【MPF提早領取】又搬龍門!點先肯信我係永久離港?

 

 

點樣提早攞返自己MPF,我諗呢個話題一直困擾著大家,係咪?強積金既儲蓄,本身係我哋自己既錢黎,但自己必要時想拿返,都要用盡千方百計咁,用好多證據去先可以拿返自己放入去既錢,呢種情況,都幾荒謬。

點樣提早攞返自己嘅強積金,最近呢個話題特別多人講,就係因為宏利喺2月底嘅時候,出咗內部指引,用BNO嘅簽證都可以作為永久離港嘅證據,畀人提早攞番mpf。但係報道出咗街之後冇耐,積金局又即刻發聲明話,呢個方法唔可以用嚟作為提早提取強積金。到底點解?

我哋之前都有同大家講過,除咗等到65歲可以攞返強積金之外,有六個情況可以提早拿返

第一: 到左60歲又冇打算再做嘢既人。

到左六十歲既朋友,唔好意思喇,暫時仲未無資格搭兩蚊車,又未夠年紀去申請生果金,但如果你無打算再做野,咁你就有資格提早領取強積金。

第二: 永久離港,聲稱已經離開咗香港去其他地方居住,或者將會離開香港,而又唔會再返香港。呢個係今日條片的重點,我哋一陣間再講呢個。

第三係: 完全喪失工作能力,當然要有醫生證明啦。相信無人會想發生係自己身上。

第四就仲慘,末期病患,都係要醫生嘅證明書,證明你得番12個月命,係12個月,11個半月都唔得。

第五係,剩係得番一個強積金計劃,嗰個戶口唔超過$5000,而且你申請攞返嘅日期要距離最後供款日期最少12個月,而且你都需要聲稱你以後唔再做嘢先可以申請攞返。

第六就係死咗囉,咁就唔係自己攞,係遺產俾你屋企人攞。

大家睇到六種情況,除咗永久離港之外,其他好多種都係一啲不幸既事,唔好既野,無人會想發生係自己身上。

最近社會原因,多咗好多人想移民,所以多左人想知道點樣以永久離港既原因來攞返強積金。多左人問點樣可以提早拿返,但mpfa公佈既數字就顯示2020第2季無論申請過嘅數字,或者提取的金額,都係近一年來原來最低嘅,直頭係去返2018年底既水平,比2017年中時仲低。

究竟係申請資格難咗,啲人少咗申請,定係啲人突然間對前景好有信心,決定留喺MPF,相信大家都心中有數。

據了解,係社會事件發生之前,用永久離港原因來提取強積金嘅情況本來就唔係好多嘅,所以當時審批手續都唔係咁複雜,但後來為咗杜絕扮移民提早提取,而且因為社會情況,越來越多人用呢個原因來提早提取,所以審批就越嚟越嚴。

大家又睇返,用這個原因提早拿返強積金,個重點係永久離開香港,唔再係香港工作。供應商既審批工作,主要係證明你係咪真正長久離開香港,所以只要證明到你係會去其他地方長久居住嘅,就可以申請攞返。無論係移民證,居住證明,都係想區分你係咪真移民。真移民可以攞,假扮移民唔可以。

我哋睇吓其他一般永久離開香港嘅情況之下要攞啲咩文件

MPFA網站上有講:計劃成員必須作出法定聲明指已經或將會離開香港,亦無意作為永久性居民返回香港工作或再定居。同時須提供令受託人信納計劃成員已獲准在香港以外地方居住的證明。即係供款人,要出示文件,令到受托人相信你喺永久離開香港,而打算喺外國定居,注意係定居咋,定居、定居,重要野講三次,冇話你一定要入左外國籍先可以攞返。

一般情況之下你要出示相關嘅文件包括身分證,已經填好咗嘅索取返強積金嘅表格,法定聲明表格,即係宣誓聲明你永久離開香港,仲有最後嘅就係,外國嘅住址證明啦,或者外國發俾你嘅工作簽證,移民簽証等。或者返內地定居都可以。

大家睇返個條例所講提早攞返既情況,佢係話永久離港就可以攞返。所以根據一般嘅邏輯,各個受託人或供應商點樣審視,主要係區分申請提早攞返既申請人係真移民定係假移民。如果申請人有簽證可以係外國居住,工作或者有埋住址證明,咁都可以證明佢係想長期離開香港。而資料都指出,供款人就算現在提出永久離港,他日都可以再返港再供mpf,只不過佢唔可以再次用永久離港既理由去再次提早攞返mpf。

BNO嘅情況比較特別,係去年中開始,各供應商都開始唔俾單純用bno就當離港既證據。

根據報道合資格申請的BNO港人達290萬,連同家眷達520萬人。而根據英國內政部估計,最多會有30幾萬人會用BNO簽證去英國。但唔好忘記,

這30幾萬人中,如果有10萬人係中高產收入人士,佢哋嘅強積金戶口,平均約100萬,咁嘅話,單純因為強積金而走資超左1000億!睇返造句,強積金總資產值剛剛超過左1.1萬億,所以走資額佔成個強積金總資產約9%呀!

早排就有報道指,宏利二月底發出內部指引可接受以BNO簽證,作為永久離港申請提早領取強積金的證明文件,但要視乎當時的移民政策,除了簽證,申請人還要提交補充資料,包括機票和落地證明等。

而當時報章都話滙豐、BCT銀聯、友邦及永明都想跟隨宏利的做法,強積金成員若以永久離港前往英國為由提出申請,可提交BNO簽證連同其他相關證明文件。但佢哋都有講到一句:表明會按積金局既定要求處理。

報道出咗之後,積金局即刻發表聲明,BNO簽證並不能作為提早攞返MPF嘅理據,而佢所講嘅理由係,直接引述佢聲明所講

「鑑於香港特別行政區政府已於2021年1月29日發表聲明表示不承認BNO護照作為有效旅行證件和身分證明,亦不會在香港獲承認為任何形式的身分證明,因此計劃成員不能依賴BNO護照或其相關的簽證作為申請提早提取強積金的證據。」

簡單來講,因為政府係之前已經講咗唔承認BNO作為旅行證件或者身分證明文件,所以BNO所衍生出嚟嘅簽證,都唔可以作為一個法律上嘅理據。

另外,佢仲話強積金嘅受托人,係執行佢嘅計劃行政工作嘅時候,有責任依據返香港法律行事。佢仲提醒啲受托人,應該要付起呢個把關者嘅角色。

強積金計劃諮詢委員會委員梁繼昌認為倘市民不認同積金局的指引,可以提出司法覆核。市民現在連啲mpf都未拿返,試問又有幾多人可以再攞錢出嚟打官司呢?

咁各位朋友如果真係攞BNO visa去移民英國嘅,睇嚟而家就唔可以用呢個做移民的證明,去攞返你自己儲落嘅強積金啦,但係以特區護照離港,97前居英權計畫,或者移到英國以外地方,比如兩三年前馬來西亞的MM2,理論上都不受影響。但係咁樣BNO visa幾時可以攞返呢?

因為你而家用緊嗰個5+1方案,5年後申請英國永久居民或再之後既英國國藉之後可唔可以攞返呢?

咁呢個情況作仲未有人試過所以就唔知啦,會唔會到時又話你的英籍係源於BNO又唔俾呢?就不清楚了。但係大家又要留意吓,預咗你係入咗英國籍嘅話,係英國海外所得嘅利潤就可能要交英國稅,就算不幸入左籍之後死左,你的mpf都要交遺產稅。

咁如果你係會去英國最少5+1即係六年啦,中間你係英國絕對可以上網打理下你自己嘅強積金。但係要注意你已經離開咗香港,即係唔會再有新嘅供款入去嘅話,咁就要注意一下,一般嘅供款下好有用嘅平均成本法,就未必再有幫助啦。即係喺呢d時候,冇得靠一啲新嘅供款資金去拉低你嘅入場費啦,係咁嘅情況之下,不論你嘅投資觀點係乜嘢市場同資產都好,最緊要嘅就係分散風險,投資多過一種資產。

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 23 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured