【MPF炸彈】強積金65歲強制變年金?有無搞錯?

平地一聲雷,MPF 65歲強制變年金唔畀一筆過提取?! 唔係掛邊個提出的羅致光囉,佢現任勞工及福利局局長,真係語不驚人,死不休,咁大個炸彈炸落黎,肯定觸法全民反彈。當年佢拋出一句「當大家都120歲時,60歲啱啱是中年」,已令到群情湧,被標籤「涼薄。今次又係點?

到底發生緊乜事我地要先由年金開始講起,大家知道年金係點運作嗎以香港政府的年金公司為例,你一筆過畀一大舊錢年金公司,專業術語就係「整付保費」,例如100萬咁啦,然後到咗一個歲數,SAY 65歲,年金公司就會每月畀番錢你,假設每月畀番5800蚊你咁(實際情況要睇番個別保單條款,年金男女每月收的都不同,大家可以係香港年金網https://www.hkmca.hk/hkmcaphp/php/calculator_web_tc.php,輸入年齡性別整付金額,就可以得出每月金額),直到人生GAME OVER為止。咁D人就會計,咁我要幾長命先回到本我地就係想同你講,如果大家投資回報夠高的話,你幾長命都回唔到本,點解咁講下面就詳細講你知。

如果夠長命,每個月一路攞錢攞落去,攞足15年,就差唔多已經攞番晒你的本金100萬,所以一般簡單咁講,男性到80歲就打和,女到81.5歲。不過,當然呢條數係未計呢100萬元,係呢15年的複合增長的回報,而呢部份可以係非常壯觀的,如果以每年回報4.9%(4.9%就係呢廿年強積金平均年回報),扣除每年提取6.96萬元,咁15年落黎,個100萬應該搣55萬左右,繼續搣落去的話,可以支持到第26年,先會用晒。即係由65歲開始,如果你無買年金,而係揸住100萬元自己投資,但每年照洗6.96萬元,加上投資年回報4.9%的話,係可以支持到你去到約90歲。而我地講緊的回報只係4.9%。如果回報做到7%因為派錢時無蠶食到本金,所以,個本金只會不斷滾大,就算你活到120歲,你個戶口仲會剩番124萬元,多過個本金架。所以,如果投資有道,買年金係唔係值得呢見仁見智啦。當然對於唔識投資的人,年金可能係一種方式,保障佢地未來的生活。但要注意的係,由於每月派發的金額,係保單開始時已經訂明,係有生之年都維持不變,所以年金,最怕就係通脹。如果20年後,一個叉雞飯升到100蚊,你個5800蚊,又食到幾餐飯呢?

另一個情況呢,如果唔夠長命呢咁又會點香港年金公司係會保證,受保人收取的累積每月金額,唔少過已繳保費的105%以,如果未攞夠105萬元,就瓜咗,佢會賠番個差額畀你。所以,D產品,點先最着數就係一交完保費就瓜咗,佢就一次過賠105萬元囉,無啦啦賺5%,但無命享,留番畀子孫。呢D情況無人想發生啦。如果攞咗10年先瓜,因為佢無計呢10年的回報複式效應畀你,所以佢只會賠你105萬減去已派發的69.6萬元,即係剩番35.4萬元,D利息就佢賺晒囉。

所以一句講晒,買年金,係唔識投資的人,或者投資回報COVER唔到每月洗費的人。如果做到投資回報超過每月洗費,買年金係賠本的行為。所以,當全部人都買年金的話,似乎就係投資好的補貼投資差的,短命的補貼長命的囉。

鑑於大部份人都唔將投資回報考慮在內,或者輕視咗呢部份,而年金公司攞咗大家畢錢,就承擔咗投資的風險囉。而政府機構,投資回報會係點就係好難講。如果政府的年回報夠高,咁佢集合晒大家的資金,都還好,個本可以愈滾愈大,支持到佢想要的老人福利開支,但如果佢回報好差,咁就大家自求多福了。

好,講番今日正題,依家個智商160的局長,就吼實強積金成1億元的資金池,打算唔理大家願唔願意,就強制MPF65歲時轉晒年金,唔畀你一次過攞出黎用。咁你儲到咁多錢,本來到65歲想攞出黎幫仔女供下樓呀、裝修間屋、供子孫創業讀書呀,或者去環遊世界,到其他地方居住旅行,甚至做D一大筆的投資,都唔洗旨意了,你的人生就少咗好多可能性了。點解要咁做根據智商160局長的理據係,大家一筆過攞咗強積金之後唔敢洗錢,因為唔係個個月有糧出,會影響消費同經濟喎。

 智商160的局長,今次擺明落mpfa面,因為成行都做緊退休後產品,如:宏利隻派息,都係比人退休後繼續投資,如果突然迫人入晒年金,咁mpfa既計劃都亂晒,呢退休收息產品,都係個個月派錢,不過唔係派到瓜個日啫。其實佢地有無溝通呢?

而且,你有張良計,人地有過梯呀,MPF超級大戶,會唔會任你劏呢佢地咁有錢,隨時可以移民黎提早領取啦,只要唔用BNO去英國,正正式式申請移民,咁你又無藉口唔畀人提早領取啦。剩番D細額的戶口係度,畀你劏。難怪,大家對MPF漠不關心啦,到時D錢都阿公咗,夠窮就等攞福利,夠有錢就早走早着,唔係咁樣,可以點樣。

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 50 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured