宏利買起咗安聯MPF,點解安聯旗下基金表現一個天一個地?

 

近排大家成日係咁講美股同港股,因為一個天一個地,實在太極端,一邊心花怒放,一邊愁雲慘霧,兩邊分野太大,所以成為咗焦點。咁其他基金呢? 有無類似的情況? 除咗港股同美股之外,我地之前做的街訪片中都發現,有唔少朋友係買咗亞洲基金架,大家又知唔知過去一年亞洲基金的表現係點呢?

其實亞洲基金都有唔少資金流入架,舊年1-11月,就淨流入咗成40幾億元,係咁多類別中排係淨流入榜第六位,算幾受歡迎架啦。對於少人講的野,我地MPF醫務室就抱住好奇心去睇下。一睇之下,就有大發現。榜首同榜尾的表現,居然同港股美股一樣,都係分野極大。榜首隻安聯東方太平洋基金升逾10%,但榜尾個隻,同樣係安聯出品,叫安聯亞洲基金,就跌近10%,到底乜事呀?

這2隻基金,同樣係安聯,同一間公司,居然都可以一個天,一個地,叫一般供款人點揀好?不過大家唔洗擔心,咁既事情,我哋一定會幫大家研究,大家記得要㩒下面既訂閱制,subscribe我哋呀!

相信大家都知道,安聯MPF已經畀宏利買咗,依家由宏利做SPONSOR,宏利變相揸住兩個計劃,包括佢自己本身的宏利環球精選(強積金)計劃,同埋買番黎的安聯MPF,現在叫做宏利退休精選(強積金)計劃。這兩個計劃係互相獨立的。

唔知將來宏利又會唔會搞搞佢,將兩個計劃合併呢? 不過,聽聞就算宏利想整合兩個計劃,係現時積金局都未必會咁輕易就批,因為積金局現在首要工作就係推行個eMPF (積金易平台),所有其他工作都要延遲。

講番安聯個兩隻基金先,我地睇番呢兩隻基金,十年來的表現,你見到幅圖,係2021年之前,佢地的走勢都差唔多,咁多年來,有時你跑贏少少,有時佢跑贏少少,但好快大家又見面,跑贏的有時又回得多少少,跑輸的有時又急起直追番少少,大家咬住唔放,爭黎爭去。直到舊年開始分出勝負了。隻安聯東方太平洋基金舊年唔理對手,自己繼續升,隻安聯亞洲基金就將前年的升幅係咁嘔番出黎,結果,到咗2021年底,安聯東方太平洋基金遠遠拋開咗安聯亞洲基金,十年累計回報高約1.8倍,而隻安聯亞洲基金只有1.1倍。

以前大家的攻擊力同防禦力,係你來我往,有時你贏有時我贏,但舊年安聯東方太平洋基金無論攻擊力定防禦力,都完勝對手。大家仲記唔記得我地之前教大家點樣去比較基金呢,我地係用基金擂台的方法,用多角度多指標去比較基金,唔記得的朋友或者有興趣睇番的朋友,可以點擊右上角條Link去重溫。攻擊力同防禦力就係其中的兩項指標。

舊年到底發生咗乜事? 兩隻同類別的基金,佢地到底有乜咁大分別,導致咗佢地的表現分道揚鑣? 我哋會係3方面去分析呢2隻基金。我哋會將重要既原因放係最後,所以大家一定要睇到尾呀。

第一係可投資既股債百分比

係mpfa既分類中,安聯東方太平洋基金唔係亞洲股票類別度,佢被歸類為混合資產基金,而安聯亞洲基金先係屬於亞洲股票類。點解有咁分別呢?

係佢地本基金說明書中我哋見到係雖然兩隻都係可以100%投資於股票,但東方太平洋基金既說明書有指出如果股市差的時候,佢可以將0-50%投係債券或可換股債券,基金的操作彈性大好多,遇着唔對路的市況時,可以調最多50%過去較防守的債券類別,而市況好時,又可以100%重鎚出擊。

依樣係東方太平洋獨有而係安聯亞洲基金做唔到的野啦。不過,有咁的工具,都要基金經理有咁的操作能力先用得着。

我地仔細睇番,東方太平洋既基金經理就好似無好大量去增加債券既投資喇。因為係去年6月底同11月底基金的十大持倉,東方太平洋基金都仲係清一色股票,當然十大持倉都係股票,唔代表十大持倉以外沒持有很多債券,我地只能理性推斷,相信佢個組合仍是偏重於股票為主。簡而言之,雖然東方太平洋基金同亞洲基金可以投資係債券來避險,但2021年大幅跑贏既原因,我地相信貢獻都不大。

第二可投資國家

股債比率唔係重要既原因,咁乜先係呢?

繼續睇落去,我地發現,佢地投資的股票,先係佢地基金表現出現重大分野的重要原因。亞洲基金話自己投資於亞洲(日本除外)的股票,而安聯東方太平洋基金就話自己投資於亞太區股票,兩隻基金的區域只係差一隻字,亞洲同亞太基金的分別,有睇我地之前條片的朋友應該會識分,兩者的分別主要係亞太基金的基準會有比較多的澳紐股票,而我地睇番安聯東方太平洋基金,佢係有澳紐成份的,11月底紐西蘭佔8%,澳洲佔6%,而安聯亞洲就無澳紐股票了。

多咗14%的澳紐股票,係咪就決定左表現呢?澳洲股市係2021年連股息升咗超過18%,紐西蘭股市就微跌2%,所以多左澳紐佔比應該都帶契咗安聯東方太平洋基金少少表現。但澳紐佔比唔係咁大,都唔係最重要既原因,表現的最重要差距,應該就係來自中港成份的比重同埋揀股了。

第三中港比重與揀股分別

安聯亞洲基金的中港比重比東方太平洋既高得多,舊年6月底時高達51%,去到舊年11月底雖然略降,都仲有46%;而安聯東方太平洋基金中港的比重,由6月底的39%降至11月底的33%,安聯東方太平洋基金揸住中港的比例,較安聯亞洲基金低大約13%。中港表現咁差,又係拖低安聯亞洲基金的又一因素。

2隻基金既中港持股都唔同,我地睇下亞洲基金的十大持倉,係唔係大部份都熟口熟面呢,無錯,佢就係投咗好多係中港股票上面,阿里巴巴、騰訊、美團、港交所、AIA、藥明生物、貴州茅台,當中,好多係2021年都反覆向下,拖累咗安聯亞洲基金的表現。

反觀東方太平洋基金,佢的中港成份就低好多,而且十大持倉最重倉個隻中港股票係中海油,個堆回得好勁的過氣強勢股如科技股、藥股,佢就揸得少,唔似安聯亞洲咁,揸到成手都係,佢十大持倉中,只瀨咗藥明生物同再鼎醫藥兩隻。如果佢地呢5個月無大幅郁過個倉的話,其實藥明生物、再鼎醫藥回落咁多,都有機會自動跌出十大,咁當然要有其他股票升上黎或者跌得少取代咗佢個位。如果係佢主動減持咗的話,就更加係神操作了。

安聯東方太平洋基金,雖然都踩咗d地雷,但佢升得勁的股票夠多,升幅又夠大,所以基金的整體表現仲好好。6月底至11月底,持倉大幅上升的股票,有好多隻,而且升幅相當驚人,其中三隻係台股,包括世芯電子(ALCHIP TECHNOLOGIES),信驊科技(ASPEED TECHNOLOGY )、祥碩科技(ASMEDIA TECHNOLOGY),仲有兩隻約40%回報的日股。再睇番安聯亞洲基金,D股票跌得多,升得少,所以回報就係咁跌。所以,可以見到,安聯東方太平洋基金的揀股功力。

好啦,今次就同大家分析左,點解兩隻同一間投資公司、差不多類別的基金,表現一個天一個地的原因了。

最後同大家講個冷笑話,祝大家2022年開心大吉。

朋友問我說新一年我還是一個人嗎?

廢話!難道我會變成一條狗嗎?

多謝大家收睇,記得LIKE, SHARE, SUBSCRIBE我地的channel呀,thank you,下次見,byebye

更多分析內容:

微軟有力再強勢爆上?

有高爆發力的數據分析股

美股做淡指數有乜好揀?

2022年美股投資格局主調

有倍升潛力成為Tesla 2.0的電動車股

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 76 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured