【MPF醫務室】宏利康健護理基金 大家滿唔滿意佢的表現?

唔知大家有無留意一下啲強積金既廣告?維持左一段時間,我哋都仲係可以係地鐵,巴士,電車見到宏利既強積金廣告。其他強積金計劃既廣告就少見啲了。有人話宏利可以做到MPF龍頭,因為整體表現好,又有人話係因為基金選擇多。我哋覺得有一個原因絕對幫到宏利去搶佔mpf市場既,就係佢有隻得佢先有既康健護理基金。

今日就同大家講下,MPF世界內獨家的單一行業基金,就係宏利隻康健護理基金,佢十年累計回報高達194%,舊年2021年一年就升咗18.8%,呢隻基金係MPF世界內就無同類基金可以同佢比較啦,到底佢做得好唔好呢?

絕對值黎講,佢10年升咗近2倍,相信好多供款人都已好滿意了,佢絕對係最TOP果堆,因為成個強積金平台上,有成400幾隻基金,10年表現好得過佢的,得個10隻,而且大部份好過佢的都係美股基金。

至於相對表現黎講,想知這隻基金做得好唔好,要做到蘋果同蘋果咁比較,我地將佢同美國上市的醫療保健相關的ETF,黎比較一下。

美國上市市值最大的醫療保健ETF,係XLV,佢的資產值高達350億美元, 佢的回報表現又點呢? 過去十年,連股息的總回報高達380%,遠超宏利隻康健。XLV的expense ratio好低,僅0.12%,而宏利康健則高達1.92%,兩者相差成1.8%,十年落黎,回報就差好遠。

睇番美國上市十大市值的ETF的費用率,無一隻係超過1%的,最貴個隻係ARKG,都只係0.75%,望落比一眾香港MPF基金都算係平啦,但佢expense ratio已被打入C級!即係係外國的標準黎講已係好叉貴。最平個隻FHLC,更加係低至0.08%。費用率高低直接影響到基金的長遠表現。

不過,除咗費用率之外,大家要知道,美國派息係要扣稅的,所以扣稅後的回報,XLV實際上又沒有380%那麼高,我地就整咗幅調整咗股息稅的回報圖,畀大家參考下,總回報係落番d,但都仲係高過宏利康健好多。

我地又比較下,最大個隻XLV的持倉,同宏利隻康健又有無好大出入?兩隻基金的股份好多都重疊,只係比重唔同。XLV的第一大持倉係Johnson & Johnson,揸到過咗8%,而宏利康健就持有4.9%。反觀宏利康健第一大持倉係Eli Lilly,揸咗超過6%,呢隻股XLV都有揸,但比重不足4%。宏利十大持倉中只有3隻,包括瑞士公司Roche, 英國瑞典生物科技公司AstraZeneca同埋美國的生物製藥公司Gilead Sciences,呢三隻係XLV 15大持倉中,係見唔到的,其他股份就都一樣。

至於市值排第三的ETF IBB,就係醫療保健子行業Biotech的ETF,費用率係0.45%,比較高。而股份中就有近年因為疫苗而爆紅的BioNTech同埋Moderna,持倉分別佔比2.72%及5.32%。佢第一大持倉係美國生物製藥公司Amgen,揸咗超過10%,第二大持倉Gilead Sciences就超過8%。睇番歷史圖,Biotech 係比較波動,2013-2015年曾經大幅拋開其他基金,但之後的調整浪又較大,而且時間亦很長,直到2020年再度發力跑上。

睇番一年表現,宏利康健都係跑唔贏XLV,而IBB因為2021年8月開始出現調整浪,本身又較波動,所以短綫就輸咗畀宏利康健。

呢堆大市值的ETF中,有一隻相當耀眼,表現領先其他很多。呢隻市值只排第四,唔係最大,但10年表現就最好,十年升咗接近6倍,佢就係IHI,佢主打醫療設備,佢無大型藥股有PATENT到期的問題,又無BIOTECH股票咁波動,佢頭15大持倉,同XLV及IBB的重疊性低,可以補足全面性的醫療保健ETF在醫療設備的較低EXPOSURE。

個別藥股有研發失敗及PATENT到期等風險,而一籃子的醫療保健股票的ETF,可減低投資者一注獨贏只持有單一個股的風險。

MPF無得揀,係constrained maximization底下,呢十年揸住咗宏利康健,都係不俗的選擇黎。醫療行業前景唔錯,這基金題材獨特,可以做為分散風險之用。至於未來係點,相信eMPF推出,降費係必然的啦,有無可能降到同外國的ETF睇齊呢,係有D大想頭,大家不妨期待一下囉。

最後大家唔講唔知呀,這隻基金宏利都用左秘技,就係請槍喇,這隻基金都唔係全部由宏利自己管晒架,佢都將部分既投資管理外判左比其他基金公司,佢咁做法有好多好處,可以令到隻基金集合到唔同既投資風格。至於佢外判左比邊間公司?我哋唔講喇,大家上次對於隻宏利美股基金外判左比邊間都未估到喇。大家subscribe咗我哋先啦,我地會深入啲同大家分享多啲關於強積金既事。

今日就同大家睇到呢度啦,近排聽到個笑話,好想同你地分享下,朋友甲同我講,港股似乎L型見底了,朋友乙就回他一句,無錯係L型,不過唔係大階L,係細階l呢,係深不見底~

講下笑,調劑下。祝大家身心健康~唔洗幫襯藥股~多謝收睇,下次見,byebye

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 76 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured