【ETF投資】退休投資必學 ETF入門攻略全集

 

大家都要供MPF,對於乜野係基金,自然唔會陌生。買股票既有股票基金,買債券既有債券基金,至於兩樣都買啲既,好似雪糕溝可樂,將股票同債券溝埋一齊嘅叫混合資產基金。

股票基金仲可以揀唔同的市場,例如美股基金、日股基金、港股基金、大中華股票基金、環球股票基金,成個超級市場咁慢慢俾你揀。

單靠MPF就唔夠退休,想退休前儲多個錢,又嫌MPF的選擇唔夠多,唔想將閒錢全部都放埋落MPF的自願性供款度,坊間其實都有唔少投資產品供大家選擇。

大家一直係MPF呢度學識咗點投資,出到去坊間買其他基金的原理都係一樣。另外,坊間仲有ETF、股票、債券、外幣等唔同的投資工具,投資方式多到講到出年都未必講完。今日我地就同大家講下ETF先啦。大家聽多次,係ETF,唔係WTF呀。

我哋成日有朋友講,話早知舊年開始時買美股就好啦,又話早知2個月前開始買石油就好啦。我哋真係唔知點答佢好,佢有投資idea絕對係好事,但又唔諗下可能美股市升,但比你買個別股票,又會唔會揀到升果隻?就算最後贏錢,但會唔會驚到瞓唔着覺先。俾你估到石油會上升,你唔通去油站入多啲咩?

對於這種情況,係呢個時候ETF就幫到你了。

係呢條片我哋首先會同大家講一講乜嘢係ETF,喺投資上邊,買ETF有乜好處。

之後我哋仲會教大家點樣就住你心中想投資既類別或市場,搵到適合既嘅ETF,最後仲會教大家點樣check下你揀左果隻etf真係投資左係你心中既市場上。

ETF有乜好?

ETF呢,其實只係Exchange traded fund的簡稱。中文就係交易所買賣基金,顧名思義,就係基金的一種,只係呢種基金係交易所度買到,唔似非上市的基金咁,要經基金公司或指定分銷商如銀行等先買到。

大部份的ETF都係買咗一藍子的股票、債券同其他資產,同時ETF都係分咗主動型同被動型,同MPF d基金係唔係好相似呢~

買ETF嘅好處就係只係買一隻基金,就可以擁有成個行業或者成個國家嘅投資表現。唔需要獨立去揀股票,唔使驚獨立一間公司,一隻股票有乜特別問題,因為etf係一隻基金,入邊有好多隻股票喺度。而且通過買ETF,可以買到一啲自己唔係咁熟悉嘅市場,或者行業。好似而家好興嘅電動車行業,如果我唔知而家邊間公司研究發展成點,或者邊間公司佢嘅財務報表好唔好,買一隻行業ETF,就可以投資到整個行業。

ETF又可幫手投資到一啲比較偏門嘅地區例如越南泰國等,一般人好難對越南,泰國等地區嘅股票有研究,但都可以通過買一隻ETF就投資到。

咁點樣買賣ETF㗎?ETF既買賣同你買賣股票一樣,通常透過經紀或經紀平台交易,以交易所現行市價進行買賣。ETF既好處在於佢收費平。如果你唔係買MPF而係買坊間的一般的基金,通常會有好多其他收費,最常見的就係認購費同贖回費,有D基金的認購費高達2-3%,根本係未入場先打三十大板。

不過如果你好有錢,或者夠大聲,D分銷商為咗促成生意,有時都會就個別客戶減低認購費,你可以自己去試下啦。

ETF,名碼實價,同買賣股票一樣。有樣野好過買股票既就係本港ETF交易獲豁免印花稅,所以比買賣股票成本更低。你叫杯凍飲都要加$2蚊啦,所以買賣ETF,雖然係著數左,但同股票一樣都係要比交易徵費、經紀佣金等費用。

雖然ETF既買賣似股票,但大家買股票,一般會睇下隻股票有幾多成交金額,因為擔心要賣出時,無買盤接貨,甚至要大割價先出到貨。ETF又洗唔洗咁呢?

ETF一般就唔需要有呢種顧慮啦。因為香港上市的ETF都設有莊家制。

大家唔好驚,依度講既莊家唔係賭場果啲幫你搖骰仔開牌果啲莊家。依度講既莊家

又叫造市商,佢地嘅工作係持續報價,同時提供買方和賣方的報價。

個情況有啲似你上網買賣,想買時你問佢幾多錢,如果你覺得啱價錢就同佢買。你如果手上有貨,覺得佢回收既價錢ok,你又可以講聲「走先喇,係咁先喇,下次再玩啦」,轉個手賣返俾佢。

咁個莊家賺乜啦?佢就係賺賣比你既價同回收個價之間個差距。這個兩個報價的差價就是莊家提供流動性的收益。都係唔好關心莊家點樣賺錢,關心一下自己點賺錢好過。

香港第一隻ETF就係政府90年代打完大鱷之後既產物,隻盈富基金(2800)就係1999年係咁情況下出世喇。過左20年,唔同種類的etf百花齊放,目前係港交所上市有123隻ETF,仲有26隻槓桿及反向產品。

ETF除咗香港愈來愈多之外,全球都相當受歡迎,畀D數字大家參考下啦。今年6月底,ETF全球資產管理規模已經達到9.1萬億美元!

咁香港個123隻ETF,有D乜野揀?如果我心中有個idea想投資係一個市場,比如美股,或者石油,我又應該點搵呢?

大家可以上港交所的網站:https://bit.ly/3oBwthn

睇一睇,就一目了然啦。

入左個網站,見到好多野,但唔好理佢,我哋要去CLICK 「投資重點」個選項。㩒左佢會發現除咗有廣泛市場之外,仲有大、中、小型股、行業都有好多揀,消費品、能源、金融、醫療保健等等,一大堆咁。仲有唔同的主題,好似股息、策略、資產配置、主動,仲有現時基金界好hit既ESG。債券又有幾種,商品又幾種,好似黃金、原油、鐵礦石咁。如果咁都搵唔到你想投資既野,你可以再CLICK入「廣泛市場」望一望,係依度你會見到有泰國、菲律賓、韓國、馬來西亞、巴西、越南、美國、中國、環球等等等等,講到口水乾都講唔晒。選擇一定多過你MPF D地區基金呀。

但我估除非你係投資高手,唔係都好少買到咁「尖」。

想買石油既人士,就係資產類別個度揀商品,就有黃金、油、鐵礦石等ETF,呢個類別目前仲係比較少選擇,都無鎳、銅、咖啡、農產品之類的商品可以揀。我咁鍾意飲咖啡,一日一咖啡,睡魔遠離我,可能都要搵黎買下~

睇多咁多野,睇到我都暈暈地。(閃過圖:休息中)

抖完又繼續睇埋落去。近排電動車主題好似好hit,又睇下有無先。我地揀番行業:科技,就會見到有FANG、恒生科技、中網、雲計算、智能及機械人、中國半導體、中國電車等等。搵到喇,中國電車。

呢D近年好HIT的科技子板塊,因為投資的範圍集中單一行業,無咁DIVERSIFIY,所以比基本面更廣的股指,會更加波動,風險亦都較高。心臟負荷唔到既朋友就自己小心喇。

大家睇咗個名,中國電車,都唔知佢係買緊乜野,佢係講坐果啲電車定係電動車呢?

咁就要詳細D研究下,同之前教大家點睇MPF的基金都差唔多。咁搵隻做例子,好似2845咁,CLICK入去,佢入面就話:「 子基金的投資目標是提供在扣除費用及開支前,與Solactive中國電動車及電池指數表現緊密相關的投資回報。管理人將主要採用全面模擬策略,透過按指數成份股納入指數的基本相同比重直接投資於成份股,以達致子基金的投資目標。」

隻基金係TRACK住Solactive 中國電動車及電池指數,佢的經常性開支係0.68%,係唔係比起MPF D基金常見的收費低好多呢,再睇落去,佢以實物資產做投資,發行商係未來資產環球投資(香港)有限公司。咁你再睇下佢份基金說明書,佢就會同你講下子基金可投資於(包括但不限於)下列中國內地相關證券:A股、H股、N股、P股及紅籌股。呢條指數的投資範圍,主要集中係電器產品、機動車、汽車零件:OEM、工業機械、化學品:特種、特種工業品、學品:主要多元化。啲野咁詳細,拍得住討論區啲起底功能。仲有https://bit.ly/30IBVqN

Indices

比大家去番條INDEX的網站,搵番佢的成份股,睇下啱唔啱心水。

同大家睇左咁耐,大家係咪都明多左點解ETF係呢廿幾年發展咁快,咁受歡迎?,因為佢的好處都唔少,除咗低成本外,又做到DIVERSIFICATION,交易又方便,又有流動性,透明度又高。ETF點解會低成本D? 等我拋下書包先,根據Vanguard的講法,「一般而言,ETF 的營運成本低於指數基金及主動式管理互惠基金。由於 ETF 投資者透過經紀行交易,故 ETF 不會產生互惠基金就通訊、客戶服務及賬戶記錄保存所產生的行政費用。這使 ETF 可以將總開支比率控制在低水平。節省下來無需用作繳付投資成本的資本,長遠可以回饋於投資者。」

所以,大家如果有乜心水市場或主題想投資,可以通過研究下ETF,都係一種唔錯的工具黎。除咗香港之外,其實美國上市的ETF更加多,呢D我地就留番下次再講啦。走先喇,下次見。BYEBYE

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 50 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured