【MPF供應商篇】信安Principal強積金有無好嘢?

一般香港打工仔,每個月搵搵埋埋,都唔知有幾多可以用來做儲蓄,儲蓄又唔知放係邊好。放銀行,利率少到要少數點後幾個位先見到,派左比你既利息,都唔知夠唔夠飲杯珍珠奶茶。全人類都講買bitcoin,就算想跟風,你估咁易架,都先要研究搵邊間開戶先買到啦,仲辛苦過返工。投資艱難,生活艱難,想躺平避世,但香港地,樓咁貴想搵個躺平既地方都未必搵到。

每個月望住個戶口,長期貼住底線飛行既存款數字,慨嘆個人儲蓄最大部分,竟然係每個月被迫供款,望到但拿唔到既強積金。

科技先進,你可以分分秒秒都用apps去操作強積金買賣轉倉,日日𥄫實,月月報數。但永遠唔知道,幾時先可以修成正果,提取返你來實際享用。果種飄渺既感覺,就好似同左心中既女神拍一日拖,雖然秒秒握在手裡,但永遠唔知未來你實際會得到乜。

其實世上女神何其多,強積金計劃都唔止得一個。

你個女神點諗,我哋就幫唔到你,但MPF醫務室就可以幫你輕鬆了解各強積金供應商嘅計劃。依個計劃畀唔到你安心,咁就又睇下另一個囉。

有睇開我哋啲片嘅朋友都知道,多人用嘅計劃唔代表表現好。表現好既又未必有人知道。咁信安強積金計劃又點呢?整個信安強積金市佔率排全港第6位,信安強積金底下有三個計劃,分別係明智之選smart plan,易富之選simple plan,同埋資產值最大嘅800系列。

800系列就話係佢自己個親生仔嚟嘅,另外明智同埋易富系列就係喺AXA度買返嚟嘅,本來佢自己嘅親生仔,有600系列同埋800系列,喺2020年,佢600系列同埋800系列合併,咁800系列呢就更加大喇,其下有19隻基金,分布喺18個唔同嘅基金類別內。咁多隻基金,其實裏面仲有彩蛋,想知嘅話就痴住我哋睇落去喇。基金數目多雖然會易亂,但基金叫乜名都好重要呀,如果改左啲名,一般人係睇完都唔明係投資在乜地區,

咁都幾混亂

所以係同大家分享信安800系列嘅基金表現之前,先同大家了解一下佢嘅基金名稱先啦

一般基金名稱都好直接易明,最混亂既係混合基金既名。800系列有晒四個混合基金類別,

4隻混合基金名稱,究竟屬於邊一個混合基金類別,我哋就考一考大家先啦:

長線增值,環球增長,進取策略,平穩回報,依4個名,大家睇個名,又分唔分到邊隻基金係最保守,邊隻基金股票成份就最多呢?

諗唔諗到啊?俾啲提示大家啦,

叫得進取嘅基金,應該股票成份係最高啦,另外叫得平穩回報,應該相對地係最保守最平穩啦。

咁剩返兩個名分別係長線增值,環球增長,點樣分呢?究竟長線增值會多啲股票?定係環球增長會進取啲呢?你哋又諗唔諗到啊?長線增值,個名有啲九唔搭八,點樣理解好呢?

我哋醫務室啲中文程度就冇信安咁好啦,所以我哋都係睇返MPFA嘅基金分類啦,如果按照股票成份由大至少來排列嘅話,股票成份80至100%類別嘅係進取策略,之後60-80%係環球增長,之後40-60%係長線增值,最保守嘅係平穩回報20-40%。所以根據咁嘅定義,原來係咁理解,「長線增值」應該係睇長線啲嘅,所以股票成份少啲。

大家去餐廳食飯,如果去到一啲唔熟悉嘅商場或地區,想知道邊間餐廳好食,唔知道會唔會睇吓邊間多人排隊,用呢個街坊指數來睇下邊間好食啲。

800系列既基金數目多,我哋又試吓用呢個街坊指數,睇吓邊隻基金比較多人買,睇吓邊隻基金會出名啲啦。

我哋睇返個2021年七月份嘅資產分布圖,我哋可以見到比較多人買嘅係混合類既環球增長,之後係亞洲股票、香港股票、中國股票同埋美國股票,依幾隻都係佔整體嘅資產大約8%至11%。成個信安嘅資產分布比起其他計劃來講就平均好多,冇乜特別一兩隻基金佔整體資產值好大部份。

咁即係街坊指數講唔到俾你聽有邊隻基金特別出名,特別受歡迎。好在我哋都仲有另外一個獨門武器,大家仲記唔記得一圖勝萬言?

喺圖中我哋比較左信安嘅基金同埋同類別嘅平均回報,喺圖中我哋見到嘅係截至2021年8月底三年表現回報。

同一圖表上我哋都畫咗信安基金嘅表現同埋同類別表現嘅差距出嚟,大家可以見到信安嘅中國股票基金係喺三年表現期間贏同類別平均表現最多嘅基金類。

而最差嘅係美國股票基金,佢輸同類別平均最多,而信安隻亞洲債券基金因為係2020年先由600系列合併過來,所以就唔夠數據去作比較啦。

仲有一樣野要留意嘅,就係大家可以見到佢19隻基金入邊,係三年期嘅表現,只得四隻高過類別平均。所以整體表現都唔算標青。

一圖勝萬言,兩圖更加一目了然啦

睇埋年初至今信安既強積金基金與同類別嘅比較,我哋就更加清楚知道計劃嘅整體表現如何啦。喺圖中我哋見到雖然係年初至今中國股票基金整個類別係下跌嘅,但信安嘅中國股票基金跌幅都係比類別平均少,如果只睇年初至今嘅表現,信安整體表現大幅度好轉,大部份嘅基金表現到接近類別平均或好過類別平均。

唔同人有唔同性格,唔同強積金計劃就有唔同嘅風格。唔需要每一樣都攞滿分先做到男神女神嘅,你見到佢嘅優點,佢就係你嘅女神啦。

信安好似一個喺大機構工作左20年嘅員工,中規中矩,某啲地方好,某的地方差,但冇乜大過失亦都冇特別嘅亮點。

亦都似結左婚30年嘅老夫老妻,冇新嘅激情,但亦都唔會有大嘅爭拗,一切平平淡淡,中規中矩。

信安既基金表現未必比同類別好,但果計劃咁多隻基金,佢嘅多元化,就係佢最優勝嘅地方,剛才講過,4個類別嘅混合基金佢都有,真係喺強積金平台上比較少見。基本上你想買嘅比較大既基金類別,佢都有提供,噢,除咗歐洲股票類別,佢係冇歐洲股票基金嘅。

喺條片開始時,有同大家講過佢個計劃內係有彩蛋,咁彩蛋係咩呢?佢有兩隻基金係屬於保證基金類別嘅,一隻就係保證你嘅回報高於訂明儲蓄利率,個利率,現時係0.001%。另一隻保證基金就係信安長線保證基金,佢同一般保證基金唔同,一般嘅保證基金只會做一啲定期存款或買短期嘅債券,但信安呢隻長期保證基金,就會投資喺股票同埋債券市場,佢嘅基金說明書都有講到佢可投資股票最多至到55%。而佢所保證你嘅回報唔係剛才講嘅0.001%,而係佢保證你每年最少有1%作為回報。即係投資升時,可享有升幅,跌時就保你每年最少有1%。聽落係咪好着數呢,係2004年前佢既保證回報仲高達4%或5%。

呢隻咁特別嘅基金,只係得信安有。

同類型特性嘅基金,宏利都有,但宏利基金嘅保證回報都只係剛才講過嘅訂明儲蓄利率即係0.001%。

信安呢隻長線保證基金收嘅管理費都比一般基金嘅管理費貴,但保證係你提取時,你既年化回報唔會少過1%。而且唔單只65歲退休時會有回報保證,合資格嘅提早領取情況,都會有回報保證。基金介紹上就話長期來講,基金既回報應該會跑贏通脹,大家睇下圖,基金回報同香港通脹比較。2011年到2021年8月,佢嘅表現係贏唔到香港嘅通脹,但佢有1%回報嘅保證,回報點都好過放銀行啦。

因為隻基金有部份會投資喺股票入邊,所以佢嘅風險程度係屬於中等,而唔同一般嘅保證基金屬於低風險。

資訊就俾咗你啦,適唔適合你就要睇返自己嘅風險接受程度同埋個人需要啦,

同其他一般嘅保證基金一樣,佢對買出買入轉換都有特定要求,有機會嘅再同大家講啦。

最後記住like share,subscribe我哋,我哋就同大家繼續發掘多啲強積金嘅資訊俾大家。

下次見,拜拜

更多分析:

投資美股不可忽視的盈利季候風

股價有潛力倍翻的跨境電商股

尋找美股投資機會的3個好用方法

有倍升潛力成為Tesla 2.0的電動車股

有力倍升的消費信貸新星

出現買入機會的全方位金融科技股

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 44 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured