【MPF供應商篇】用緊匯豐強積金?你又認識幾多

問一問大家,喺香港有隻獅子曾經俾人用槍射過,用火燒過,比人運過去日本,但後來又返咗來香港,大家又估唔估到邊隻獅子?

冇錯啦就係大家都好熟悉嘅匯豐銀行門口放住既獅子。我啲MPF醫務室今日就唔係想同大家講果2隻獅子點樣歷劫災難,我哋就係想睇吓匯豐銀行嘅強積金計劃。

匯豐強積金計劃夠晒多人用,所以幾有代表性,你問吓你身邊嘅朋友,一定有人用緊匯豐或恒生強積金戶口,但唔知用緊匯豐強積金嘅朋友對匯豐強積金又有乜睇法呢?

早知唔講睇返,數字都說明左。喺 2015 年 6 月嘅時候,匯豐、恒生(下面會合埋一齊講)既 MPF 市場佔有率大約係 30%,當時仲係MPF既龍頭一哥,遠遠拋離當時排第二,市佔率19%既宏利。大家記得嘛,當時市場已經對匯豐強積金嘅回報有微言,亦可能因為咁,去到上年,匯豐既市佔率已經跌到 22%,MPF龍頭一哥既地位仲比宏利取代左。

這幾年匯豐強積金既市場佔有率大幅流失,咁仲用緊匯豐計劃嘅人,多數係買左乜野基金呢?係同大家匯豐MPF計劃既市分布前,先同大家分享一下一段網上留言。

之前網上見到有朋友講:強積金,比左管理費,就係唔想煩,就係想交比一啲專家去打理。點解我仲要成日去主動管理,去睇實,必要時去轉基金類別或者轉強積金計劃呢?咁麻煩!咁咪做埋基金經理果份工?

又同大家分享一個笑話:你放左好多資產比基金公司或基金經理去管,但你知唔知道其實基金公司只對其中一小部分有興趣,就係你資產內會變成基金管理費果部分。

基金公司或基金經理管理你既資產,可能因為市況問題或其他原因而表現不理想,但只要你仲係放緊係果隻基金內,果個計劃內,你都係比緊管理費比佢,你係無表示過自己既不滿。

而且基金類別係供款人揀既,揀錯唔適合既類別都會影響你既強積金回報,所以唔好唔理你自己既強積金呀!

講返匯豐強積金計劃,計劃內其實有好多基金畀人揀,總共有成 20 隻。 雖然選擇多,但我地睇番個資金分布圖,就會見到有多過一半既錢集中係四隻基金度,最大個嚿錢係去左追踪恒指的基金,佔成 16.7%。咁表現左個心態係,如果你係局住幫襯匯豐個批人,咁你揀左呢 D追踪恒指的被動基金都算係不幸中之大幸,因為有 d 人只求與大市同步已心滿意足。

而匯豐呢隻基金的收費僅 0.79%,無my choice、東亞、富達咁平(0.72-0.77%),但又無 BCT、景順、交通銀行、永明、宏利、信安、easy choice 咁貴(0.85-1.06%),當然你話搬去平 d 的地方有着數,但唔係人人會為咗 0.02-0.07%的濕碎數而大遷徙,即使你係百萬大戶,一年都係講緊 200-700 蚊。

匯豐另一個吸金王就係保守基金啦,佢 2020 年底佔成 14%呀,匯豐加恒生有成接近 400 億的資金泊咗係呢度呀,而呢隻嘢既回報就認真陰功啦,10 年累計回報得 2.57%,仲慘過定期呀!

我地 check 番過去 5 個季度呢隻保守基金的資產總值(AUM),係相對穩定,都係係 380-400 億港元,證明由 2019 年底,大市經歷完高位大跌再大升,呢隻基金的金額都係無點跟住個市去變化,可能證明 D 錢唔係短期泊一泊去避險,而係長期放係度唔理咁。當然有可能匯豐的供款人大多數都上左年紀,筆錢係等退休時提取,所以先咁保守啦,若果嚿錢係屬於年輕人,都長期泊係保守基金唔理的話,就真係浪費晒長期投資增值的機會了。唔同嘅基金裏面,適合唔同嘅人,有興趣嘅話可以睇返我哋之前條片

近期大家既投資焦點都集中喺大中華股票市場同埋美國股票市場,我哋就同大家睇一睇喺匯豐計劃入邊既呢兩類基金先。

匯豐既主動型 MPF 入面,有一隻中國股票基金同埋一隻中港股票基金。呢 2 隻基金都係買香港上市嘅中國公司股票,而中港基金會買埋一啲香港公司。我地今集先講隻中港股票基金。

係 2020 年,中港股票基金增長 15.9%,MPF市場上表現第一位嘅施羅德香港基金就升成 39%,差成幾條街。我估大家買主動型基金,都係想個基金經理幫你揀股,而唔係乜都唔使諗咁買入指數基金。而呢隻中港基金嘅持倉,最近一兩年都有 10%係買左盈富基金!我相信如果投資者想要追蹤恆指,索性就買隻被動型既指數基金算啦,主動基金去買埋啲被動嘢,係唔係偷懶先。

係基金管理層面黎睇,短期買下盈富基金都無可厚非既,一來管理現金會簡單D,或者用嚟快速加倉減倉。但係「長期」咁持有指數基金,一係就太懶,一係就自認選股能力唔及指數。

唔好以為拎 10%去買盈富唔算好多,其實係法例規定主動型強積金既個股單一持倉最高只可 10%,呢個規矩係為免 D 基金太重倉係幾隻股票,令風險過度集中。匯豐就相反,佢想管少啲咁,唔理果10%既資產,買左盈富就算。

‘一字既之曰:心。’食神‘大家有無睇過?周星馳同大家講想做食神,最緊要比個心來做。如果一碗叉燒飯,舊叉燒係外面斬返黎,條菜又係另一碗飯度搬過黎,咁我點解要食你碗叉燒飯先,而且你碗叉燒飯唔係特別平喎。同一道理,想要追蹤恒生指數,不如買隻費用平啲既恒指追蹤基金啦,根據mpfa 網站,匯豐隻中港股票基金,最新既 FER 收費為 1.49%。而同一計劃內嘅恒指追蹤基金的收費為 0.79%,前者貴左幾乎一倍呀。

大家都明白,主動型基金要長期跑贏大市唔係咁易,基金經理都係人,有時發揮好啲,有時發揮差啲,但投資者買你既基金,就係想買你既投資能力,匯豐隻中港基金就慌死偏離大市咁,淡化左個人既投資能力,唔知話佢細膽呀,定係無 heart 啦。

講開又講,匯豐強積金有重大人事變動,主要管理中港股票投資嘅新大姐大已經喺 2020 年中上任喇,到底新人事係唔係有新作風,中港股票嘅基金會唔會有新嘅投資方法,大家就拭目以待啦!

至於美國股票基金方面,匯豐合併旗下多個計劃之後,依家佢有 2 隻美國股票基金,分別係北美股票基金同ValueScheme 美國股票基金。隻北美股票基金同樓上講個隻中港強積金一樣,都係懶惰型,佢既持倉、行業分布,都同 FTSE 北美指數好相似。對比其他追踪北美指數的基金,例如中銀保誠 easy choice,就會發現原來佢哋既行業分布、頭幾大持倉,都好相近,但回報方面,滙豐個隻就比中銀保誠嗰隻差 D 啦,匯豐既回報有 17%,而中銀保誠就有 18.7%。呢碗叉燒飯味道唔單只差 D,仲要賣得貴 D 呀,匯豐隻北美基金收費為1.36%,而 easy choice 的為 1.04%咋。

講完北美基金,之前有網友想我哋講下恒生計劃既核心累積基金,其實恒生計劃同匯豐係用同一個基金既,而匯豐嘅核心累積基金做得認真麻麻啦,2020 年全年增長為 11.85%,佢既表現係 26 隻同類別中排名最低架,回報最好嘅海通有成 19%,第二好嘅 my choice 有 14%,匯豐同佢地個差距都咪話唔少。除咗睇同類別排名,我地可以同「參考投資組合」比較下。核心累積基金係屬於 default investment scheme(DIS),DIS 既特別之處,在於設有「參考投資組合」,呢個組合比供款人容易啲比較各個計劃出既同一款基金;睇返 2020年核心累積基金嘅參考組合,佢既回報有 12.06%,輕輕高過匯豐既 11.85%,咁即係話匯豐唔單止跑輸同業,仲跑輸個基準,用考試做比喻,匯豐唔單止考包尾,連合格線都過唔到添。

講咗咁耐,講咗匯豐D比較差的基金,咁其實匯豐又有無d表現好少少的基金?我地發現,匯豐最多人買的基金,唔係佢表現最好的基金黎架,你話幾可惜呢。大家繼續追看我地下一條片,我地會同大家發掘d回報比較好既匯豐基金。

同我地channel一樣,終有一日你會愛上我們的。

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 19 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured