【MPF成績表篇】1月至4月邊類基金係重災區? 邊d係大贏家?

 

2021年不知不覺轉眼就到左5月喇,頭4個月大家都逐漸恢復番正常返工。科技發展令到大家對打8號風球等於放假、放假等於唔洗開會依個常規有咗重新既認識。有啲公司既職員可以開緊會都行山,有啲就放假行山都要開會。晚飯時段食肆又再次多人,一班朋友一齊食飯,你鍾意嘟手機,佢鍾意寫紙仔,大家又夾下應該坐ABC邊區。新常態下,大家努力搵返新平衡。個投資金融市場都係一樣,新常態下,投資風格,行業板塊輪流轉動,轉得快過摩天輪。

今年頭四個月,股市又係大起大落,只要有涉足投資,就免不了要經歷呢D令人膽戰心驚、風雲色變的大日子,一年總有幾次調整,每幾年又總有幾次更大的調整。當你以為你掌握到佢調整周期想預先避一避?佢就一飛沖天,一去無回頭。

股市總非一帆風順,中間的波動隨時令心靈脆弱的玩家投降。所以,投資往往又同心理學扯上關係。

就好似你約左好耐無見既朋友出街晚飯聚舊,除晒口罩準備起筷時,突然隔離枱狂咳,就算最後無事,當下個心都離一離。

股市、債券市場係過去4個月都驚到大家個心都跳左上喉嚨,大家又估唔估到,呢四個月,CHOK完一大輪後,到底揸住乜先係贏家?

如果按類別平均黎講,1-4月,表現最好的係外圍,美國股票基金排第一,平均升咗10.8%;歐洲股票基金排第二,平均升咗8.9%,環球股票基金排第三,平均升咗8.6%;之後就到其他股票基金,升咗7%;跟住就係亞太區(日本除外)股票基金,升咗6.6%;之後就係亞洲(日本除外)股票基金,升咗6.3%。外圍除咗日本外,美國、歐洲、亞洲,度度表現都好過中港,對於有本土情意結的人,呢個真係唔係好消息。

大家舊年成日聽到係榜首的中國及大中華股票基金,類別表現就落到第8位,只升4.5%。而香港股票基金就排到第10位,升4.3%;懶人基金的成份基金CAF都升咗4.2%,排第11。

過去4個月表現,美國股票基金類別係咁多基金類別中排頭位。而呢個類別入面,又係邊隻基金最勁,帶動呢個類別排到上頭位呢?

「知否世事常變,變幻才是永恆」依句說話唔知大家有無聽過?

對於邊個帶動美股類排上頭位,今次大家一定係跌晒眼鏡,好難會估到,因為已經唔係舊年表現得好火爆個d基金了。等我開估啦,就係恒生同匯豐的ST Plus-ValueChoice US Equity(自選美國股票基金),1-4月大升12.19%,真係風水輪流轉呀。至於舊年表現好好的mass隻美股基金,就只係升得4.56%,排到美股基金的榜尾,頭尾兩隻相差咗成7.6%。

恒生同匯豐隻自選美國股票基金,到底買咗乜野咁鬼勁,我地睇番佢舊年底的十大持倉,有好幾隻股票,今年都創咗新高呀,例如第二大持倉microsoft,今年4月下旬就一度升到上260蚊樓上,第四大持倉Alphabet、第五大持倉Facebook、第七大持倉Berkshire Hathaway、第九大持倉JPMorgan Chase、第十大持倉Visa,全部都屢創新高。睇番mass隻美股基金的十大持倉,就無Facebook、Berkshire Hathaway同JPMorgan Chase呢D近期表現比較好的股票了,而Alphabet佢雖然有,但就只得1.99%,比重亦比恒生匯豐的3.2%低。

匯豐隻自選美國股票基金嘅投資目標,入邊有講佢會偏向考慮投資喺指數基金內,咁可能就因為佢投資得比較多在指數基金,人為因素比較少,反而幫左提升佢表現。

不論什麼原因令到恒生同匯豐隻自選美國股票基金係1-4月表現咁強勁,但這隻基金今次就真係威到盡,係1-4月,佢除咗係類別表現最勁個隻,仲要係mpf市場上全部400幾隻基金當中,表現最好個隻添。呢隻基金,過去表現一直都係中上水平,推出咗無耐之後,2014年就攞過類別冠軍,2020年佢升得16.7%,而mass美股基金就升咗43.08%。恒生同匯豐隻自選美國股票基金之前就重組過,所以係MPFA網站就變咗2019年先成立,但如果我地唔理佢重組過,睇番2016年至5月1日至今年4月30日的五年累計表現的話,mass美股基金就仲係領先,升咗154%,而恒生同匯豐隻自選美國股票基金就升咗106.9%。

至於類別第二名的歐洲股票基金,相信大家就會容易D估到係邊隻第一名了,有睇開我地的Channel,就知邊個供應商的歐洲基金係類別表現一向比較好的,就係宏利啦,佢就歐洲股票基金繼續帶頭,1-4月升咗12%,未睇過我地講宏利歐洲條片的大家,可以click入右上角條link睇番,咁你就知佢有乜咁勁啦。至於呢個類別中,排第二名、同第三名的今次都追到好貼呀,分別係AMTD Invesco Europe同AIA MPF – PVC European Equity,兩隻都升咗超過11%,而歐洲類別包尾的就係Mass MPF European Equity,只升咗5.35%。

Mass失意係美國同歐洲類別,但就係環球股票類別度,贏番場。Mass MPF Global Equity 1-4月升咗11.43%,領先排第二的BCT (Industry) Global Equity Fund的11.38%,同埋第三的恒生、匯豐的ST Plus-Global Equity的10.84%。呢個類別包尾的就係海通隻環球分散基金,只微升1.98%。海通隻環球分散基金其實唔多分散,我地之前有片講過,佢日本舊年底揸到43%,可能因為咁,先令到佢的表現,大幅落後其他環球股票基金。

1-4月,邊類基金係重災區? 表現最差係環球債券基金,平均跌咗3.49%,緊隨其後就係亞洲債券基金,跌咗2.4%。有成8隻環球債券基金都跌咗超過4%,包括My Choice Global Bond、恒生匯豐的ST Plus-Global Bond、Principal Simple Plan-Dynamic Global Bond、BEA (VS) Global Bond、Principal Smart Plan-Dynamic Global Bond、Fidelity RMT-World Bond同埋Schroder MPF Global Fixed Income Portfolio Fund。而亞洲債券基金最差個隻就係AIA MPF – PVC Asian Bond,跌咗3.08%。

咁有無邊個類別,平均回報係升的,但入面的基金就有d係跌架呢? 有呀有呀! 買中呢d就最黑仔了,1-4月,中國及大中華股票基金類別平均升咗4.51%,但恒生匯豐的ST Plus-Chinese Equity,就跌咗1.44%。日股基金類別的平均回報係+1.6%,但AIA MPF – PVC Japan Equity,就跌咗1.07%,都唔知係唔係隻基金就摺埋,無心戀戰,定係咁啱遇上佢的周期低位。

今年1-4月,個市咁波動,但進取基金清一色係正回報,回報介乎2.9%-9.2%,但保守少少的cautious allocation,就有一大半要微跌,進取有錢賺,保守的反而要微蝕,又係令人跌眼鏡。2、3月的時候,唔少人見個市開始回吐,就諗住泊入去風險低d的資產類別,如果泊咗去環球債券,2月同3月類別平均分別跌咗1.87%同1.5%,反而繼續揸住環球股票的話,2月同3月係分別升咗2.36%及2.54%。如果你撤離的係大中華股票的話,2、3月分別升咗0.26%及跌咗3.86%,4月又彈番2.18%。如果係港股的話,2月升1.09%,3月跌3.22%,4月彈番1.57%。咁就避開咗3月的調整,但如果低位無入番,4月的反彈又係無份架。如果係走咗美股,2、3、4月都升呀,分別升咗2.06%、3.64%同5.43%,走咗美股就可惜了。

呢四個月,面對變幻莫測的股市,大家的回報又係點架呢? 你地跟住會點部署? 歡迎留言分享。鍾意我地channel的朋友,請大家「高抬貴手」,按埋like, share, 同subscribe,畀d支持同鼓勵我地,多謝收睇,下次見,byebye.

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 28 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured