經營一個channel真係好難架，又要搵題材，做資料搜集，分析，好似返多一份工咁。當做到心灰意冷時候，見到大家係下面留言的支持，又會有番少少的溫暖。疫情嚴峻，相信大家都唔想確診，好多公司都已經wfh，中環得返平時一半人左右，啲外資行，剛剛先開始返返公司見到真身無耐，又再wfh。
但omicron傳播力強，要來的避都避唔開。 omicron自從 11月中係非洲傳開來之後，見到外國的疫情數字，幾何級爆升，好似大家好掛住的「鄉下」日本，新增確診數字係由11月份的幾十宗，爆升到10萬宗一日，好得人驚。本來香港一直都守得幾好，但香港1月亦告失守，確診數字每日係咁創新高，日日千千聲咁升。
係1月開始時剛開始有大行又再book返酒店，開conference，講下新一年outlook，但剛剛叫好晒人，就突然爆個omicron出來。
omicron橫行當大家都覺得感染機會大增的時間，1月19日居然有新聞報話，恒生保險提高咗確診賠償。究竟恒生係想發災難財定係想點？我哋睇埋落去。個新聞係咁: 係3月31日前成功投保，由保單冷靜期完結日至4月30日期間，若不幸在香港確診2019冠狀病毒病，每位受保人將可獲提供的一筆過現金賠償將由10萬元增加至18萬元。
大家留意返，係1月19日，個時香港疫情仲係每日幾宗，所以恒生出左這個新聞後，當然無乜人為意。但到2月初，每日個案已升至逾千宗，咁大隻蛤乸隨街跳，咁自然有機會主義者，攞番呢單野出黎擴傳，叫人快d買。依單嘢有連登網民出post，標題為「(恆生派錢) 中咗omicron 就送你港幣$18萬」。畀連登仔一推，d人即刻上網了解下乜情況，原來仲有推廣優惠，可豁免10個月保費，即係只需要畀幾十蚊，買個50萬人壽保險一年TERM，過到21日冷靜期後，睇下四月底前中唔中，確診咗就有成18萬賠償喎。
身邊的朋友，即刻瘋狂share，有d人見畀幾十蚊，就當買六合彩咁，即刻上ebanking投保。買得快好世界。
本來產品多人買梗係好事，但這隻產品，多人傳，多人買左，
過咗一日，恒生居然即刻縮沙，更新咗呢個額外保障，2月11日開始，先買的人，賠償金額已大幅降至最低的2800元了。
究景這隻產品有乜問題，攪到恒生要即刻轉軚？
嗱，條數可以咁計，
如果恒生當時無即刻更新截住唔畀人再買的話，就係有排輸。香港一日上千人確診，去到4月底，我地wild guess假設累計確診人數可能會升到5.6萬人，之前城大有個數學模型估計會去到近廿萬人確疹。如果真係咁多人確疹，恒生賠都賠到燶呀。一人賠18萬，5.6萬人要賠成100億架。假設700萬香港人都去買晒，每人畀58蚊，佢都只係收得4億元，完全唔夠賠囉，係計唔通條數架。
恒生咁大間公司，咁都計錯數？好明顯係，個Product出的時候，精算班友諗住香港清零政策，無乜人會中，可以開個大額賠償，吸人黎幫襯。但佢地低估咗omicron的傳播力量，亦高估咗政府清零的能力，結果要即刻縮沙，改番低個賠償金額，都咪話唔肉酸呀。人地唔放上討論區，佢地都唔發現咁大鑊，真係要檢討下啦，同埋多謝下連登師兄。11月外圍已係咁講omicron傳播力有幾勁，去到1月，居然都仲出d咁的product，真心派錢。
到底有幾多人搶閘係佢縮沙前成功買到呢? 你身邊又有無朋友買到呢? 我地就有朋友，係依單消息一流出時就即刻去買，話晒都係比幾十蚊。不過，你唔好以為佢係2月11日前上網申請咗，就一定得，佢買咗幾日都仲係度等緊審批，到底保險公司個邊會唔會又有諸多藉口唔批呢，就要等下先知啦。
買咗中左要有得賠都唔係咁易，因為佢都只係同你對賭大約2個月的時間，你要係岩既時候中先得，只要你唔係係個段期間中的話，都無得賠，仲有，咁鬼長的冷靜期，冷靜期間中又無得賠，如果係試圖或蓄意招致感染2019 冠狀病毒病，都係無得賠，佢點樣證明你係試圖或蓄意招致呢，真係天曉得~
成件事最神奇係，居然唔洗身故，就有咁大額的賠償。我地睇番宏利，原來佢都為佢港澳的保單持有人及受保人，提供接種疫苗副作用的免費保障，無需任何事先登記手續，真係多咗保障自己都唔知呀，如果係接種疫苗出現不良反應後30日內，不幸因不良反應或其併發症於香港或澳門身故，將獲得20萬元的恩恤身故保障。
咁大額的賠償，一般都係要身故囉，恒生個個確診就賠18萬元，一定係計錯數啦，除非唔係。
美股表現近年持續強勁，不知如何入手？我們精選了10隻高增長美股，並撰寫了《不應錯過的10隻高增長美股》免費報告。立即按此下載！
想提早退休? 想提高每月的被動收入?
我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣，請立即按此免費下載！
本文所提供的信息僅供一般參考之用，並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)
