教你基金經理條路點行,百萬大道,驚不驚喜,意唔意外

每一年到咗呢個時候又係搵工嘅季節啦,不論係剛剛攞完bonus嘅在職朋友,又或者係準備畢業投身社會工作嘅年青人,喺呢個時候都會開始睇吓各類求職廣告,搵吓心目中想做啲咩嘢。

基金經理,好多人想做,江湖傳聞好似人工又高,又有型,有成Team人俾你點。好多人想做基金經理嘅原因都單純係因為這個職業搵錢,又鍾意投資,所以就想做。

喺香港做基金經理係咪真係好高人工呢?又點樣入行呢?有人入行嘅方法係打開證監網頁每間公司寫信去求職,咁又係咪一個做法呢?喺以下我哋會慢慢同大家講,大家如果鍾意聽我哋講金融界內職場分析,記得like,subscribe我哋嘅Channel。

基金經理其實做啲咩呢?外行人可能覺得基金經理係吸血鬼咁,隻基金無論賺錢蝕錢,佢都會收管理費,袋袋平安,自己出好高人工,管理人哋嘅錢,OPM, other people’s money,即係贏錢就分bonus,輸錢就輸客嘅錢。

睇啲電影入面,啲基金經理都係叫人呢隻股買五球,嗰隻股放10球。劉青雲喺竊聽風雲2,就用咗最直接嘅形容:

「你問我做咩嫁嘛。我喺炒股票嘅。即喺嗰啲錢搵錢,一蚊當十蚊賭嘅(doot)街嘛,但喺你有冇諗過,冇我哋啲仆街幫公司集資幫啲退休保險基金搵錢。你有得上網?有得搭地鐵?」

天想我善良,試問又有邊個想做(doot)街,但如果你係鍾意做投資嘅,有乜好過可以有一班人員,大量報價交易系統,分析軟件,去幫你做分析研究,幫你手去實踐你嘅投資理念呢,呢個就係基金經理所擁有嘅優勢。啲市場資料,最新動向,你就算唔睇,人哋排着隊嚟向你講。」

但大家要留意番,喺呢度我哋所講嘅基金經理係講喺一間asset management company,資產管理公司入面,真係管理隻基金嘅投資嗰個基金經理。金融圈內,如果你細心D睇,好多人工作卡片上都有基金經理或者投資經理呢個title。因為好多從事保險或銀行界,向客戶銷售基金,或者幫客戶管理投資基金嘅朋友們,都會用呢個Title。

基金經理,一般叫fund manager,或portfolio manager, 顧名思義就係管理基金或者投資組合,如果投資組合嘅資金來源多數係客戶既錢,喺香港係要攞牌,受證監sfc監管。所以同Proprietary trader唔同,佢多數係管理公司嘅錢,可以唔使受證監監管。

受證監監管,你就要考牌,證監牌照分唔同嘅監管活動就有唔同嘅牌照,一般嘅資產管理公司,多數係會有9號牌,就係幫人做資產管理啦。如果你係比較資深嘅從業員,可能公司會推薦你做埋呢個牌照嘅負責人,即係我哋簡稱嘅RO, responsible officer.

大家唔好以為攞牌照,就一定係有downside冇upside喎,喺好景嘅時候,你只要攞住個RO牌照,喺求職市場上邊,都有價有市㗎,掛得個牌,所有人都可以搵到你,咁做得好就會有人搵你去跳槽啦。對於一個基金經理來講,你所管理嘅基金,就好似你嘅一件西裝,一個名銜,人哋就算唔識你,都會識你間鋪,聽過你隻基金排名。如果你隻基金表現差,基本上可以話跟你一世,你去到邊度,除非你呃人唔同人講,如果唔係人哋會睇返你過去嘅基金表現,就知你有冇料了。

即係做得基金經理,你公司來投資表現會決定你今年分到幾多花紅,而你個牌照,又可以確保喺求職市場上有一定嘅價值,聽落好似唔錯咁,咁點樣可以做到基金經理呢?

好多人因為鍾意投資,好想做基金經理,但又冇工作經驗所以唔知點入行,只好打開證監嘅網頁,每一間註冊公司走去寫信去自薦。但係可以同大家講,如果你冇工作經驗,一般大型啲嘅基金都係唔會請你做基金經理嘅。既然冇工作經驗又唔請,咁又何來會有工作經驗呢?其實可以通過做其他工種,而儲夠一定經驗值之後再變身做基金經理,當中主要有兩大途徑:

第一個途徑就係先做分析員。分析員嘅工作主要係做股票或債券分析,或者幫忙管理一下投資組合嘅工作,範圍可以好多,包括管理一下啲資金流入流出,客戶嘅申購同埋贖回,又要寫吓市場展望,睇吓邊啲股票升得多跌得多用嚟了解一下投資組合嘅表現。

大家一般見到分析員寫啲報告出來,都係幾十版紙又有圖又文字,有時見到都睇到暈咗,對於一啲文字能力唔係咁強嘅朋友,相信都會有一定嘅難度。其實金融圈內都有另一種分析員,叫做量化分析員,適合一啲數你比較強,但係文字能力冇咁強嘅朋友,呢類職位,主要係做一啲數學模型,寫解程式,用數學模型內做市場推算或揀選適合嘅投資。

喺從事咗分析員一段時間之後,對分析同埋管理投資組合有咗一定嘅認識之後,而且表現又好嘅話,就可以睇吓自己內部有冇位升遷,或者向其他公司求職,嘗試去申請做基金經理啦。

除咗做分析員之外,另一個途徑就係做交易員。交易員主要工作就係喺交易枱內幫手做買賣,比如基金經理想買某一啲股票或債券,佢都會將指令交俾交易員,而由交易員去幫佢搵最合適嘅價格或交易對手去買賣。

呢兩條途徑做基金經理,但所練成嘅特性就會有啲唔同,一般做分析員出身嘅基金經理,就會比較着重研究性質為主,不如追求股票嘅最核心價值,經濟狀況等等,投資上可能會比較偏向長線少少,而交易員出身嘅基金經理,就會比較多感受市場嘅脈搏,市場情緒環境等因素。

如果如果想投身做基金經理嘅朋友,想感受一下working in the sea of money,感受一下萬惡嘅金錢,而想入行既話,又可以試吓以上所講嘅兩個途徑喇。

講咗咁耐,都明白多人想做基金經理,其中一個原因就係人工高,咁喺香港做基金經理人工係咪真係好高呢?如果你係一間比較大型嘅基金公司做基金經理嘅話,最少都要有五至10年經驗佢先會請你,但佢一請你,年薪底薪就一定過一百萬,另外再分花紅,分花紅又睇你公司嘅性質,如果係銀行或保險背景嘅基金公司,分嘅花紅可能就會穩定啲,無論市好市差既時候,所得花紅既上落都冇咁大,會有4-8個月既花紅啦。但如果你間公司係純粹做投資嘅基金公司,所分嘅花紅可以好多,好市嘅時候有啲可以去到花紅係12個月,所以對於一啲升級基金經理來講,年薪千萬不是夢。當然差嘅時候,又會差好多啦。

雖然聽落比起一般行業好好多,但其實而家入職做投資基金經理,已經比零八年之前嘅待遇差咗好多了。聽返河內前輩所講,零八年前,好似嘅時候聽過有人分到可以有100個月嘅花紅,呢啲唔知係真定假啦,聽下開心下都好。08年後,新制度下,而家所分嘅花紅,好多時會以分幾年派發嘅形式,或者如果間公司係有上市公司嘅背景,花紅嘅其中一部份就會用股票嘅形式俾你。

剛才講嘅係已經做咗現職基金經理嘅待遇,但當然呢個人工都會睇你不同規模嘅公司,同埋你各自自己嘅工作遭遇而決定啦。同埋各位打算新入職嘅朋友,千祈唔好以為一開始做分析員或交易員都有呢個人工喎,分析員同交易員嘅底薪人工可以同一般其他行業嘅打工仔嘅人工差唔多,只不過如果你決定左行這個career path, 一路落去嘅增幅就會比其他行業為高。

做基金經理又好,做其他工作都好,最緊要你係做緊你自己感覺有興趣嘅工作,如果你本身對投資係好有興趣嘅,做基金經理就同時可以滿足到你自己嘅興趣同埋搵錢,但之前都有老前輩分享過,一個基金經理就好似一個電影入邊嘅殺手咁,你可以棋逢敵手,享盡榮華富貴,但當有一日你能力不再嘅時候,一個賺唔到錢嘅基金經理,就好似一個殺唔到人嘅晒手咁,下場係點,大家都知。

老前輩嘅呢番說話我一直都記得,所以有興趣從事呢個行業嘅朋友就加油喇,共勉之。

今日嘅時間差唔多,大家如果鍾意聽我哋呢方面分享嘅朋友記得like share subscribe我哋條片啦拜拜

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 72 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured