【MPF港股基金】不用局住追恒指~有條指數跑得仲靚

巴菲特講過,對於大多數人最好的投資係收費低的etf,例如美股的S&P 500 etf。如果簡單地套用係香港,以為買恒指etf就符合巴菲特的教條,今年就捉蟲了。

年初到11月底,當mpf d美股同大中華基金開香檳慶祝的時候,港股被動型基金因為大部份track緊恒指,所以都仲蝕緊超過4% (除咗easy choice同Sun Life個兩隻,因為佢地track緊其他港股指數)。

恒指表現今年咁差,係因為港股整體表現差?定係恒指成份股特別差?定係因為睇得太短線?

其實港股整體一d都唔差,我地睇番d港股主動型基金,今年都全部正回報呀,只有恒指在斯人獨憔悴!

年初至11月底,當恒指跌緊3.5%(追踪恒指的港股mpf扣埋fee蝕緊超過4%),24隻主動型的港股基金,平均回報有成14%,相當不錯吧! 最好個隻更高達28.6%!

恒指其實不代表大市

要解釋呢個情況,我地可以睇番恒指係點樣組成。

恒指得個52隻,直至呢幾日恒指服務公司先建議,將恒指成份股的數目擴充至65至80隻,但就算落實,都係2021年二月打後了。點都好,恒指似乎唔能夠充分代表整體港股。

反觀巴菲特揀的ETF係追縱S&P 500,係一條有幾百隻成份股的指數,而唔係街知巷聞但成份股得個30隻的道指呢。

換言之,當被動型基金集中係小部份股票,佢隨時差過主動型,所以要學巴菲特投資法,買恒指ETF就錯了,因為佢根本唔似S&P咁全面反映市況!

為左說明以上觀察,我地不如睇下其他港股指數! 例如成份股較多的恒生綜合指數(HSCI)、FTSE MPF hk index同埋csi hk 100指數,分別有492隻、328隻、100隻)

年初至11月底,當恒指跌3.5%,HSCI就升咗8.2%、FTSE MPF hk index就升8.1%、csi hk 100就升8.6%。雖然呢三條指數回報都略低於主動型基金平均的14%升幅,但起碼唔會人地升佢黎跌囉! 而且佢地仲跑贏咗5、6隻主動型基金添。所以唔係主動型贏晒架!

而且大家如果睇長線d,可能會發現到,咁多年主動型基金平均都差過被動型基金,不過2020年就畀主動型贏返次、睇10年累計回報仲反超埋(2011至2020年11月底,主動型的港股基金平均的累計回報達55%,被動型得43%)。到底呢個情況係暫時性?定係開始轉勢?咁要由恒指今年點解咁渣講起了。

點解今年恒指特別渣?

今年恒指咁差,主要係成份股的科技行業比重太低,所佔比重只有5%,2019年底的時候,更只得1.5%。而恒生綜合指數內的科技股就有39隻,佔比高達24%。而表現普遍較差的金融股的比重亦比恒指(43%)低很多,得29%。

今年升咗好多的美團,不單止帶挈唔到恒指升,仲要有份拖低恒指,因為恒指服務公司係2020年12月先將佢納入去恒指,納入之後就由280元水平下跌了些少,所以恒指完全受惠唔到美團今年近兩倍升幅。同樣地,隻阿里巴巴今年亦都有份拖低恒指。

美團雖然遲遲入唔到恒指,但早係2018年10月已係HSCI成份股,今年佢近兩倍的升幅,就反映晒係HSCI度囉,2020年11月比重已升到6.3%,係HSCI繼騰訊後第二隻重磅股了。

今年真係比較特別的一年,大量美國上市的中概股回流,d大市值的公司排緊隊等緊入恒指,相信恒指好快會面目全非了。依家投資者買被動型的恒指基金主要擔心係恒指納入呢d股份時,可能泡沫價得好嚴重,未來需要好長時間去用盈利增長去消化咁高估值。恒指的成份股得個52隻,相對較少,每一隻的變動對指數的影響都較大,所以今明兩年恒指成份股大變動,都咪話唔驚呀。

唔買恒指可以買乜野?

呢幾個月好多朋友都發現到恒指的問題,見到恒指咁渣想換另一條指數!

咁我地將幾條指數放埋一齊研究下,睇下邊條跑贏先!先睇短線,2020年1至11月,除咗恒指負回報外,其他三條指數都有超過8%的升幅,呢三條回報短線相差不大。

咁我地拉長d黎睇,原來過去10年的累計回報,最好個條係FTSE MPF hk index!恒指仲排緊第二,排第三係csi hk 100,最差係hsci。

如果我地逐年睇,你會見到恒指過去好多年都跑贏HSCI,係2020年前,恒指對上一次跑輸HSCI,已經數到2006年,即係14年前了。所以d金融機構都無出到HSCI相關mpf或etf產品。HSCI只係今年突然一年升得多,佢好多d中小型股,成日踩地雷,拖低佢長期回報。

咁hsci長線跑得咁差,出產品你都未必會買啦。咁仲有乜可以替代呢? 原來mpf入面有條FTSE MPF HK Index,又係一條有好多成份股(328隻)的index,股份名單大家可以詳細望一望。條ftse mpf hk大家可能少聽d,當年mpf推出時,mpfa搵富時同msci專門出咗一堆新的mpf指數,呢條係其中一條,而Sun Life隻FTSE MPF Hong Kong Index A就係搵咗blackrock做fund manager,直接買股去track住ftse mpf hk呢條指數。

呢條ftse mpf hk index,今年到11月底,都升咗8.1%,好過恒指好多呀! 而Sun Life隻FTSE MPF Hong Kong Index A都升咗6.89%,算係咁啦,好過track住恒指個d基金跌咗4%啦。如果睇長線d,由2011年跑起,相對其他三條指數,佢都係最好表現個條呀!

至於條csi香港 100,顧名思義有100隻成份股啦,無HSCI同FTSE MPF HK Index呢兩條咁多。而佢的頭十大股份同恒指、HSCI一樣都係個十隻,只係比重介乎係恒指(60%)、同HSCI(42%)中間,佔比有52.6%。佢2016年之前,回報同HSCI差不多弱,之後慢慢拋離咗HSCI,但比起恒指同ftse累計回報仲係矮咗一大截。另外,佢係2020年6月15日已納入阿里巴巴,足足早恒指3個月加咗阿里入去呀,當時阿里都只係210元水平,所以佢加入阿里的價格比恒指加入時更低。中銀保誠的easy choice隻CSI HK 100 Tracker fund就係追踪緊呢條指數,不過佢係靠買入標智香港100(2825.hk)黎操作,而標智香港100呢隻etf就係佢地自己出的產品,呢個的問題,我地就留番下集去討論了。

MPF有成600幾億買咗港股被動型基金架,恒指翻唔翻到身,就好睇黎緊恒指服務公司換馬的操作了,佢再係咁高買低賣,就真係無眼睇啦。睇黎恒指服務公司可能真係要認真檢討下,點解會跑輸人地咁多。

分享給你的朋友

美股表現近年持續強勁,不知如何入手?我們精選了10隻高增長美股,並撰寫了《不應錯過的10隻高增長美股》免費報告。立即按此下載!

想提早退休? 想提高每月的被動收入?

我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 14 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured