今年年初港股基金仲係威係勢咁，彈到上25000點附近，當大家都以為終於風水輪流轉的時候，結果俄佬出手揼烏克蘭，搞到全世界股市僕曬街，本來大家等緊美國加息，相信唔少人都已經underweight咗美股，以為避過一劫，但若果無轉落保守類，而係見港股由高位已回調咗咁多，手多多撈底港股基金的話，咁年初至2月底，呢兩個月時間，就唔見咗成4%。
我地睇番二月強積金各類別的表現，除咗人民幣債券基金，同埋貨幣基金(不包括保守基金)仲係唔洗蝕之外，其他類別的平均回報全部都係負數呀! 當中跌得最甘的，就係香港股票基金，而追踨指數的港股基金，跌得比主動型的港股基金更加慘烈。無他既，係跌市的時候，主動型基金可以減少股票的比例，增持較多的現金，咁跌幅自然會少d。不過，郁黎郁去都唔一定好架，依家市況咁波動，個別股份間中會上演大奇蹟日，朝早跌十個，下就反而倒升十個，主動型基金又跟唔跟得切呢? 係反彈浪時，又食唔食到升浪呢~ 所以短期的輪贏真係唔代表d乜。
其實，大家可能會好好奇，點解環球債券全部都跌，唯獨人民幣債券基金有得升。大家都知道，出面通脹咁鬼勁，歐美全部都要加息，咁係加息的環璄下，債價就有下跌的壓力。相反，內地通脹無出面咁嚴重，反而係經濟下行的壓力較大。所以，係舊年12月，中國人行召開第四季貨幣政策會議，都已經提出，第一季與第二季前半段會是貨幣政策寬鬆穩增長較為適宜的窗口。既然中國目前處於貨幣政策寬鬆的環境下，人民幣債價自然較為堅挺。之前，有消息傳出，強積金將開放買國債，不過，等修例完成後，市場環璄亦都轉變咗，到時亦都未必係好的入市時機。
大家最最最諗唔通既係，港股身處亞洲，俄佬打烏克蘭，居然係我地港股跌得最多，真係無天理。2月份港股基金平均跌咗4%，環球股票基金平均都只係跌咗2.8%，歐股基金跌3.4%，美股基金跌3%，日股基金都只跌1%，到底香港搞乜鬼呢。我地唯有咁諗，有咁耐風流就有咁耐折墮囉，彈得多，回得自然要多D，如果1-2月合併咁睇的話，其實港股就無外圍跌得咁恐怖了。1-2月，環球跌超8%，美股跌到接近9%，歐股都係8%左右，日本跌5.7%，香港只係4.1%，大部份都係2月跌出黎架。
近排見D討論區，大家開始將目前港股同1987年股災去比較。年長的一輩，好多都經歷過當年的股災，停市四日，跌超50%，避得開同避唔開的人生分野就好大。港股今輪同87年就好唔同了，成個市場係陰跌，由2018年高位，反覆回落，2020年就話係有COVID，同外圍一齊跌，無可厚非，但港股反彈過後，就持續陰D陰D咁跌，舊年至今累計的跌幅，雖然仲未拍得住歷來股災的水平，但高位坐住落的話，就非常傷了。係中美角力、COVID、外圍戰爭，同埋本港自身失去咗過去作為中國對外橋樑的獨特性，多重因素影響之下，令港股異常疲弱。我地睇番恒指目前係20500點水平的PE，已經跌到得番7.7倍，大幅低於過去10年平均的11.1倍，而PB亦跌穿咗1，得番0.8倍，過去10年平均係1.3倍，難怪唔少人會去撈底，特別係一眾業務較穩健的高息股。不過，就算去撈底，都要衡量下本身有無坐貨的能力，同埋要有適當的風險管理。
雖然有人覺得俄仔打烏克蘭係唔道德，亦有人會話係佢地自己國家歷史版圖的問題，但點都好，對於環球市場比較好的方向，係戰爭盡快結束。美國係咁供應武器畀烏克蘭，拖長戰事，而俄羅斯方面未達目的亦不可能主動撤軍，雙方拉鋸下，對環球股市極度不利。除咗經濟及金融各方面的制裁，會拖慢疫後的全球經濟復甦步伐之外，最重要係擾亂咗既有的國際秩序，美國凍結俄羅斯bank reserve，俄羅斯又打算充公番你外資企業資產，無晒規矩，打起仗上黎，大家變晒強盜，亂晒大籠，就係投資界最怕發生的情況，無晒法律法規保障，大家唔係自己本國的資產都危危乎，連李嘉誠都加速出清英國資產。而美國又會唔會借戰爭而拖延加息，甚至再度放水呢? 咁就要視乎呢場仗點收科了。若戰事不幸沒完沒了，愈拖愈耐，甚至SPREAD OVER的話，到時股市可能低處未算低呢。
係咁既背景底下，1-2月，強積金的資金流，大部份仍然係流向宏利同埋永明。不過，我地發現，匯豐今次居然排咗係吸金排行榜的第三位，一改佢之前成日有淨流出的格局。而流入匯豐的資金，我地係圖中可以見到，主要係投入佢的保守基金度，大約有超過6億元，亦有部份係撈底恒指基金同埋中港股票基金，另外，仲有d資金係買入核心累積基金同埋智優逸歐洲基金。而走資最多的匯豐基金，就係增長基金同埋北美股票基金。同我地之前講的，都好脗合，大家普遍都係underweight 美股，轉保守，同埋撈底中港。
至於吸金王宏利，頭兩個月的情況亦相若，都係有大量資金流咗入去利息基金，超過9億元，同埋保守基金，約4億元，同時亦有部份資金嘗試撈底港股基金，大約有5億元。而逃離北美股票基金的金額，亦係最多，有大約2-3億元。
所以可以見到，D 資金流的方向主力都係係度避險。係咁的內憂外患的大環境下，部份香港人選擇逃離，香港入境處的數字顯示，本港今年2月淨流出的人口達到71350多人，當中香港居民淨流出65300多人。2月的淨流出，數字比1月份的15200人與去年12月的16800要多。而且係自2020年12月以來，連續第14個月錄得淨出境情況。而以永久離港為由，提取強積金的金額，舊年全年已突破咗90億元了。大家對香港前途感到悲觀徬徨，出到去，外邊亦都立立亂，係同一天空下，何處是樂土?
又係拉粉時間，大家訂閱咗我地未呀? 拜託LIKE, SHARE, SUBSCRIBE一下，萬二分感激。
今日就UPDATE到黎到，大家對股市同埋世界格局有乜睇法，歡迎留言分享。我地下次見，BYE BYE
更多內容：
美股表現近年持續強勁，不知如何入手？我們精選了10隻高增長美股，並撰寫了《不應錯過的10隻高增長美股》免費報告。立即按此下載！
想提早退休? 想提高每月的被動收入?
我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣，請立即按此免費下載！
本文所提供的信息僅供一般參考之用，並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)
