【MPF工具篇】食住花生睇GME 保守基金保本嗎?

 

今日講MPF 之前,想同大家分享下一件全世界都食緊花生既新聞先,係關於一隻大鱷比散戶玩殘,仲要一蝕就成幾十億美金既大鑊野。

是咁的,故事既主角係一隻叫GAME STOP既美國股票,係一間有37年歷史既遊戲實體零售商,有成五千幾間舖頭,但受到行業萎縮兼夾疫情關係,財務報表梗係唔理想啦。但由2020年年中4、5蚊呢D位,今年年頭已經升㺫廿蚊水平,跟住去到1月20日,更加爆到上43蚊。

做淡既基金見到呢個勢頭,就梗係好唔妥啦,於是一間叫CITRON research既機構就唱衰GAME STOP,話隻野好快跌返落廿蚊。點知反而出咗反效果,激發一班網民散戶狂撐,起勢咁買入正股同好倉期權(LONG CALL),1日內就挾到65蚊。佢地除左係股市對賭外,仲係TWITTER上鬥嘴,實行場內場外都鬥鑊甘。之後TESLA老闆都加入散戶行列,佢一呼百應,於是股價就更加瘋狂。

股價升得咁急,自然更多人追入,之前沽空左既大鱷睇住被挾死,逼住用超高價買返D股票平倉。借貨沽空去到極致的話,會發現市場上可以沽左超過100%既股票,根本唔夠現貨買返黎平淡倉,好似GME事件咁,就有人發現市場上係沽左130%既貨。D對沖基金沽空咗隨時蝕成幾十、甚至上百億美元,就係呢個時候,好幾個網上交易平台係突然限制散戶買入GME,亦即係淨係比沽唔比買,呢招即刻就遏制左個升幅,令股價大插水。

當然啦,呢D橫手被散戶媽到飛起,於是群眾壓力下,又有限度咁放寬返個限制,股價又一支箭咁標返上去,去返三百幾蚊。

其中一個交易平台就叫ROBINHOOD,呢位羅賓漢真係搞笑,唔係劫富濟貧,係劫貧濟富,鬼咩,佢個平台唔收買賣佣金,咁錢從何來,梗係要服務D基金大客啦,雖然公司就出左聲明,話停止散戶買貨係出於「風險考慮」,唔係收到投資機構施壓、比機會佢地止蝕喎,信不信就由你啦。

其實日日都有股份比大鱷沽空,因乜呢隻GAMESTOP有咁多散戶撐呢,其實就同香港人撐匯豐一樣,係一種從少培養既情意結。自從個個都上網download 遊戲,GAMESTOP呢類實體遊戲商店自然式微啦,但就好似NOKIA咁,佢會FADE OUT,你未必會再買佢,但佢比左你好多童年回憶,唔想佢比人搞死,只要有足夠的粉絲,每人平平地坐住一股,唔畀自己證券行借貨出去畀人沽空,就睇班對沖基金大鱷去邊度搵到足夠的貨去平倉囉,想唔爆升都難,難就難在如何做到眾志成城。

Social media平台就成功推波助瀾,令消息以極快的速度傳遍全球。所以呢次行動,參於的散戶已不再局限係美國,連以中港用戶為主的富途牛牛都勁多人參與,散戶比班華爾街大鱷一D顏色睇,展現下平民既威力。當音樂椅成功響起,大家就會趕搭順風車,都唔排除有其他大戶一齊「黑吃黑」,幾個星期就賺到幾倍,為公為私,造就今次既行動咁成功。

有左GAMESTOP呢個戰績,散戶發現大衞真係打得低哥利亞,雄心壯志之下,條戰線越拉越闊,好多股票例如搞戲院間AMC、黑莓、諾基亞逐隻夾。

牛頓講過:「我能計算出天體運行的軌跡,卻難以估算人們投資時的瘋狂程度。」畢竟睇返基本面,GME個財務表現,無論如何係唔值300美元呢個水平,炒到咁高終有一日要跌返落黎,就睇最後邊個仲揸住支火棒了。

本來呢d股票係好細,夾佢地對個市係無乜影響。只係當事情又推向極端時,唔止夾一兩隻,而係大量咁夾,就開始造成恐慌,大家會擔心造成金融contagious effect(傳染效應)。連高盛等大行都走出黎話,如果逼空繼續,整個金融市場將會崩潰。

如果當英雄電影黎講,呢個劇本係無得彈既,不過係現實世界,就可能要擔心會唔會燒到自己。依家只係小範圍局部燃燒緊,要燒晒成個山頭的機會很低。

d對沖基金又唔會傻傻地坐以待斃啦,S&P500成份股的短倉合約係1月份已急降,連CITRON research都明言放棄短倉研究了。市場上的淡倉大幅減少,要大規模地夾死對沖基金,繼而拖累券商大規模倒閉等的風險都好低。

而美股因為之前升到咁癲,上星期就好自然借勢回吐,道指仲跌穿埋三萬點關口。依家好多人開始諗,d MPF洗唔洗泊去D保守基金避一避風頭呢。有網友開始周圍問,D保守基金、利息基金、保證基金的分別,唔知泊落邊度先係真正保本。我地自然要幫大家做定功課、研究定D投資工具啦。

我地搵晒咁多隻計劃入面的保守基金黎同大家分享。保守基金係乜黎? 保守基金屬於貨幣市場基金的一種。據法例規定,每個強積金計劃要提供至少一隻保守基金畀供款人選擇。

一圖勝萬言,大家可以見到自從2014年起,保守基金已再唔會令你蝕錢,真正地保到本。保守基金的手續費,要個基金回報唔可以負,先收手續費,所以有時係收唔足。如果下期利息較高,就有追溯權,可以追溯番過去3年未收齊的手續費。

兩圖大家就一目了然。呢幅圖畫出各個計劃內保守基金歷年的年回報中的最高同最低值,紅色個D代表曾經係某些年份係蝕過錢的。

至於保證基金,大家可以睇番我地之前條片,都有講過。保證基金會提供本金或每年回報保證,但須符合某些條件,方可享其保證回報率,例如一般會規定在一段時間內不可隨意轉換或提取基金資產,不然有關回報保證便會失效。所以,未必適合短期停泊。

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 14 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured