大家好，歡迎大家返到黎MPF醫務室，我係大家既醫務員Tiffany
呢波世紀疫情，相信改變咗全球唔少人的人生觀。不管你對未來的擔憂有多少，你永遠都不可能知道黎緊會發生什麼事。善良地活着，樂天知命，活在當下，似乎係對自己人生比較好的取態。
凡事都有一體兩面，睇你點睇。面對疫情，大家係積極面對，尋找機會，盡力幫助他人，一齊渡過難關，迎接風雨過後美好的天空呢? 定係被負面情緒控制，為可能受到感染而擔驚受怕，胡思亂想，消極面對人生，甚至加入裸辭一族，被動地等候政府救濟呢。
雖然現實上，工作的壓力、經濟的負擔、人際的問題，往往會壓得人喘不過氣來，日日一家人困在果五六百尺，但已經叫寬敞豪宅既地方。但當你跑上山，遠眺連綿無盡的山脈，一望無際的大海，上山數下雷達波波站，出海睇下沉積岩化成嘅千層糕，感受一下天地的廣闊，便自覺到人的渺少，千年來無數人歌頌讚美過的山川長在，而你、我、某人都是怱怱的過客，最終也將化作古人，因此，曾經很在乎的，瞬間都變得不再重要，身心便很舒暢。
所謂心態決定境界，輕輕改變了看事物的角度，變換了比較的基礎，一切都煥然一新。講開心理，今日就同大家分享一下有關股市的心理。牛市同熊市係乜，相信唔洗我多講，大家都知道，但大家又知唔知道，原來投資者都可以區分為permanent bull同permanent bear兩者，大家又知唔知自己係屬於邊隻?
作為理智的人，大家當然會覺得自己係理性咁樣去做決定。但其實大家在不知不覺中，會常常出現行為偏差，而行為偏差的出現，可能係因為認知錯誤，或者情緒偏見，或者呢兩樣同時影響咗你的行為決定。
認知錯誤，好易理解，就係由錯誤的推理所導致，就好似上堂，你會計數錯，默書會背錯內容，作為人類，出錯係無可避免的，我地又唔係電腦，呢d源於基本的统计、信息處理、同埋記憶錯誤，會成日出現。不過，就相對容易糾正到。如果再細分認知錯誤，其中一種就係堅持信念的偏見。大家一定聽過馬後炮了，如果大家係睜大眼講大話，明知自己係事後孔明，係度車大炮，咁就當然唔算係hindsight bias，最可怕的係，當自己都以為自己在事前已準確預測事件發生，連自己認知錯誤都唔知，咁先恐怖呀。
你唔好笑呀，你諗下，最近個股市大跌，你係唔係有同人講過，都話個市會升番架啦，一早叫你買貨架啦，但你記唔記得，自己係22000點講架呢? 定係20000點? 定係18000點? 你朋友可能就非常清楚了，可能23000點聽完你講去咗撈貨，依家都仲坐緊艇，而你居然係度同佢吹噓，都話個市會升番架啦。如果能夠清楚知道自己出現的偏見，慢慢調整，緩和甚至消除偏見，可以幫到大家係投資的時候做到更加正確的決定。
呢方面我覺得係幾有趣，我地再分享多一個吧，大家有無聽過Confirmation bias? 如果唔知英文點解的話呢，中文有些會翻譯成”我方偏見”，都幾貼切。呢個係講話呢，一個人係會選擇性地去回憶、去收集有利的資訊，忽略不利或矛盾的資訊，去支持自己已有的諗法或假設的趨勢。就好似當大家感情受創的時候，明明個男人都唔再搵你，變咗心，你可能見到佢係fb post咗張公司相，就游說自己，佢可能係近排工作忙，無時間搵你啫，見到佢同其他女人的合照，你又當睇唔到。如果套番落股市度，我地每日都被海量的新聞所淹蓋，大家可能只揀一d符合自己諗法的新聞去睇，可能你潛意識覺得股市已見底了，就只揀唱好的內容去睇，搵一大堆要升的理由，去支持自己，而刻意去忽略一d負面的消息。受呢個我方偏見的影響，而做唔到客觀地全面咁去分析股市的狀況。
至於因為情緒偏見而影響到你的行為，而令到你唔能夠做出最佳的決定同選擇，呢個就比較難糾正了，因為情緒偏見一般係源于衝動同直覺，往往係因為感情，影响咗理性分析，而感覺呢樣野，你好難去扭轉去改變。情緒偏見包括過度自信，loss aversion、regret aversion，同埋想維持現狀等等。，loss aversion、regret aversion都係好有趣的心理現象，好想同大家詳細分享，如果大家有興趣，可以係下面留言，我地可以下次再講。今日就講住咁多先，大家記得like,share同埋免費subscribe我地的channel，下次見，bye bye
美股表現近年持續強勁，不知如何入手？我們精選了10隻高增長美股，並撰寫了《不應錯過的10隻高增長美股》免費報告。立即按此下載！
想提早退休? 想提高每月的被動收入?
我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣，請立即按此免費下載！
本文所提供的信息僅供一般參考之用，並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)
