【MPF供應商篇】匯豐強積金有乜好嘢?

匯豐恆生既強積金,坊間一般評論都麻麻,咁用既匯豐MPF既你,對住咁多mpf 選擇,究竟有冇邊隻好啲呢?
「環球金融,地方智慧」,呢句SLOGAN有番咁上下年紀的香港人,相信都唔會陌生,亦都見證咗匯豐的輝煌年代。近年世界主軸由合作分工變咗貿易戰,環球金融成為夾心,令人唏噓。

匯豐近期好多新聞,又搵埋天王呀,跑車呀出來推銷高端服務。但匯豐強積金呢?龍頭地位係舊年被宏利搶咗。

大眾一向對佢唔係好了解,而且印象都唔算係好。

我哋上集就同大家分享咗,呢間全港吸資第二大的強積金供應商,從佢D基金的資金分布,我哋見到最多人買嘅係追蹤恆指的基金,跟住就係增長基金,而第三位就係保守基金。所以,匯豐的供款人主要係買一啲被動型、保守型的基金。我地仲同大家分享咗一D匯豐仍有待改進的基金。

未睇呢集的朋友,可以CLICK番右上角條LINK入去睇番,對匯豐強積金計劃會了解更多。

匯豐畀人鬧足咁多年,咁樣係匯豐嘅強積金平台,究竟有冇一啲主動型的基金表現得好呢?今集我哋會同大家講吓匯豐強積金平台有乜嘢主動型基金近年表現係比類別平均好,同埋我哋又會同大家睇下一般主動型既匯豐強積金既投資風格。

其實匯豐嘅強積金計劃唔係一無是處嘅,匯豐強積金平台上,雖然有一啲基金可能長年積弱,但近幾年,可能因為投資市況有所改變,或者基金嘅投資策略有變動,有幾隻基金嘅表現,開始有明顯改善,有幾個主動型基金表現幾好。

好,咁佢到底係乜野基金開始爭氣呢?

第一:中國股票基金,

中國股票基金屬於中國及大中華類別,直至2020年底,佢係一年、三年、五年以及10年期嘅表現都比同類別嘅平均表現好

倉位集中,睇返九月嘅持倉,頭十大就佔近54%。頭三大持股分別就係:騰訊、美團、阿里巴巴,各自都佔大概9%。

美團係2020年表現十分強勁我估大家都略有所聞,美團係2020年全年有接近兩倍嘅升幅。

而匯豐既中國股票基金就係2019年第三季時已經持有約5%既美團,之後就不斷增持,到2020年第二季時已經有接近10%嘅美團,這基金係2020年有不錯嘅表現,重倉美團絕對提升左這隻基金嘅表現。而這隻基金亦都有買中國A股。2019年第三季十大持倉中,我哋見到另一隻表現強勁嘅A股,貴州茅台。但係2020年第一季已經減持咗啦。

中國股票基金喺2009年底先成立,我哋就由2010年開始睇佢既表現。圖中我哋將匯豐嘅中國股票基金同埋類別平均一齊比較,仲有好受歡迎嘅競爭對手宏利中華威力。

睇返表現圖,大家可以見到係2010開始時中華威力就表現突出,匯豐中國基金就同類別平均差唔多。這個情況一路維持到2016年,係2017年開始大家可以見到匯豐中國股票基金開始發力,超越類別平均,開始追近中華威力,累計表現仲剛剛係2020年,超越埋宏利的中華威力。

中華威力係2020年底嘅市值達到340億元,遠遠拋離匯豐(加埋恒生)的中國股票基金的約160億元市值。但匯豐的中國股票基金”自成立至2020年”(定係2010至2020年)的累計表現,卻優於大家趨之若鶩的中華威力。所以,我地一直強調,資金多的基金,同表現並不一定成正比。

第二,亞太基金

匯豐另一隻近年表現比較突出嘅,就係亞太股票基金。呢隻基金由強積金成立時已經有啦。

Mpfa嘅基金分類就冇分亞洲基金同亞太基金嘅,但係各位有睇我哋之前條片,相信對亞洲同亞太已經有一定程度嘅了解。未清楚嘅朋友,可以睇返之前條片。亞洲基金類別同埋亞太類別嘅表現係好大分別㗎,主要因為澳紐股票表現影響到佢哋嘅表現。如果仔細分,匯豐呢隻亞太基金係真係亞太類別既,算係名副其實。

呢隻亞太基金係匯豐加埋恒生嘅市值約160億左右,同剛才討論嘅中國股票基金差唔多,都唔算係好受歡迎嘅基金。

大家睇圖可以見到如果由2000年開始睇起,佢係一開始幾年都比類別平均表現好,但由2012年開始就一路一路差落去啦。咁樣睇法好似佢而家仲差個類別平均咁,但主要都係因為2013到2015嘅時候真係表現得太差,累拖咗到2020年的累計表現。如果我哋只睇最近5年,喺另外一幅圖我哋就會見到佢近五年其實表現比類別平均好少少。

佢近五年表現好返啲,係咪因為市場嘅情況適合返佢嘅投資風格?定係佢改變左風格去就返個市場呢?我哋睇一睇佢最近一年嘅持倉,睇吓見唔見到一啲線索啦。

佢既持倉都唔係一成不變,比較2019年第三季嘅持倉同2020年第三季嘅持倉我哋會發現,佢嘅持倉由2019年第三季到了2020年第三季不斷減少表現不太好嘅銀行股同埋石油股,而買入表現強勁嘅騰訊、台積電、三星等股票。另外你見到佢嘅國家分布同指數都比較接近,分別最大嘅就只有澳紐嘅股票比重佢比指數低,佢得11.7%而指數係有16.2%,”呢個係佢表現比較好的原因之一。佢曾經係2019年第三季嘅時候輕微偏重了中國及香港,但之後又回復到接近指數分布,”可以見到佢的主動操作”。

再睇佢十大持倉就會發現佢持倉都唔係好集中,選股亦會偏向於表現比較好嘅科技股,”都係表現好的原因之一”。綜合而言,佢的國家分布同埋持倉數目等各方面都穩穩陣陣。

大家可以見到無論匯豐中國股票基金或者係亞太股票基金都係近幾年,大約近5年左右表現開始有所改善。由持倉,國家比例,行業比例中可以見到,匯豐既基金投資風格,都係以選個股為主,而係國家分布,行業分布上都偏向靠近參考指數。咁樣做法,好處係可以控制到風險,基金表現會同指數比較接近,但唔好處嘅就係偏重於選股就要睇基金經理同分析員既能力,而且因為研究個別股票需要大量時間同人力,所以一般傾向研究大路、較大型公司為主,如果市況係雞犬皆升,中小型股表現較優異時,基金表現就有可能落後。呢個係大家要注意的地方。

今日就講到呢度啦,細心的朋友,可能會發現,我地仲未講匯豐吸金第二大的增長基金,唔洗心急,幫緊你幫緊你,大家繼續密切留意住我哋,我哋會再繼續研究落去,再同大家分享。臨走前,上次有網友點唱周杰倫,我揀咗首歌詞好有意思的《稻香》,送畀你地。

對這個世界如果你有太多的抱怨

跌倒了就不敢繼續往前走

為什麼人要這麼的脆弱 墮落

請你打開電視看看

多少人為生命在努力勇敢的走下去

我們是不是該知足

珍惜一切 就算沒有擁有

還記得你說家是唯一的城堡

隨著稻香河流繼續奔跑

微微笑 小時候的夢我知道

不要哭讓螢火蟲帶著你逃跑

鄉間的歌謠永遠的依靠

回家吧 回到最初的美好

最後,記得例牌四步曲,LIKE SHARE COMMENT 同SUBSCRIBE我地呀,多謝支持,下次見,BYE BYE。

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 28 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured