【MPF醫務室】美股撈得未?!

美股撈得未,相信好多人見到美股跌咁多,有少少想開始反彈,就心癢手痕,想衝入去撈貨,咁到底美股呢一刻係唔係值博撈得?今次我哋就同大家用2招睇依個問題,2招就夠大家去簡單得到答案。

美股撈得未,要了解這個問題前,首先我地睇下幅圖,感受一下美股的跌幅,到底目前跌得有幾大? 

話晒都係美股,跌幅就一定無港股咁多啦。標普500由4800點樓上,回到3920,回咗大約18%;道指由36900樓上,回到31500,回咗大約15%;納指由高位17400樓上,回到15470,回咗得11%,暫時回落的幅度都相當有限。

第一招,想知跌夠未,重點係睇200天移動平均線的周線。過去比較大規模的回調,係周線圖可以見到,好多時都要回落到去接近200天移動平均線,甚至要好急咁穿一穿,才有望見底。依家三幅圖距離200天MA仲有一段距離,大家就可以諗下,睇定D唔洗急住吸。

第二招,睇美股,最重要係睇有無水,有無放水,新水,或者相反,係唔係收緊水。用依一招,睇放水定收水,唔洗好複雜,睇兩粒數據就一清二楚,一粒數係美國國庫債券的孳息走勢,以前有聯儲局帶頭係咁掃壓住唔畀升,依家無呢支歌仔唱了,就係咁升,十年國債孳息突破埋3厘關口,去到3.1厘,呢幅圖真係朝朝都要望一眼,息升的環境,資金成本高呀,對股票相當不利呀,無論係分析員啪落DCF  model粒discount rate要調升之外,搞到d公司估值要係咁下調,仲加埋市場恐慌人踩人,向下sir的空間十足。

第2粒數要睇既就係聯儲局既資產負債表。聯儲局的資產亦由4月中最高位的8.965487萬億美金,開始回落到5月底的8.91505萬億美金。美國好明顯係收緊水啦,一個幾月就縮咗500億美金,水漲就船高,水退就見到有人裸泳呀,大家要睇路呀。

睇放水收水嘅呢兩粒數,其實都比緊一個好一致嘅共識,都係喺息率上升,收水環境下,都係小心啲好。

綜合返剛才講既2招,睇咗個200日MA,睇埋知道現時收水,2招都係講要小心為上,咁依家大家都心水清啦,係收緊水的狀態,仲撲入美股接飛刀,真係勇氣可嘉呀。之前放水,d股票個估值已高到唔合理,咁有水支持住,就無所謂啦,依家唔係喎,收緊水呀,咁高估值,就有排洗白白啦,真係走得快好世界嘛。仲有,唔好唔記得,以前低息,d企業開行槓桿去回購自家股票呀,個時就話唔洗息,可以拓高每股盈利啫,今時不同往日啦,利息係咁升嘛,都唔知tunnel end係邊,又會唔會出現好似paul volcker 式的加息咁加到廿厘去打壓通脹呢,咁高槓桿,財務成本唔在講啦,拖低eps(每股盈利)就免不了,要知道,以earnings multiple的角度去睇估值的話,股價=市盈率*每股收益,EPS跌,multiple又contract,以前你高增長,畀開你廿倍multiple,依家你盈利仆喎,仲點畀你廿倍呀,十倍都嫌多啦,咁兩個數值一齊跌,乘埋就跌得好甘,呢個就係所謂的戴維斯雙殺啦。所以,市跌起上黎,真係唔係人咁品啦。過早撈底,只會撈極都未係底。

當然,如果你搵到d好的股份,企業穩健,槓桿開得唔大,行業前景又可以,估值又唔過份,你又有能力坐貨的話,咁逢低吸納,都未償不可既,但相信呢類股份唔多囉,而大家一般又係有份正職係身,邊有咁多時間逐隻股票去研究呀,至於d基金,大部份都係跟住個市行,又有幾多能夠做到逆市上升呢,所以呢,最好的策略,可能係置身事外,當身邊愈來愈多末日論的時候,配合埋個市free fall個下,滿街平貨,再買買執心儀的對象囉。

咁股市唔好,大家可以點呢?以前避險就泊落債度,但依家就唔同啦,加息嘛,咁債息就自然反覆係咁升,即係債價係咁跌囉,買債就損失爛腳,又點避到險呢,反而美金走勢就一流呀。睇番幅度,美元指數升到104,係02年以來的高位啦,呢個水平真係仿如隔世呀,廿年前呀,人生有幾多個廿年呀,其他貨幣相對美金,就係咁仆,好在我地港幣仲peg實係美金到,暫時仲未feel到係下跌的壓力。日yen就慘啦,係咁劏落去,去番2002年個d水位,依家1美金可以兌到 134yen啦,同舊年年初相比,足足無咗三成呀。Yen跌,我地緊係開心啦,可以去日本玩,平d嘛,但易地而處,咁日本人佢地買海外的貨就貴好多啦,進口通賬就好高囉,結果日本通賬都爆到上2.5%啦,唔好以為,車,2.5之嘛,好低之嘛,但係因為係日本呀,日本係過去通脹係點踢都踢唔上架,一個食極唔肥的人,突然短時間暴肥,都肯定有病啦。

今日就講到呢度啦,大家又有無乜意見同睇法呢,歡迎留言討論,記得訂閱埋我地個channel呀,多謝收睇,下次見,bye bye

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 72 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured