【MPF供應商篇】AIA重組基金!連港股基金都無得留低!想點呀?!

 

 

大家好,歡迎大家返到黎MPF醫務室,我係大家的MPF醫務員Vanessa

有邊間香港上市既公司logo,可以係英超球隊既波衫上見到?佢公司個牌子又可以係摩天輪上面見到?

或者有人心裏有數了,不過,今日我哋唔係同大家講波或者講去玩啦。雖然佢個名果3個英文字母,近幾年真係好少同MPF連埋一齊,但佢係MPF市場絕對佔一席位。

大家估唔估到係邊間公司呢?

你咁聰明,一定估到啦,冇錯啦,就係AIA喇。

AIA既強積金計劃既市場佔有率由2000年開始就一直係頭幾位,之前基金既表現都唔錯,但近幾年表現就有下滑既跡象,雖然係咁,但總資產值都唔細㗎。

“冇速度、跑得慢、唔夠快”,如果有睇開波既朋友們,一定會聽過當年講波桂神對加利仔既金句。到左今日,加利仔都變左加利叔,由球員變左講波佬喇。

AIA MPF既市值都算keep到好耐,都係去年先剛剛失手跌出三甲。如果搵下講波桂神來評論一下AIA MPF點解會走下坡,咁AIA嘅三個缺點會唔會就係基金冇表現、排名低、升得唔夠多呢 ?

講真啦,投資表現絕對係好重要,但公司的宣傳同推廣亦都不容忽視架。因為公司對強積金發展既推廣,都好影響一般大眾對佢旗下嘅mpf既睇法。近幾年,就真係好少見aia推廣自己嘅強積金平台。佢咁大個平台,咁多種類既基金都有,可惜,無好好咁畀普羅大眾去認識。佢市佔率排名由第三跌到落第四,慢慢咁畀對手蠶蝕緊。

唔通真係無一啲基金表現好,可取呢?當然唔係啦,個個供應商都有好有差,我哋會陸續同大家探討,記住留意住我哋channel喇。

點解好野要遲啲先講啦,因為我哋發現有重要嘅消息要先同大家分享。

正當我哋研究緊AIA強積金過往嘅表現嘅時候,喺佢網站發現咗一個重要既通告。

當你喺AIA網站入去睇基金表現嘅時候,你會見到有pop up一個重要通告,入面有一啲長期擺着嘅消息,但其中有一項紅色嘅字有講到:

請注意:日本股票基金及香港股票基金將於2021年8月19日起終止,其資產將分別轉撥至亞洲股票基金及大中華股票基金。

個通告仲話詳情可以睇一份叫「致友邦強積金優選計劃參與僱主及成員有關基金重組的通知」。

重組到要終止港股基金同日股基金咁大件事,

個驚嚇程度好似突然喺IG見到10年無見既前度,原來同左之前班上出名既渣男一齊,仲要生左3件。

咁驚嚇既事,我哋一定要去了解一下啦。

原來呢一次嘅重組,當中係包括好多個動作,其中既重頭戲係終止呢兩隻基金,而終止基金嘅資產就將會撥去其他基金。日本股票基金就會撥去亞洲基金,而香港股票基金,就會轉左去大中華股票基金。

有兩隻基金會被終止,我哋就逐隻講啦。香港股票基金會被終止,而資產會比撥入大中華股票基金,即係話你本來揀咗買香港股票基金嘅朋友,過咗8月19日,你本來嗰部份就會變咗買大中華股票喇。大中華地區既股票包括啲咩呢,就包括左中國、香港、澳門、台灣。

大家要知道,香港股票基金,一直係全香港強積金平台上最受歡迎嘅基金類別。最受歡迎嘅基金類別都要取消?

我哋睇AIA平台上嘅資產分布,見到佢隻大中華股票基金嘅資產值比佢隻香港股票基金大。

截至2021年3月底大中華股票基金係AIA平台上第二大嘅強積金基金,有約121億港元,而港股基金則係第四大,約76億。呢兩隻重組左之後,就會變成平台上第一大嘅基金。

而係整個強積金市場上,佢合併左之後嘅大中華股票基金,市值大幅躍升後,就會大約變成第11大基金。將港股基金取消而併入大中華基金,就好似大食細咁。

佢喺計劃重組通知入邊都有講,鑒於大中華股票基金同埋香港股票基金嘅投資地域分配相似,所以決定將香港股票基金終止,跟住將佢同大中華基金合併,精簡計劃。

可能一般投資者都唔明點解香港股票基金嘅投資地域,會同大中華股票基金嘅投資地域相似,明明買港股,點解又話會當投資於中國同台灣呢?

又可能會有人問,其實將港股基金刪除,而幫你買入大中華股票基金,係咪有其他隱藏意思呀。

AIA係點諗呢我哋就唔知喇,從投資角度來講,好多係香港上市既中國公司,係投資地域上都已經係屬於中國,唔一定係投資於A股先算。而香港股票基金轉入大中華股票基金後,大中華股票基金內科技類會比較多,過往幾年,升幅比香港股票多,但價格波幅都會比港股基金嘅較大。

整合嘅原因唔理好醜,最緊要你受。

只好講一句,買緊港股㗎你,準備好擁抱大中華未!

如果你真係好想買香港股票,係佢個平台上面仲有另一隻叫中港基金,佢係今次計劃重組入邊,都有佢份。修改過之後,佢新嘅投資目標係:主要投資於緊貼香港股票市場指數的基金組合以尋求長期資本增值。

佢本身之前都唔係一隻以揀股票為主嘅基金,喺重組之後都會維持唔會以揀股票為主,而係投資喺指數基金。所以即係話喺AIA終止左隻香港股票基金之後,係佢整個強積金平台上,係冇一隻以揀香港股票為主嘅主動型基金。

如果你聽完佢會終止隻港股基金,已經呆咗的話,咁樣你就一定要聽埋以下另一個計劃重組既重點啦。佢另一個改動係會終止隻日本股票基金,而將佢轉撥至亞洲股票基金。

睇返資料佢現時隻亞洲股票基金係單一買入摩根怡安亞洲基金,投資目標主要投資喺亞太區(日本及香港除外)的投資組合。注意:重點係日本及香港除外!

睇返佢嘅文件,重組日本股票基金嘅原因,佢話:注意到與亞洲股票基金相比,日本股票基金的規模相對偏小,因此決定終止日本股票基金,並將其與亞洲股票基金合併,從而讓日本股票基金的成員可享亞洲股票基金提供的較佳規模效益,以及亞洲股票基金的優勢。今次重組,連原先隻亞太基金既投資地區都變埋。

我哋之前都有同大家講過AIA隻日本股票基金係喺同類別內,表現一直唔差。就咁將同類表現唔錯嘅基金終止左,係咪好呢?

除此之外,佢將一隻日本股票基金轉撥入一隻亞洲(日本及香港除外)嘅基金入邊,令到本來買亞太股票(日本及香港除外)嘅投資者變咗買亞太股票(包括香港及日本),同時令到本來買日本股票基金嘅投資者買入左亞洲地區內好多其他地方。呢個做法就比較搞笑!唔顧原先投資者的投資區域取向?夾硬質人地投d無揀到的地區。

大家之前睇過我哋嘅片,都知道亞洲股票,亞太股票嘅分別,同埋唔同地區都係會唔包日本。我哋之前都有講過點解日本亞太地區或者亞洲地區嘅股票唔包日本,因為日本嘅經濟狀況,股市發展,都同其他亞洲地區唔同。我哋見到亞洲股票基金或者亞太股票基金嘅走勢,同日本股票基金嘅走勢都唔一樣。

佢今次嘅重組改動,最後會令佢嗰隻亞洲基金表現好咗定差咗,現在就唔知道,但佢令一班本來係想揀亞太唔包日本市場嘅投資者,被動地加入咗日本股市,呢個做法又係咪人人都贊同呢。如果唔想咁的投資者又會點做呢?會唔會變相自己局人走?

另外佢講話要終止日本股票基金嘅原因大家都可以探討一下,佢係通告中畀的理由,就係因為覺得對比起日本股票來講,亞洲股票喺未來發展更好,佢既講法講到好似有你著數咁,「你唔識揀先揀左日本,識揀就應該一早揀咗亞太股票啦。」但投資者有唔同的風險取向架嘛,人地投日本可能就係想投成熟市場,無咁波動,又有d增長。

佢份通知文件都有提到受影響嘅仲有其他幾隻基金,大家有興趣嘅都可以睇一睇,但最重要嘅都係剛才所提及嘅佢會喺8月19日終止日本股票基金同埋香港股票基金。如果你有買到呢兩隻基金嘅朋友,就要留意一下啦。

大家如果唔想被安排到唔鍾意嘅基金入邊,大家就可以主動轉做自己鍾意嘅基金先,所以,正如我哋一直所講,大家無論乜嘢時候,都要多啲留意下自己嘅強積金投資。如果無留意住,可能過幾年或幾十年後睇statement先發現,d日本股票無晒,同原先揀的唔同晒,到時先發現面目全非都已事過境遷,於事無補了。

今日就講到呢度啦,大家有乜想知,可以留言話畀我地聽。記得like、share、subscribe埋我地呀。多謝收看,下次見。

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 27 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured