【MPF時光隧道】高山低谷 過去十年乜基金贏晒?(下集)

 

MPF面世呢廿年,撞正低息環境,息都無啖好食,想穩穩陣陣瞓身落高息定期等退休? 發夢都嫌太早了。對於唔識投資的人,放落保本基金追唔上通脹不突止,有時年回報仲係負數添,難道連個天都唔鍾意大家? 畀條生路黎行下好喎。無路行,大家唯有局住落場廝殺啦,但投資既野,識條鐵咩?

呢種心情,我地明白,望住隔離個MPF戶口係咁升,自己果個戶口連密碼都唔記得左,都唔知點好。但想大家都畀D掙扎啫! 嗱,大家記住禁埋SUBSCRIBE我地個CHANNEL先呀

上集同大家回顧咗 MPF 開頭幾年的表現,今集又睇下海嘯之後,每年最強同最弱係 D 乜野,有無路捉?

海嘯之前幾年,幾乎係中港股票的天下。坐住中港股票就可以HEA足幾年。大家如果錯過左果幾年既升浪,咁大家又估下,08年之後每年買乜野先可以跑出?等我開估啦。

睇番個表,我地會見到2008年之後,成日上到升幅榜的主要係兩款,中國股票基金,同埋美股基金,呢兩類基金各自都有5年打到上榜。而且,係最近兩年,呢2類更係一齊躋身上榜。

咁我地就由海嘯之後講起,美國係08 年金融海嘯既重災區,09年反彈自然唔及我地香港同埋亞太區啦,香港及亞太區股票基金連續兩年打入 MPF 升幅榜頭五位,2009 年大升 69-75%,2010 年再升 18-24%。大家病到一塌糊塗的時候,中國經濟就係2010年超越咗日本,躋身第二。

跟住咪以為海嘯D水退晒,可以嘆番幾年陽光,點知又輪到歐債危機。

大家仲記得歐豬五國吧,呢幾隻豬仔差 D 導致歐元區瓦解,人心虛怯,升得多自然就跌得多。所以,2011 年,大中華、中港及港股基金跌到包尾五位,回吐 23-24%。係股票弱勢下,債券又變咗避風港,當年就排晒係升幅榜頭五位,不過只係升 4-5%。

外圍 D火無燒到黎中港,2012 年香港同中國股票基金又輕鬆上榜,彈番 25-26%。

聽到呢首歌,大家個心已飛咗去日本了。

2012 年對日本黎講都好重要,安培上任之後就推QE,佢個三支箭一出,日股就即刻係威係勢,晴空塔都係個年面世,吸引左好多人去朝聖,好快就渡過左前一年福島地震既創傷啦。安培經濟學好快見效,到2013 年日股基金躋身升幅榜五強,大漲 34-36%,同歐美基金睇齊。至於當年亞洲債券就表現最差,要輸5-6%。

海嘯之後,美國帶頭瘋狂 QE,環球水浸之下,各國股市輪動,一直漲到 2018年,直至中國同美國兩個大國打貿易戰,先出現較大幅下滑。

2014年因歐洲央行過早收水歐股變弱,美股就繼續強。呢一年中國倡議「一帶一路」,中國股票、同埋康健護理基金都表現唔錯,升左一成有多。

黎到 2015 年,亞洲入面以日韓表現最好,升 9-21%。中國認真麻麻,GDP增長放緩至7%,仲爆埋股災咁大鑊,都咪話唔驚。

歌:「跌到極麻木 只好相信又再爬得起 就會有轉機」

美國經濟反而唔錯,GDP增長上番3.1%,仲開始加番息添。所以到 2016 年,到北美、美國、環球股票基金做好,升 9-12%;歐洲、日本、南韓、香港、康健護理就弱,跌 5-12%。

2016 年可以話係政治生態既轉捩點,特朗普竟然當選美國總統,英國公投又通過脫歐,意外一件接一件,跌到一地眼鏡。呢年股市升跌唔大,值得紀念既係POKEMON GO 面世,大家沈迷於虛擬世界,不分老幼齊齊攞住手機捕捉 POKEMON,實在係人生一大盛事。

任天堂股票變咗掌上明珠。

2017 年又變番港股、中國同大中華股票強,衰咗咁耐,一反轉就大升 46- 50%,連虛擬貨幣亦升到好鬼癲。同年特朗普居然順經濟周期咁減企業稅,自製股市泡沫,之後就同中國打貿易戰。搞到 2018 年,大中華、中國、南韓、 亞洲大跌 20-26%,保守基金先可以力保不失,升 1.4%-2%。

到 2019 年,中美亞洲股票就一齊大漲啦,全年升 30-35%。社會事件影響香港股票,但中國同大中華股票就懶得理你自己升。

2020 年唔洗我講,疫情大家都知,3 月個一下股災,失驚無神,嚇你一驚,只係曇花一現,全年居然大升,升幅高達 43-51%,經濟同股市大脫軌,連日股都突破埋前三年試咗幾次既頂,衝破咗就一飛衝天了。

咁多年的 QE 最尾會點收科,又會點樣影響大家的餘生。

希望係咁啫,現實又係另一回事。

未來會係點? 大家估估下,疫情下,最窮的國家咁大財赤好快出事,如果全球各國齊齊要動用儲備救國救民,而一齊沽美債黎用,又會發生乜野事呢? D 錢泊落中國,又係唔係可以高寢無憂呢?大家一齊思考下啦,歡迎係下面留言討論。

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 23 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured