管理個策略嘅三位基金經理，因為接受唔到，所以諗埋一邊，諗左啲好有創意嘅方法來向客戶報告表現。佢哋將跌咗42.15%嘅表現，向客戶報告時就單單唔要個2字，變咗下跌4.15%，喺另一個回報表現時段，策略本來跌咗18.26%，佢哋就將頭嗰兩個數字減半，變咗下跌9.26%來向客戶報告。
咁黐線嘅事點都會俾人發現，件事俾人告咗出嚟，告埋去SEC,。蓄意欺詐，不誠實表述，咁大件事，罰錢就梗係要㗎啦，總共安聯美國就俾人罰咗60億美元，其中50億俾返受害者。另外因為佢勞煩返咗美國證監各位大佬要去查佢，做嘢搵證據指證佢，咁辛苦，梗係要罰返錢，證監就罰咗佢10億來補償返啦。經過今件事，安聯投資過美國分公司都冇得留低，比美國證監停牌10年，唔可以喺美國註冊提供投資服務。安聯見咁嘅情況，就希望將美國公司為咗比一間叫做Voya Financial嘅公司，自己再攞返部份股份，希望可以通過新買家來延續到部份嘅生意。
樹大有枯枝，族大有乞兒。安聯咁大個集團，旗下咁多間不同地區嘅子公司，就出咗美國子公司嘅呢個大醜聞，搞到要俾人停牌。一間投資公司就唔只管理一隻產品架，依家隻structure alpha,因為虛假陳述而出咗事，相信香港一般投資者都好少機會買到出事嘅嗰隻策略，但嗰間美國公司會唔會管理到一啲我哋會投資到嘅產品呢？更加嚴重嘅如果佢係會管理強積金，咁就一般香港市民都有可能投資到啦。
大家都知道安聯係強積金嘅其中一個成日出現嘅經理人，佢本身自己都有一個安聯強積金計劃，個計劃就比宏利收購咗，成為咗宏利嘅退休精選強積金計劃。
一間好似安聯咁既國際性嘅基金公司，好鍾意將唔同地區嘅投資，分比不同嘅子公司來管理。咁今次發生事故嘅安聯美國子公司，有冇管理緊我哋香港嘅強積金呢？
首先我哋睇返MPF呢網站，approved pooled investment fund,即係核准匯集投資基金個list,喺入邊我哋搵到安聯嗰隻精選美國多元投資風格基金，Allianz Choice “Best Style” US Fund,係一隻核准匯集基金，即係MPF嘅基金絕對係可以合情合理合法地買入，呢隻美國多元投資風格基金。而我哋再睇吓呢一隻美國多元投資風格基金，係安聯嘅邊個子公司做基金經理呢？
我哋喺網上可以搵返安聯精選基金嘅基金說明書內睇吓，搵咗一陣之後，一睇，個心都離一離，竟然發現嗰隻”Best Style” US Fund嘅基金經理，就係今次出事，會比SEC停牌嘅美國子公司負責管理。
咁咪撞到應一應？我哋啲MPF會點受影響呢？
我哋有繼續追查落去，首先check返出事嘅係安聯嘅美國股票基金。我哋睇返喺MPF嘅網站上邊現時有嘅美國股票強積金，安聯嘅計劃係冇單獨一隻美國股票強積金嘅，所以係呢方面起碼冇咁驚。即係唔會有供款人直接買入安聯美國公司所管理嘅嗰隻美股基金。
呢方面驚完，另一方面又再驚過，因為安聯嘅混合資產類別基金，係通過買入佢旗下不同地區嘅基金而組成嘅，所以安聯嘅混合資產基金係有可能買入美國股票基金，歐洲股票基金，香港股票基金等等，而組成出嚟嘅，所以佢嘅混合基金絕對有可能會買入出事嗰隻美股基金。
為咗引證我哋嘅想法，我哋再睇返安聯精選基金嘅基金說明書，入邊嘅混合資產類別，例如增長基金，入邊清楚寫明佢係會買入出事公司所管理嗰隻”Best Style” US Fund。
換句話講，即係就算冇強積金供款人會直接買入出事公司管理嗰隻美國股票基金，但都會間接地因為買入左安聯混合資產，而擁有左有問題嘅嗰隻基金。
而簡單來講，現時宏利退休精選計劃平台上就已經有安聯計劃嘅混合資產基金啦。
咁即係一定有供款人持有緊會出問題既美國公司所管理嘅基金啦，咁大家應該點算呢？係呢方面不論香港嘅證監， MPF係積金局，或者香港安聯呢三方面，都冇公開好明確講嚟緊會點做。MPF呢同證監根本上冇出過任何聲明或者提示去通知強積金供款人呢件事發生。
安聯本身又出個通告，但就冇提及當中嘅強積金基金嘅安排。我哋作為香港強積金最大嘅獨立Channel，梗係不停去市場收風啦，但據我哋所知，安聯本身自己都未定到，係咪會比自己旗下另一地區嘅子公司來幫手睇住隻美國基金。
隻安聯美國股票基金寫明係由安聯美國公司來管理，但現時嗰間子公司已經被除牌唔可以提供投資服務，係呢段期間，隻基金係咪無人駕駛緊啦？
如果係有人駕駛緊，舉例安聯搵咗另一地區嘅子公司去幫手看鋪，睇住先，咁係咪需要通知一下供款人呢？
積金局或者證監係咪需要出嚟同大家講一講，安撫一下大家，或者維持一下秩序呢？
呢件事我哋會繼續同大家跟進，大家記住要like share同subscribe我哋，咁咪重仔，咁就可以知道呢件事嘅最新發展啦。
美股表現近年持續強勁，不知如何入手？我們精選了10隻高增長美股，並撰寫了《不應錯過的10隻高增長美股》免費報告。立即按此下載！
想提早退休? 想提高每月的被動收入?
我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣，請立即按此免費下載！
本文所提供的信息僅供一般參考之用，並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)
