【MPF成績表】太恐怖! 邊類基金9個月瀉近兩成?坐住邊類基金仲賺好多?

係9月海洋公園水上樂園開幕喇!一開幕時好墟冚呀。我哋MPF醫務室就無去玩過,但我哋知道環球股市呀,美股,歐股約埋港股都一齊去玩左個7彩天梯,所以就跌到7彩。呀,佢哋明明玩左幾個月跳樓機,9月仲要玩多次7彩天梯。你話佢哋玩夠玩呢。

9月MPF回報認真悽涼,本來都唔想同大家報回報了,怕大家睇完心情唔好,又或者出現恐慌性拋售,令到個市再跳過,不過,醜婦終需見家翁嘛,從高處墮下,跌得多,另一角度看,可能係比左你一個撈底既時機,長期分注吸納。大家記住強積金閒閒地供廿三十年,1、2個浪算得乜呀,調整完心情同心態,就繼續再嚟過囉。

係9月份內,全球各地齊齊sir 7彩天梯,排名不分先後,樣樣都跌,美股,歐股,都各自平均跌多過4%,美歐股市跌,咁環球股票類別一定跌啦,平均大跌4.13%。跌幅人人有份,連好多人鍾意買既中國及大中華股票類別都跌4.12%。大家望住香港股票,由年頭既心紅,到心虛,心怯,現時心都死埋,9月港股類命水衰絕全球大跌4.64%。亞太(日本除外)或者亞洲(日本除外)都叫做跌得了,都跌超過3%。

唔好成日話要除,有啲除左未必一定好。2個亞太,亞洲,除左日本就咁差,因為成個9月只得一類股票基金係有正回報,而個個類別只得3隻基金,就係日股囉。

我地早幾期都出過片講過日股,有興趣的朋友可以睇番。雖然9月單月,三隻日股基金的升幅都相若,大家都係近3%。

痴到咁埋來睇,3隻表現都差唔多,但拉長少少黎睇,好似1-9月咁,3隻升幅就差好遠了,宏利隻日股基金升15.5%,但東亞、同中銀保誠簡易計劃隻日股基金,只升約6%,照咁睇嚟,龍頭供應商似乎係有D料到喎。真係(加句日文)

無得去日本,都係返返黎香港啦。港股類基金1-9月平均大跌9.17%,血流成河。

係一遍血腥中居然有一隻基金可以持平,僅微跌0.02%,咁出色既表現,無論係邊度,就如漆黑中既螢火蟲一樣。單計9月也只是微跌0.98%,比其他逾4%、5%的跌幅都少得多。佢係邊個?佢就係海通隻港股基金。

咁出眾既基金,大家都想了解佢多啲。係咪壞男孩先得人喜愛,係咪不按章法既基金先會有獨特表現?

睇番截至8月底的基金概覽,佢揸住10.8% 現金,睇番個行業分布,公用事業佔比11.6%,現金加防守性的類別已佔逾兩成,係跌市起到一定的保護。

佢最特別嘅地方係佢最大個塊係非必需消費品,佔咗22.46%,但係五大持倉中,就見唔到有消費股。金融及保險佔18.5%,工業佔14.39%,TMT佔13.64%,必需品及衛生保健佔4.74%,能源3.79%。個五大持倉分別係騰訊、美團、友邦、建行同郵儲銀行,隻郵儲銀行,年初至今係有升幅架。

今年1月個時,個市係咁喪升,好多港股基金都LET THE PROFIT RUN,所以錄得好誇張的5%、6%、7%的單月升幅,但當時海通港股基金卻排在榜尾位置,升幅僅3.7%。咁好以為佢果段時間輸比人就以為佢唔掂,佢2020年都錄得34.4%回報,表現屬卡上游位置架。

只係今年一月,大家繼續瘋漲,佢就率先冷靜部署,提早綁好安全帶。之後2-5月,佢表現都排到中游偏下位置,直到6、7、8、9月,大市進入大跌階段時,大家普遍下跌時,就到佢發威既時候。睇返佢既排名,見到佢表現愈排愈前,7月同9月單月都以最少的跌幅,爬到上第一。海通呢款,唔係第一就係第尾的特性,非常有個性,亦係大家對佢又愛又恨嘅地方。

有時剩係好打係唔夠嘅,大家睇基金,除咗要比較D基金係升市時會唔會跑贏之外,係跌市時,亦都要睇下佢的抗跌力係唔係強D,叫做戰神,唔單止攻擊力強勁,防守力都要有返咁上下。我地之前就出咗條基金擂台片,教大家點樣比較基金,有興趣的朋友又可以睇番。

大家最鍾意買嘅港股類別喺一至九月係大輸家,而另一個都好多人買嘅中國及大中華股票類亦都唔令人開胃,1-9月平均大跌8.95%,最好個隻MY CHOICE,僅跌3.43%,但包尾個四隻,全部係TRACKER FUND,即係追踪指數的基金,最差個隻BEA(Master trust scheme) CHINA TRAKCER,跌咗17.22%,嚇死人了,排尾四都係佢,BEA(industry Scheme) China Tracker,跌17.15%,另外個兩隻係恒生匯豐的ST PLUS,因為同樣追踪恒生國企指數的基金,都係跌17.17%。

同一個阿媽,孿生仔都會唔同樣。同樣係屬BEA,佢唔同計劃的表現差天共地呀,隻BEA (Value Scheme) GREATER CHINA TRACKER,只係微跌4.19%,同樣係TRACKER FUND,track咗另一條指數,就逃過咗一劫。咁我地就去查一查邊條指數咁鬼勁,抗跌力咁強,原來係FTSE Greater China HKD Index,佢係透過投資於SPDR FTSE Greater China ETF。

點解同港股一樣既,恒指個條就廢,ftse條港股指數表現就好咁多,都唔知係叫恒指服務公司檢討下,自己條指數表現點解咁差,定係叫基金公司檢討下,慎重考慮track邊條指數嘛。

講完d衰野,又講下d好野。環球股票基金雖然單月跌唔少,但1-9月仲升緊9.84%,美股類別仲勁,1-9月仍然錄得14.95%的升幅,升咗咁多,調整幾個%都好合理吧。另外,歐洲股票類別亦上升11.37%,當中宏利歐洲表現大幅領先,升17.53%,9月單月回調了7.6%,波幅都好驚人。仲有就係頭先提過的日股基金類別囉。

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 76 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured