4月份資金流

凡事都有2面去睇,近排我睇個股市或者債市報價,我都只見到404呢組數字,係代表個市會好似組合error咁熱血?定係話個市出左error呢?

以為個市一直跌落去無底深淵,但佢又反彈。以為咁多個資產一齊死,佢又風水輪流轉,資源、金銀齊齊抽升。沈寂多年既末日博士Nouriel Roubini最近開始頻繁曝光,咁會唔會係末日先兆?係人心虛怯的當下,大叫幾聲狼來了,到真係有狼時,又係咪走得切呢?

個個跟左契媽大叫上錯契,如果佢叫你堅持你又制唔制?

擔心就免不了,滯脹的擔憂亦都滿天飛。乜係滯脹?即係低增長甚至負增長、高通脹的情況。如果真係咁既情況,大家生活就仲慘過爆丸呀!

唔好講到咁遠啦,係咁既市況下,究竟係惟快不破,定係要堅持,堅持自己所相信既野呢?我哋又睇下係4月份,大家既強積金有乜類別係快手轉走,又有邊類別係長期持有。

之前我地有兩集,同大家分享咗由舊年6月底到今年3月底,個別基金同各個類別基金的資金流情況,時間上涵蓋咗9個月,想畀大家睇下個趨勢。有網友睇完話仲想睇埋短少少的資金流情況,咁我地今次嘗試縮短個時期,畀大家睇睇近期資金的操作去向。

我地從資金流變動,可以見到幾個現象。第一係美股類別四月份明顯係有資金流番入去撈底博反彈;第二係大中華股票基金同亞洲股票基金,無論係過去4個月定過去一個月都持續有較多的資金流入;第三係4月份有較多資金從保守、保證基金流出;第四係香港追踪指數的基金,無論係過去4個月定過去一個月,都係持續走資。

早排我地同大家匯報咗MPF首4個月的基金表現,經歷咗大起大跌後,最後又係美股跑出。1-4月,美股類別的基金平均回報大升10.79%! 而單單4月份一個月,美股類別就升咗5.43%,又係一支獨秀。1-4月係有板塊的輪動,升得多的已唔係重倉科技類的基金,而係重倉銀行、巴郡等傳統藍籌的基金。

咁美股類別的資金流情況又係點呢? 1-4月流入咗22億元,排類別第5,第一大淨流入的類別係大中華股票基金,第二大淨流入係亞洲股票基金,而係4月份單月美股基金類別就淨流入咗14.8億元資金,就變咗咁多類別之冠呀。四月份,大家都知,係美股反彈的月份,一路彈D資金就一路流入去博反彈。

另外,我地明顯見到,有資金從保守、保證基金流出,頭四個月合共流出14.6億元,單係四月份就流出近12.3億元,單月流出的金額更係冠絕咁多類別。似乎四月份的反彈浪,吸引到唔少資金由保守保證類轉番去股票度。不過,大家都知,四月份雖然係彈咗,但一踏入五月,環球股市又洗過。

至於香港追踪指數的基金,我地上條片都同大家講過,今年首季走資最多的就係香港追踪指數基金,走咗近18億元,四月又再走資,完全停不了,香港真係咁悲觀到資金要係咁撤離嗎? 大中華同中國都有資金流入呀,而香港呢?背靠中國既優勢呢? 定係實際上2頭唔到岸呀?

咁我地睇一睇主動型的香港股票基金,又係點先下結論啦~ 噢,原來係有資金淨流入架,無論係過去4個月定係4月份單月,都有資金淨流入呀,原來係大家唔愛指數基金,愛上了主動型基金了呢。咁都啱既,好似恒指成份股隻美團,就正如我地之前講過,恒指服務公司係佢升到咁高估值先黎將佢納入恒指,依家就面對緊高估值回調的風險,而被剔出的太古,今年反彈就相當唔錯,都咪話唔令大家對指數基金失信心。

不過,要注意主動型長線未必就無問題,過去很多主動型基金大部份時間都係跑輸指數基金的,這點反映了主動型基金亦有其問題的架,例如一直為人詬病的高收費,另外,因為係由基金經理人為操盤,只要係涉及人的決策,各種不理性的情緒如恐懼、貪婪、過度自信、妒忌等作祟,往往就係因為咁而傷害咗投資的回報。

不過,如果我地將主動型同被動型的港股基金,合併埋一齊睇架話,雖然4月份有2億元淨流入番,但1-4月都係淨流出,走咗約4億元,所以,資金似乎都不太愛香港了。

另外,我地見到歐洲股票基金,四月份單月的淨流入係加大咗的,1-4月流入咗約3.5億元,而單4月已淨流入逾3.4億元,即大部份淨流入係發生係4月份架囉。而歐洲股票基金的類別平均表現係點? 4月份彈咗3.75%,係咁多類別中排第四,而1- 4月更大漲了8.9%,僅次於榜首的美股基金。

至於亞洲股票基金就相反了,1-4月大幅淨流入41億元,但單4月只淨流入8.5萬元,4月份單月明顯放慢咗少少了,比呢四個月的每月淨流入的平均數10.4億元低。而大中華基金亦有同樣情形,1-4月大幅淨流入60億元,但單4月只淨流入9.6萬元,比呢四個月的每月淨流入的平均數15億元低。所以,可以見到,亞洲同大中華股票基金,雖然仍吸引着較大額的資金流入,但力度沒有之前咁瘋狂。

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 33 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured