【MPF投資篇】投資取勝之道: 動能投資VS均值回歸

之前都同大家講過,投資嘅分析方式,主要係分為兩大門派,基礎分析,同埋係技術分析。基礎分析主要係睇公司嘅基本面,財務狀況,未來現金流,未來盈利、股息等等,好多嘢都係估下估下啫,又要估discount rate,又要估個市場估值,唔怪之得叫做股票啦,原來樣樣野都係估。

至於技術分析呢,就係睇股價,成交量等一啲公開數據,以自己嘅方式來組合同埋分析,得出唔同嘅數據指標,或者用啲數據來畫圖形等。圖表派中又有陰陽燭,線形圖等,高深啲嘅又會教你睇ichimoku 雲,真係睇到一舊雲。

睇圖太難可以睇指標,指標都係用過往股價同埋成交量來組合出來,林林總總,五花八門。現在交易軟件或交易平台非常普及,各類指標唔使自己計,直接用軟件或app就可以得出。指標太多,資訊太氾濫,反而唔知信乜好。

其實你望到既現在這個股價,往後嘅股價唔係升,就係跌,就算唔郁,都唔會唔郁好耐。

投資嘅問題係你現在這個價會唔會買呢?如果你現在唔買,究竟你係想等股價跌多啲後先買入?定係股價升返,俾返啲信心你,你先敢買?

面對呢個問題,技術分析,衍生出兩個大方向嘅見解,

一種叫動能投資或者叫趨勢投資,momentum investing, 即係覺得升幅愈勁嘅時候愈應該買。

另一種叫做均值回歸,mean reversion,即係近期跌先至好買,越跌越吸引。

就咁睇都覺得呢兩種方向係好唔同啦。

講返動能投資,momentum investing,即係佢相信,現在升得最勁嗰隻,最有動能,佢最會繼續上升。個情況就好似你見到有幾個人喺度跑步,有啲跑得快,有啲跑得慢,如果叫你估下一刻,邊個會繼續跑得快啲,咁你會點估?

所以動能投資就相信「寧買當頭起,莫買當頭跌」。即係trend is your friend,你要follow the trend。

呢種投資方法,最比人垢病既就係,如果真有動能嘅股票就會繼續升,咁我哋應該會見到啲股票升晒上月球,唔會跌返落嚟啦。

所以動能投資最大問題係如果只睇動能,咁就要股價個趨勢完咗,開始下跌時,你先知道個趨勢已行完,而做唔到一啲預防性或前瞻性嘅動作。

其實大家都成日會用到動能投資嘅指標,其中最常用既,可以講係移動平均線嘅操作。平均線即係將過去嘅股價加埋出一個平均數。

一般移動平均線嘅用法,比如五十天平均線由下向上穿250天,其實係代表近50天嘅短期趨勢,比250天嘅長期趨勢好,近期情況有所改善,所以相信未來會持續好。我哋就用咗恒生指數做一個例子,大家睇圖可以見到,係2020年11月中,出現咗五十天平均線上穿250天平均線。之後情況係咪一直好啦,大家可以見到係呢個例子上,都好似OK。但如果用佢嚟出場的話,因為用平均線,一定會有延遲,會要到下降趨勢已經形成咗,佢先會叫你出場。

另一種比較常見過動能投資方法,就係直接比較不同股票或基金係過去既表現。依種方法,好多人暗中用左都唔知。大家都係睇過去乜類別回報表現好,就跟住買嗰隻,大家其實暗中都係用咗動能投資,覺得過去表現好嘅喺未來都會表現好。

除咗動能投資外,剛才講過另一種方法叫做均值回歸,mean reversion。佢嘅中心思想係所有股價都會趨向平均值,簡單來講,即係近期跌得比較多,就會反彈,趨向返平均值。而近排升得多嘅,就會跌返落嚟。這類指標中,比較多人用嘅係RSI 同MACD。 RSI當年由Wilder發明後,用咗幾十年,出咗唔同嘅版本,但基本上都係大同小異,想補捉嘅就係近期之中跌得比較多,到咗一個超賣狀態嘅股票。我們常用嘅用法,就係rsi指標低過30 ,即係表示依個走勢已經到咗超賣嘅狀態,短期可能會有反彈。

指標係用過30就表示超賣定係其他數字,唔同人有唔同嘅用法。而且到咗超賣係咪一定會有反彈呢?就算反彈會出現,個反彈幅度同埋時間又會唔會好似你預期咁呢?我哋用恒生指數做一個例子,大家喺圖可以見到,恒生指數嘅股價走勢,同埋RSI指標嘅數值。係今年中,都出現咗幾次rsi跌低過30 ,之後都有出現到一個細規模嘅反彈。因為當時恒生指數嘅形勢係一個下降軌上,所以就算到咗短期超賣,佢嘅反彈幅度都唔大。

雖然分開咗動能投資,同埋捕捉短期超賣嘅均值回歸,但兩樣之間係冇互相抵觸嘅。大家可以各自自由配搭,互補長短來用。簡單嘅做法係50天同250天平均線來定義一個上升趨勢或下降趨勢,而用rsi來定義一個短期超賣。因為一般RSI所用嘅參數比較短,所以比較短期嘅變化。

呢種用法最適合來捕捉係長期上升時的短期下跌。我哋繼續用恒生指數來做一個例子啦。恒生指數係長期上升空間嘅時間,要去返2016年開始,喺圖中我哋見到2016年下半年,五十天平均線開始升穿250天平均線,說明當時正在上升軌道,而係2016年12月時,當時市場經歷咗一個回調下跌,當時rsi都顯示左數值低過30 ,綜合平均線嘅指標同埋rsi嘅指標,顯示出當時係一個上升軌道中嘅  一個短期下跌,所以都係一個幾好嘅買入機會。而事後我哋可以睇返恒生指數嘅升幅係往後係非常顯著。

係圖既近尾段大家都可以見到,係2021年7月時,已經見到指數開始下跌,但當時嘅五十天平均線仲係高於250天平均線,呢個就係因為

動能指標有一個滯後嘅結果,而當時亦曾出咗RSI低過30既訊號,雖然係之後幾日,都真係有反彈,但係反彈幅度同時間都比較弱,操作上好容易損手。所以,比較好的用法,是用來捕捉係長期上升時的短期下跌,而唔係長期下跌的短期超跌。

技術指標好處係喺不同嘅市場,指數,股票都可以用到,比較百搭,但有時都會有false signal,仲有讀一啲比較特殊嘅情況,或個別市場獨有嘅情況佢就唔識處理了。剛才講過就係用移動平均線同埋rsi混合來用,作為一個例子。大家可以用不同嘅指標來Mix and match。

「運用之妙,存乎一心」至於點樣組合,用乜嘢來組合,就靠大家各自研究運用了。

 

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 76 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured