【MPF醫務室】美股強積金

好多朋友睇完我哋上次條片講被動型美國股票基金之後,都私底下問我哋,不如你話我知,四隻美股被動型基金入邊,究竟邊隻好呢?或者講我知究竟11隻美股基金入面邊隻好啦。

講得俾你聽不如講晒比所有人聽啦,咁今集我哋除左同大家講邊隻美股強積金好之外,仲會同大家一圖勝萬言,一圖秒懂睇通美股強積金。

經濟有周期,板塊會輪動

無一個股票板塊係可以只升唔跌,都無一個投資風格係永遠跑輸既。唔單止行業板塊,投資風格都會有起有跌,時贏時輸。

係講邊隻美股基金好之前,因為跟住落嚟所講嘅會比較敏感,所以係呢個時候我哋要講一講disclaimer,免責聲明先:

以下所講嘅內容,只作資料分享之用,純粹個人意見,並不構成任何投資建議。

以下所提及嘅數據同情況,只作一般性的論述,並不針對個別人士或情況。

各位朋友應當按自己嘅情況,能接受風險及能力,自行判斷或尋求專業人士嘅意見,投資適合的基金。

講完免責聲明,開始入主題啦。

我哋都知道去年或者係今年年頭,好多人都因為比美股嘅升幅吸引咗,而將自己嘅強積金轉左去美國股票基金。

如果你係有轉去,唔理你買咗邊一隻美國基金,你最近有錢賺嘅就恭喜你,如果你買嘅基金最近表現唔係咁好,你亦都唔使驚,因為我哋就係想同你講,買基金係中長線既投資,都係要睇長遠少少嘅,唔好因為佢幾個月表現唔及同類表現,又想轉走。

上次講過係強積金平台上美國股票基金一共有11隻,其中四隻屬於被動型投資,即唔會主動透過揀股來爭取高於指數嘅表現。佢哋都係指數基金或只投資於指數基金既基金。

除咗4隻被動型基金之外,其他7隻就係主動型嘅基金。咁呢11隻當中,吸金能力最強,資產總值最大嘅就係宏利,第二大嘅就係匯豐北美股票基金跟住就係友邦既北美基金,最細嘅係東亞。但近期最多人買左,吸金吸得最快既係MASS萬全既美股基金。

萬全隻美股基金我哋之前有片講過,佢嘅投資風格係注重增長,大家可能會見到佢今年既表現唔係咁好,係同類別中排名好低。當中嘅原因牽涉比較複雜嘅投資風格轉移。而今年年初至今嘅表現,強勢既股票唔再係集中喺增長風格類別既股票。

所以萬金雖然都係投資喺美國市場,但係佢升幅比較慢,如果朋友係舊年年尾或者今年年初見到升得好勁追咗入去嘅有冇喺度呻笨呢?

係呻笨之前大家又諗返我哋個投資真言,

經濟有週期,風格會輪動,咁大家明白未啊?大家可以諗吓增長風格既股票,譬如科技類既股票,會唔會一直都唔增長呢,或者增長比其他類別慢呢,如果你覺得這個風格嘅股票之後都會再上升嘅,現在未開車,會唔會就係上車追落後嘅時機呢?

咁即係呢隻注重增長風格嘅美股基金好唔好呢?哎,有啲嘢唔使講到好出面既,俾啲數你睇啦。大家睇一睇張圖,就可以明白點樣一圖

了解美股強積金,秒懂每隻美股基金特性。

喺圖中可以見到嘅就係萬全基金同埋同類11隻基金嘅排名,接近100就代表佢係嗰年排第一,零就代表佢係嗰年排第尾。喺圖中我哋見到由2013年開始萬全嘅美股基金從來都同人哋唔一樣,佢一係就喺嗰年排第一,一係就係嗰年排第尾,即係話佢既投資風格,令佢天生係同人哋唔同。佢嘅基金回報,除咗係一般美股市場嘅回報之外仲加上佢自己獨有嘅投資風格回報。睇返2013年到而家,大家睇到佢排第一多定排第尾多呢?

有時買左佢,佢又升得慢,但見隔離隻美股基金升得好犀利,這種葡萄心情,我哋好明白。

所以揀基金除咗要問隻基金好唔好之外,仲要問隻基金適唔適合你。所謂適唔適合係在乎你心態上能唔能夠適應。佢嘅波動有幾大,買之前要有心理準備,唔好一見佢唔掂就走,好可能就會錯過左之後既升幅呀。

大家又睇一睇萬全係今年頭六個月內每個月嘅類別排名。

佢嘅表現點樣同其他美股基金嘅表現唔同,睇返今年每個月嘅回報就見到啦。年初頭三個月佢全部都係落後於同類別,喺類別中排最尾嘅,四月排咗一次第一,五月又排最尾,6月再排第一。至於你覺得佢往後會係繼續排第一定排第尾呢個就係你自己嘅決定,我哋只不過想指出,佢係同類別內嘅波動性一直以來都係好大嘅。你喺投資佢時就要清楚佢呢個波動嘅風格。

萬全嘅美股基金波動性好大啦,但係在波動排行榜嘅另一邊就係中銀保誠隻指數基金啦,大家係圖可以見到,由2013-2020年每一年嚟睇,中銀保誠隻指數基金從來冇排過第一,亦都冇排過第尾,佢喺中間有時排前啲,有時排後啲。因為佢係一隻指數基金,所以你買佢就係想買美國股票市場,而唔牽涉任何嘅投資風格或基金經理嘅揀股能力。

個情況有啲似你同朋友一齊去譚仔食米線,你朋友就叫咗個清湯米線,而你就叫左個鴨血10小辣,仲加「畜生墨硯」。望住你朋友既選擇可能你會覺得好dry,但佢會答你佢只係想食個米線。你鍾意食辣你食得辣嘅,你咪可以食你個10小辣囉,你朋友想簡簡單單食個米線,要完全走辣,都係個人選擇。

你朋友想穩穩陣陣,只係投資喺美國股票市場上,佢就可以投資係比較被動既基金。

你承受到上下波動嘅風險,你咪可以賺取美國股票市場嘅整體回報,仲喺風格轉移中賺更加多嘅回報。

宏利北美基金

如果萬全嘅美股基金係鴨血10小辣,咁宏利嘅北美股票基金都應該係有七小辣。

大家睇到又可以見到佢座頭類別嘅排名,雖然佢冇萬全咁激,一係第一,一係第尾,但係佢都係比較極端嘅,唔會中庸之道。因為如果大家研究佢嘅基金持倉同埋行業分布都會發現其實佢偏重於科技類股份比較多,所以就會有出現呢個比一般美股基金較為波動嘅情況。正如剛才同大家所講,就係基金自己嘅投資風格,同埋團隊嘅揀股能力,令到這隻基金回報除了有市場回報外,仲有這基金獨有的特性回報。

睇到呢度,可能大家又會問,基金嘅投資風格或選股能力,會令佢喺個類別排名內上下波動,咁會唔會有一啲基金長期都係喺近榜尾排?我哋又畀個一圖秒懂基金特性圖比你睇啦。

信安800系列內嘅美國股票基金,近幾年係同類別的排名都係比較低嘅位置,雖然係咁,如果你想投資美國市場,但又唔想行過隔離舖的話,佢話晒都係一隻美股基金,佢嘅回報都會同美國市場相近嘅。

另外,上次我哋就同大家講過AIA嘅嗰隻美洲基金,佢係投資係指數基金,AIA計劃內仲有另一隻北美基金,北美基金近幾年排名都唔係咁好,但今年就好返啲啦。正如我哋剛才所講嘅投資真言,經濟有周期,風格會輪動,AIA隻北美基金,等咗幾年,終於到佢排前左,之後會點,大家又自己諗吓啦。

今年年頭表現好咗嘅仲有匯豐隻北美基金,大家可以見到北美基金係今年嘅排名係近年來排得最前,表現最好嘅。正如我哋上一條片同大家講過匯豐嘅北美基金同佢隻自選基金係近年表現越嚟越似,隻北美基金係咪因為似左自選基金,所以表現勁左?咁我哋就唔知啦。反而長線來睇,匯豐隻自選基金喺類別排名中,長期表現就比北美基金好。

今日就同大家講咗經濟有周期,板塊會輪動呢個頭號真言,仲同大家睇咗一圖勝萬言,大家有冇即刻秒懂咁多隻美股基金呢?

好喇,今日就講到呢度啦,大家有乜想知,可以留言話畀我地聽。記得like、share、subscribe埋我地呀。多謝收看,下次見。

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 76 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured