【MPF基金擂台】5個創新指標 論盡基金好壞

強積金,點揀好?唔識揀,邊隻好。

作為一個打工仔,每個月都要供強積金,究竟點樣揀個強積金組合好?

應該跟投資公司既品牌嚟揀?定係按基金既過往表現來揀呢?

其實揀基金類別重要啲?還是揀個別王牌基金好?

我估好多人同我一樣,可以一口氣數晒mirror內12個成員出來,仲充分了解每個成員最近有乜嘢新聞,但就講唔出頭五大MPF供應商係邊幾間。同一個基金類別往往有10幾隻基金,每隻基金名都又長又撟口,唔係真係會記得呀!

以上情況非常普遍。係呢個時候你需要嘅就係基金擂台。

從來文無第一、武無第二。上得擂台就唔好怯,怯,你就輸一世。基金擂台都係一樣,上得來既當然係份量十足既基金啦,但基金擂台上點定輸贏呢?唔通真係好似一代宗師所講:一直一橫,錯嘅,訓低囉,企得翻喺度嘅先係啱晒。

基金擂台係咪就係睇不同基金既往續表現?如果係嘅話,仲點叫基金擂台呀,叫返做回報排行榜啦!

要知道喺投資世界入面,想知道一隻基金好唔好,只係睇基金表現並唔足夠。一隻基金嘅表現,除左取決於佢自身管理團隊嘅能力表現外,都取決於外在環境因素所引致。正如升市個個都係股神,真正到咗潮退,我哋先知道邊個係有着泳褲。我哋會拆解一隻基金上升或下跌既原因,佢嘅升幅係因為佢所投資嘅地區普遍上升?定係佢有獨特嘅投資技術呢!而佢既投資入面會唔會牽涉左一啲不必要嘅風險,令到佢喺一段時段內贏到同類,但過後往往係會輸返轉頭呢。

大家係Mpfa嘅網站上,都見到有基金既好多唔同既資料,例如強積金基金嘅推出日期,基金規模,風險級別,開支比例,唔同年期嘅回報等等。望住呢對資料,大家可能覺得最重要嘅梗係睇吓過往嘅表現回報啦,一般都會唔理乜嘢原因,表現好就係贏,贏就係贏, 輸就係輸。但如果真係咁簡單嘅話,咁仲要研究嚟做乜嘢呢,只係睇過往表現追逐住過往嘅王者就得啦。

我哋基金擂台,會用新穎嘅角度,專業嘅方法,用5個創新嘅基金能力值來作出基金對決。呢五個能力值係點樣樣得出嚟呢?講得出創新,就梗係唔會係其他網上抄出來咁簡單啦。一隻基金要贏得出基金擂台,係要喺各方面都要比對手優勝,技術性擊倒對手。

攻擊力、防禦力、移動力、魔法值、獨特性。我哋用依5種能力值去衡量每隻基金。至於每個能力值係代表乜,點樣理解。係擂台正式開始前,上擂台前大家都要理解一下條例、準則。

今集我哋就會同大家講下呢5種能力值係乜,用埋例子,等大家充分了解點樣多角度睇一隻基金既好壞。

首先講一講最容易理解嘅攻擊力

攻擊力

攻擊力,即係隻基金係上升時期嘅升幅。要注意既係,我哋係睇隻基金上升既時段內,基金升幅是多少。一般來講,基金嘅升幅會取決於佢屬於嘅基金類別,即係佢會投資係啲乜嘢。大家都知道,股票基金,混合基金,債券基金,升幅可以好唔同。

正如在任何設定下 三國遊戲中張飛的攻擊力一定比負責內政謀略既孫乾高,戰士的攻擊力一定比弓箭手高,所以股票基金的攻擊力會比債券基金的高。

要比較攻擊力,公平點的做法是拿同類型基金來比較。我哋可以研究匯豐既北美股票基金的攻擊力高,還是我的中國基金的攻擊力高。

兩者屬於唔同類別嘅股票基金,所以佢哋攻擊力嘅分別,會由所投資嘅唔同嘅市場所引起,亦都會由自身嘅投資技術所引起。如果我哋比較嘅係同一個基金類別,投資喺同一個市場內嘅基金,咁兩者嘅攻擊力差別就會純粹由佢哋自身嘅投資方式同投資風格所引起。

講開大中華股票基金,大家仲記唔記得舊年大中華整體市場都做得唔錯,所以整體嘅大中華基金都表現得幾好。中銀保誠既我的中國基金同埋萬全嘅大中華股票基金都係一對一買入摩根宜安嘅大中華股票基金,係2020年內,我的中國股票基金以及萬全大中華股票基金嘅表現都超過51%,而同年富時強積金大中華指數嘅回報為19.9%。

2020年嘅回報咁強勁,仲係成個強積金平台上回報最強嘅基金,所以可以想像到呢隻基金嘅攻擊力指數一定好強,堪稱一代戰神。但2021年嘅表現又點呢?

今年年初到五月底,富時強積金大中華指數回報為10.20%,我的中國基金為10.39%。啱啱贏過指數,截至4月底時,指數升9.1%,我的中國基金升8.69%,點解今年回報又會咁樣?

唔通戰神雄風不再?

所以我哋唔可以只係睇過往表現,因為今次呢隻基金唔及指數表現,就唔關戰鬥力問題,而係關佢嘅防禦力問題。因為細心睇,中間有段時期係相關市場下跌嘅,市場跌時,佢跌得多,就係防禦力嘅問題。咁乜嘢係防禦力呀?

防禦力

防禦力係指喺基金下跌時,基金嘅跌幅會有多大呢?如果佢嘅跌幅係比其他基金為細,咁即係這隻基金嘅防禦力比其他基金為大。既然防禦力係用基金表現下跌時,佢嘅跌幅多少來衡量,咁大家都可以想像到邊類基金係防禦能力強嘅基金,而絕對防禦又係邊類呢?

最強絕對防禦

可以想像到防禦力最強嘅絕對防禦嘅基金,一定係保證基金啦,防禦值達100,但要一定要求先符合觸發條件,先有保證回報既最強防禦。

保守基金既防禦力都好高,之前我哋有片都同大家講過。

講返摩根宜安大中華股票基金,點解我哋剛才講話今年佢同指數嘅表現,係要用佢嘅防禦力來理解呢?

大家係呢幅圖可以見到,係今年初,係升市時候我的中國基金嘅升幅係比相對應嘅指數多,但係喺跌市嘅時候,即係圖入邊今年三月期間佢既跌幅,亦都較相對應的指數為多。之後三到五月,雖然佢嘅升幅比相對指數較大,但因為之前跌幅較大,所以要追番之前嘅跌幅。

由此可見攻擊力強勁雖然重要,但防守力亦都不容忽視啦。如果唔係雖然升市時贏好多,但市場下跌時該基金都會跌得比相關指數多。

講完攻擊力,又講完防禦力,咁我哋又講一講吓第三樣能力值,就係移動力了。

移動力

移動力,基金就唔識得走來走去㗎,基金嘅移動力係指咩呢?基金既移動力係指佢轉倉嘅能力,一隻基金佢投資嘅股票或債券成日轉來轉去唔一定好,但都唔可以不停投資係同一堆股票上邊。喺強積金嘅世界入邊,如果你有睇開我哋啲片,就會知道佢分開供款人可以買嘅強積金基金叫做成份基金,同埋成份基金買入嘅底層基金,而底層基金在做股票或債券嘅投資。當然亦都有情況係成份基金會直接買入股票或債券,但呢種情況都係比較少數。

我哋喺度所講嘅移動力,所謂移動力就係成份基金有幾大自由度可以轉換佢買入嘅底層基金,同埋佢底層基金嘅持倉會唔會因為唔同市況去作出調整。即係上層同下層嘅移動力我哋都會考慮㗎。

好似供款人買入嘅強積金基金,成份基金,如果佢喺基金說明書入邊寫明係買入邊一隻底層基金,咁樣佢可以轉換底層基金嘅靈活性就會降低,因為每一次轉換,都需要修改基金說明書,就需要積金局審批,需要嘅時間要數月以至年計。但如果成份基金嘅投資係買入多隻底層基金,而沒有既定規範買入邊隻同埋買入幾多嘅話,例如採取多元經理投資,咁對底層基金嘅轉換就可以非常靈活。標榜多元經理投資嘅其中一個例子係永明嘅彩虹計劃佢計劃內大部份嘅基金都係採取多元經理投資,即係買入多隻底層基金,而唔需要事先得到積金局嘅審批。另外底層嘅基金佢會唔會因為唔同市況要轉換投資嘅股票或債券,我哋都會考慮。

講完攻擊力、防守力、移動力,之下兩項係比較獨特嘅能力,雖然都重要,但唔係每隻基金都有嘅。所以係整體評分來講佢嘅佔比都會比較細。另外兩項能力值就係魔法力同埋特殊能力啦。

魔法力

乜嘢叫魔法能力啊,就係隻基金做到一啲有魔法效果,估你唔到嘅情況,即係一般同類基金好少做或唔會做嘅嘢,我哋之前有片都有講過,好似富達隻港股基金,喺其他港股基金仲未廣泛應用買入A股時,係佢嘅十大持倉中已經出現咗A股嘅茅台了。咁估你唔到嘅仲唔係魔法攻擊?

另外AIA隻美洲基金都有佢嘅魔法能力,就係佢個名叫美洲基金但係會買入投資於南美市場嘅ETF,但我哋有片都有討論過,佢喺公布嘅重組文件中有提及,喺重組之後投資範圍中沒有再寫上會投資於南美市場,所以我哋相信可能佢之後就唔會再投資於南美市場,減少左呢方面嘅魔法能力了。咁當然啦佢有魔法攻擊能力同呢個能力有冇效就係另一回事。

特殊能力

特殊能力係指嗰隻基金買入嘅底層基金,投資主題上或者投資風格上邊有無可取替嘅地方。如果基金投資的底層基金,是市場上唯一的,只得佢買入,那麼這隻基金嘅特殊能力值就好高啦。

用返成日提及嘅我的中國基金作為例子,剛才有講過佢的底層基金是一對一買入摩根宜安大中華股票基金,但是萬全都係一對一買入摩根隻基金,所以我的中國基金的獨特性就相對地比較低了。

我哋之前唔同嘅片都有講過好多供款人買到嘅成份基金其實都係買入同一隻底層基金,但又收取唔同嘅費用。所以特殊能力極高嘅基金唔多。

但有一個供應商佢底下嘅基金好多都有好高嘅特殊能力值。點解呢?因為特殊能力其中一樣取決於基金嘅投資主題,宏利有幾隻基金投資主題比較特別,好似宏利隻醫護基金,特殊能力值就達到100。

其實宏利好多隻基金都有好高嘅魔法力同埋特殊能力。好似宏利嘅退休收益基金同埋利息基金,都有非常高嘅魔法力,同埋特殊能力,佢嘅主題夠獨特,又做到一啲其他基金做唔到嘅嘢,所以兩方面嘅能力值都好高。呢兩隻基金其實都關乎供應商對強積金退休後投資既市場佈局,絕對係業內近期專門嘅研究方向,遲啲我哋再同大家講吓啦。

另外投資風格都會影響佢嘅特殊能力值。一隻基金嘅投資風格上,如果佢嘅持倉,行業分布,等都同指數好相近嘅話,這樣的話,他就完全沒有獨特性了。如果該基金的投資主題,投資目標和方向是市場上唯一的,那麼他就有他的獨特性。

今次一口氣同大家講晒五種能力值,相信大家多多少少都理解到。下次我哋就同大家真正舉辦基金擂台,等兩隻基金喺剛才所講嘅五個能力值上作出比拼,睇吓邊個最後勝出。

大家有無邊兩隻基金想我地先黎打次擂台?可以係下面留言,或者email我地。大家如果有乜其他意見,希望盡情分享,記得like, share同subscribe咗我地先啦,下次見,bye bye

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 34 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured