【MPF日本基金】港股廢,美股貴,現在要買日本基金?

港股廢,美股貴,所以要買日本?

近期投資界興起左一個講法,就係:美股貴,港股廢,咁買乜好?高追美股又驚,撈底中港仲怕,究竟買乜好呢?

日本股票市場好唔好? 日本個股票市場咁獨特,當然有佢自己既因素,但原來想係強積金度投資日本股市其實都唔係咁易。點解咁講?

係今條片我哋首先會講一講日本嘅經濟同埋股市情況,之後再同大家睇一睇如果想喺強積金度投資日本股市可以有咩選擇。

想了解日本嘅經濟,首先由佢嘅政壇開始講起。自從安倍因為健康理由喺舊年卸任首相之後,日本首相又換黎換去,一年多就換咗兩個,岸田文雄10月4日啱啱就接替咗菅義偉,出任第100任的首相,唔知佢今次可以做幾長了。

新上場嘅岸田文雄一直被視為溫和派,大家都預期佢會延續安倍的經濟同外交政策。

上任前佢對華就做到好強硬咁,至於到底係選舉策略做個樣出來睇下,定係施政理念,就要睇下佢之後點做啦。

現在全球嘅經濟都離不開同中國嘅貿易,日本都唔例外。

日本出年仲係中日邦交正常化50周年,相信都唔會主動搞垮同中國的關係。不過,中日的關係,好受中美關係的影響,好多情況都係睇美國頭,因為日本始終受制於日美安保條約。同埋日本都參與咗美日印澳(the quad)四邊機制,用黎抗衡中國。但抗衡就還抗衡,會唔會真係扯爛塊面又係另一回事。

新首相承諾推出幾十萬億日圓的經濟刺激計劃,令到市場對日本明年的經濟就相對樂觀,但唔好忘記舊年日本實質GDP倒退咗4.7%,所以現在市場估計今年會重拾增長,而明年估計增速會進一步加快。

現在睇經濟會唔會復甦,除咗睇GDP之外,仲要睇埋疫苗接種率。

日本目前已接種兩劑疫苗的人數佔總人口高逾60%,雖然對變種病毒的防禦似乎有限,但死亡個案較前兩波確診高峰期明顯回落。

今年早排日本舉辦奧運,全國好多人反對,佢哋話經濟咁差,大家都唔夠食,仲要畀咁多錢落去搞奧運?奧運就搞完啦,結果令疫情大反彈,直到九月底疫情舒緩後,東京先取消到緊急事態宣言,係七八月大家都冇得出外瘋狂消費,令到7月日本家庭消費按年僅微升0.7%。雖然係咁,但同舊年最悲觀的時期相比,經濟情況已經好咗好多,消費者信心指數由舊年谷底反彈咗好多,製造業同服務業PMI都持續回升。

日本股市好唔好,要睇公司賺唔賺到錢,日本既上市企業亦迎來盈利大反彈,好多企業自家預測2022年3月底止年度會有強勁增長。日本巨企多數都係國際性的企業,好似Toyota motor、Sony等等,好多間大家都耳熟能詳,佢地好多生意都來自海外,包括中國及美國等大國,環球性復甦對佢哋都有利,股價預先炒上,個別股份好似recruit同自動化傳感器Keyence預測PE有d都炒到40、50倍。

個別股票吵到癲咗,但整個市場,以MSCI Japan指數為例,條指數的預測PE就只有約14.8倍、明年會進一步降至13.9倍,呢個水平,話貴唔貴,話最平當然都唔係。

日本經濟自80年代以來迷失咗幾十年,少子化的問題都未解決。咁多年來換過咁多個首相,但真正幫到刺激經濟嘅唔多。日本嘅經濟迷失,股市就唔掂啦,但由2012年開始,日本股市出現咗轉機,點解呢?大家仲記唔記得安倍呀?

安倍係日本在位最長的首相,佢在任期間推出的三支箭,係咁放水,令日本低迷的股市自2012年走出一波大牛市。今年日本又換咗首相後,日本經濟股市會何去何從呢? 新嘅首相有冇吸收到安倍刺激經濟嘅功力?定係日本經濟又回復再度迷失呢?

大家有乜睇法?

日本股市會唔會又再次復甦,定係會再瞓過,就要過一段時間先知。但想喺強積金平台投資日本股市其實都有啲難度。因為經過今年八月之後,市面上強積金平台得返三隻日本股票基金。分別係東亞嘅集成信托計劃、中銀保誠簡易計劃,同埋宏利。所以只得用緊這3個供應商既朋友仔先有機會投資到日本股票mpf

年頭明明仲有4隻日本基金架,8月發生左乜事? 如果大家有留意開我哋channel既朋友,都知道今年8月時AIA將佢隻日本基金同佢隻亞洲基金合併左。

AIA誓都估唔知,佢隻日本基金無左之後,日本股市又再重拾升勢。行內人士都覺得AIA今次真係失策喇,無啦啦益左宏利。本來佢隻日本股票基金係同類內表現最好嘅,佢係一對一買入摩根既日本股票基金。今年七月底嘅三年五年表現都係排第一,只係2021年嘅表現比宏利過咗頭,所以排第二,唔知係咪因為自己就來俾人取消,所以表現差左呢。但今年8月佢就正式併咗入去亞洲股票基金。

現在香港股市,同美國股市都令人摸不着頭腦,唔知點算好嘅情況之下,開始有人睇不如投資喺日本股市。

AIA本來可以借助呢個難得嘅機會,吸引資金流入自己個計劃。就算人哋唔係想買日本股票,借呢個機會宣傳,吸引多D資金流入計劃都好。

但佢偏偏取消咗隻日本基金,變相宏利無啦啦做咗第一位,俾咗個位人地上。宏利就可以係日本故事上大做文章,宣傳一下,而AIA就錯失左呢個機會啦。

係投資方面

東亞既果隻日本基金同宏利或中銀保誠既唔同。宏利同中銀保誠都係採用主動式管理,佢哋揀股有唔同,由十大持倉都見到。東亞既日本基金雖然無話自己會被動投資,但由佢持倉見到,佢超過80%買入左一隻追蹤msci japan 既ETF,另外剩返既10幾%就買咗富達嘅日本股票基金。

持倉唔同,表現梗係唔同啦,

AIA退左場之後,得返3隻日本股票基金,睇過往表現見到,宏利既一枝獨秀。睇吓我哋畫出嚟嘅10年表現圖,大家就見到宏利隻基金嘅表現明顯比其他兩隻基金好。

收費方面

宏利嘅日本基金表現好,但收費就貴啲。

根據MPFA網站,東亞同埋中銀保誠既日本股票基金,收費相近,分別係1.68同1.69%

而宏利日本股票基金,收費就貴少少,1.8%。

日本股市係咪會一直表現好,定係新首相上任之後一切又照舊故態復萌呢?呢個就要再睇多一陣先知道。我哋都係想大家留意一下,除咗中港市場,美國市場之外,日本可能都會有啲機會㗎。

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 44 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured