【MPF新動向】改基準迎A股

不論你準備好擁抱A股未,你啲強積金已經準備好擁抱A股了。強積金中會有近2000億衝入A股,對A股咁龐大嘅市場來講,就係一個小數目,但對於你同我,每個月都由人工中抽取,日積月累儲成嘅強積金市值來講,就絕對係一個好大嘅部份了。

大家都知道,舊年MPFA已經將上海同深圳交易所納入為「核准證券交易所」,即係代表強積金可以買入A股既百分比,唔再係之前最多10%,現在想買入幾多都得,睇返各自基金嘅投資目標。

去年A股牛氣沖天,今年就回落整固。但A股既特性係波動性比成熟市場大好多,整體指數升,都可以有大量個別股票下跌,指數跌時,都有大量個股升到你唔信。分析員業界,一般都認為,分析A股市場,要有A股思維, A股獨特的分析方法。

雖然現在仲未有A股強積金比供款人直接選擇,業界已經密鑼緊鼓準備緊。今條片我哋就會同大家講吓,業界係現在既強積金會有啲咩改動,來準備投資係A股市場上。個改變又會有幾大呢?

每個股市都總會有升有跌,唔理升定跌,但A股市場波動性絕對比成熟市場大。至於你投資左果隻A股基金升定跌,就好睇基金經理嘅揀股功力了。

我哋之前都同大家講過,喺混合基金入邊嘅環球股票,同一般環球股票類別中嘅股票成份係好唔同嘅,混合基金入邊嘅環球股票嘅中港股票成份比例係特別多嘅, 佔大概30%。點解會有咁多中港股票比例?主要因為混合基金的BENCHMARK,參考指數係咁設定。龍門set咗咁樣,大家就咁樣做。

至於MPFA容許MPF d基金無限制投資A股這個近期發展,MPF業界亦因應事件,建議修改參考指數,加入A股。即係調校一下龍門嘅位置,等大家知道向邊方面進發丫嘛。

例如建議D混合基金的BENCHMARK,由原先股票個部份有約33%係港股成份,依家想呢33%當中的兩成,即約6.6%換做A股成份,減少港股的比重。其他環球地區,如美國歐洲等嘅百分比就維持不變。

ANYWAY,擁抱A股既然已係必然的事,咁不如睇下納入前與納入後的投資表現會有D乜野唔同仲好啦。

如果將現時喺混合指數嘅港股表現,同埋加A股之後來比較。截至5月底止過去一年的表現,前者係39.3%,後者係41.8%,表現好咗。三年呢? 前者年均回報5%,後者6.7%,表現都係好咗。不過,再睇長D,5年就差咗,前者年均回報 13.1%,後者只有12.7%。睇完回報,咁風險方面又如何呢? 其實兩者差不多。三年大家都係17.8%,5年就後者低D。港股近年表現咁樣,加左就拉高左表現。都係果句啦,過去數據並不代表未來,如果咁易就估到未來表現,我哋醫務室都開咗金庫啦。

加A股之前同之後既最大的唔同,在於加左之後,可投資的股份由原先的300幾隻,大幅加至過1000隻。而加埋一齊之後,科技行業的比重,會下降1個百分點至15%,而金融、房地產、非必需消費的比重各下跌2個百分點至27%、7%、同埋20%;必需消費則大升3個百分點,至7%,而醫療保健、工業及材料各升1個百分點。

MPF投資咗係混合資產基金的資金現時大約有4800億元,假設當中50%為股票,粗略估計,僅混合資產基金便有約160億元的資金要從港股或ADR中撤離,轉投A股。至於其他類別的MPF,如亞洲股票基金,涉及的中國成份更加大,三四成都係中國,仲有中國基金、以及大中華股票基金,僅呢三類基金目前的總市值高達2000億元, 未來呢d類別的基金轉投A股的金額預期亦相當龐大。

理論上唔係隻隻MPF都會買A股,基金說明書有講投資範圍,範圍唔岩就唔可以夾硬買,除非修改說明書啦。粗略估計,強積金中,總共會有1000億至2000億元,衝入A股!

講番個benchmark改動的建議,就算落實,都唔係短期的事,預計都要2023年先會實施。咁業界對於改動又係點睇?。根據香港投資基金公會的調查,絕大部份從業員都支持係benchmark中加入A股,而且大部份人建議加入低於5%或介乎5-10%,不過對於A股係同港股一併合計,還是分開來獨自計算,大家就意見分歧。而大部份人亦支持,非中港股票的比例,要與環球市值的比例貼近。

美國係全球最大的股市,而中國則排第二。但目前中國係環球股票指數中的佔比,同佢的市值比重,絕不相稱。

現在就話佢嘅股市仍未完全流通畀資金出入去買賣,但可以預視的將來,中國股市係環球股票指數嘅佔比只會不斷上升。

係2016年,外資持有境內股票佔中國股市市值只有1%多少少,但2021年,已升到接近5%。雖然香港有d中國企業,暫時並未在內地上市,大家仍要在港股交易,但某某公司回歸A股掛牌,某某公司分拆業務去A股上市的消息,此起彼落。此消彼長。以前,大家想要中國EXPOSURE,只能投資於港股的中資、紅籌、國企股,或者在美股的中資ADR,依家,逐漸可繞過香港,直接投資內地股市。香港呢個國際金融中心的地位,將何去何從呢?

以前投資中國,資金會擔心只可進不能出,後來有滬股通,深股通,進進出出,相安無事,呢方面的風險似乎也降低了,於是,那裏有投資價值,資金便湧往那裏。好似隻深股寧德時代咁,有「電池茅」之稱,即係電池界的茅台,升咗咁鬼多倍,大家又估唔估到,全球持有寧德時代股份數最多的單隻公募基金,係來自歐洲巨頭安聯投資旗下的安聯神州A股基金,高過晒中國d基金呀。所以,都咪話「外資」唔想買a股。現實係邊度有錢賺,「乜資」都想黎分一杯羹。

睇返MPF嘅資料,安聯都已經出咗一隻A股既匯集基金APIF,呢種基金唔係畀一般供款人買嘅,係比其他強積金基金買入去嘅。想詳細了解強積金的運作同架構,APIF同CF的分別,可以睇番我地之前條片,我地曾經講過,係呢度就唔多講了。

安聯都出咗A股既APIF,有第一隻,自然好快會有第二、三、四隻,A股的APIF,咁強積金投資喺A股上,只會越來越多。

早前積金局都有講過,現時強積金總資產已經比財政儲備高了,咁大舊錢會投資係什麼市場絕對係舉足輕重,各方面都望實呢筆錢嘅去向。各方勢力人士都會加把口來參與,偏偏有份供款嘅小市民就冇say,積金局現在想重新規劃不同嘅基金分類,想加入不同類型基金,例如派息基金,抗通脹基金等。如果有乜最新發展我哋再同大家分析。請問大家subscribe咗我地未呢? 希望可以得到你地的支持,請like, share,同subscribe我地的頻道,謝謝。歡迎留言分享。

今日就講到呢到啦,我地下次再見,byebye

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 50 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured