【MPF 時光隧道】鑑古知今(上集)

 

同TWINS一樣,MPF都係一個我細細個已經聽到既名呀,霎下 眼,MPF就推出咗廿年,連我自己都開始要供啦,已經唔可以再唱「當然 現在我未成年 讓我膚淺」。

呢廿年世界同股市都幾許風雨,今日我地就回顧下呢廿年的大事件, 同埋期間最強最弱MPF,睇下『鑑古』係咪對『知今』有幫助啦。

TWINS一出道就紅到發紫,但強積金呢壇野就黑過墨斗, 因為唔知邊鬼個高官TIME個MARKET TIME 得咁準,係千禧年DOT COM 泡沫爆緊的時候黎LAUNCH。

因為時機唔好,MPF第一年,即係2001年, 投資一般損手爛腳,當中最差五大係港股基金、環球股票基金、 日本股票基金同增長基金,跌足22-24%,真係一出閘就脫腳, 放係保守同利息基金先幸保不失,最好的有5%至7%回報。

普羅大眾多數唔係投資專家,政府當年局住大家為退休做資本增值, 又唔揀個好少少的時機,一出閘就搞到人人都蝕, 所謂見過鬼都怕黑呀,仲要唔止見一次咁少,咁既經歷後, 又有幾多普通人可以重整陣勢呢? 猶其年紀大既投資者, 莫講資本增值,隨時臨老唔退得休呀。

2001年大家唔好忘記,除咗係科網爆破的翌年,仲發生咗美國9 -11恐襲事件呀,全球經濟增長大幅放緩,自然唔止衰一年咁少啦。2002年仲有Enron會計做假事件, 所以,2002年北美股票、環球股票、同歐洲股票繼續衰, 係當年表現最差的MPF,跌成24%至31%。

雖則話「趁我未成年讓我「輸錢」」,但一開波就交咁多學費, 叫人點有心機上堂喎!

股票唔得,債券反而好得,當年最好的債券回報有成9%至20%呀 !另外中國亦好少少,2001年中國加入世貿呀嘛,但當年A股根 本未成氣候,唔似依家咁大規模,大家買中國的話, 都係買係香港上市的國企股、紅籌股等。雖然03年香港經歷咗SARS,失業率飆升,但疫情持續咗幾個月就好快完結,經濟、 股市都谷底大反彈,再加上國壽、 內銀等眾多大型中國企業輪住黎香港上市集資來擴大業務, 帶動咗本港2003-2007年的大牛市。

我地睇番MPF的頭五大回報,2003、2004、2006、2 007呢四年,頭五大都有香港股票基金,個升幅仲要係相當驚人。 2003年頭五大升幅介乎係47-56%;2004年仲有21%至25%升幅;2006年升47%至83%;2007年升54大至99%。2005年港股基金打唔到入五強,但佢當年都唔係弱, 只係人地太勁,亞太區、韓國同日本,呢D地區基金當年升咗成30%至66%,最弱的係債券,跌咗5%至8%。不過,日本喺2005年 威完之後,2006、2007年又連續兩年係排包尾。所以, 一句講晒,03年全城最恐慌時all in 港股基金,揸到金融海嘯爆發前,就係當時很好的選擇。 呢個自然係事後孔明。

咁呢五年又有乜世界大事呢? 2003年美國打伊拉克,唔係好關中港事啦, 但油價係呢幾年就升咗好多,2004年雖然又有禽流感,但相比S ARS就小兒科,2005年中國匯改,人仔之後就係咁升值直到2 014年,好多香港人當年北上消費都儲定咗唔少人仔賺到啦,2007年就美國次按危機(iphone都係個年推出,哈, 有危又有機呀)。

對於大部份香港人,因為有本土情意結,所以就算唔識分析, 無理環球大勢,買中港股基金都唔難,因為天生就在香港嘛, 難就難在係唔係03年咁絕望的時刻有本事反向操作撈底, 同埋避得開08年的金融海嘯。呢d就睇你本事啦。因為如果你2008年無走到,當年港股、中國同亞太區基金跌咗成52%至58%呀 ,咁你之前辛苦咗個5年,就水瓜打狗了。

大家睇到呢度,係唔係都好心急想知道之後個10幾年又點呢? 我哋係呢度停一停,容許我賣個關子。等等!!!!大家close browser之前,按咗SUBSCRIBE先好行開呀。 咁先唔會錯過我地下集精彩的內容,約定你下集見,byebye。

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 19 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured