2020年暫時表現最勁的MPF係邊隻?

 

話咁快又11月,2020年就就完,又係時候update下MPF的表現,睇下有無辦法趁剩番的時間急起直追。COVID-19依然與我們常在,揮之不去,但去到10月底,MPF 年初至今的平均回報已經上番2.26%,好似乜事都無咁,係呢一刻回想番之前個大跌市好似係南柯一夢咁,連美國總統都換埋人,世界又係咪有機會回復番舊有的秩序呢?!

環球股市類別較去年底平均仲跌緊3.47%,但中國及大中華股票類別就贏到開巷,首10個月平均升11.74%,有睇開我地之前update回報D片的朋友,比較早就知道中國及大中華股票類別已經標青咗一段時日了,係7月底我地update的時候,已經係MPF咁多類別中表現最好的類別,黎到10月底,仍然係最好既。

呢個類別入面,排第一的仍然係My choice,1-10月回報高達30.2%,而排包尾的仍然係AIA MPF – PVC Hong Kong and China,比7月底update個時仲要跌多咗,跌咗12%! 第一同第尾的差距愈黎愈大,揀中類別揀錯供應商就真係啞子吃黃蓮。至於排第二的Mass MPF Greater China Equity,都追得好貼,有29.63%的回報。MyChoice 同Mass隻大中華類基金其實係同工隻,都係JPM。Mass表現差啲,因為佢既CF收費貴d。

至於單睇10月份的話,恒生同匯豐就以5.86%的回報排係中國及大中華股票類別的榜首,其實恒生同匯豐係同一隻黎,佢稍為領先My choice的5.09%。呢個月呢個類別入面隻隻基金都係正回報,最差個隻BEA (VS) Greater China Equity,都有2.05%回報。

今年以來,回報高過10%的基金只有28隻,呢幅就係升得最多的排行榜,有無你個隻份? 至於首10個月仲係負回報的基金就有95隻,呢幅就係包尾排行榜,你地又睇下自己有無中到,最差的都仲係歐洲股票基金。

如果買咗的係香港股票類別呢? 頭10個月平均回報係負0.11%! 仲差少少先返家鄉。最好個隻係Schroder MPF Hong Kong,有成17.72%回報,最差個隻係Principal 800 Hang Seng Index Tracking,要大蝕12.79%。不過,呢個類別單睇10月份,都係隻隻正回報架。

10月的美股類別就一遍通紅,跌咗1.81%至3.19%,令到呢個類別入面回報最勁的Mass 頭10個月回報回落至26.03%。

至於懶人基面的成份基金A65F同CAF,10月單月分別跌0.6%及跌1.52%,波幅較低。

分享給你的朋友

全球數以百萬計的投資者正運用股息為自己和家人創造持續現金流收入,累積財富。您想成為一份子?在我們撰寫的《必須收藏的收息股投資指南》電子書就會分享獨特的收息股選股模型,並用實例教您挑選出真正可長期持續派息的收息股及揭示必要避開的收息「陷阱」。要知道更多打造穩健收息投資組合的竅訣,請立即按此免費下載!

本文所提供的信息僅供一般參考之用,並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)

About MPF醫務室 76 Articles
MPF醫務室專為大家拆解強積金(MPF)相關的奇難雜症。 Youtube: https://www.youtube.com/channel/UCtWpdex-OPP2lIDTEm-n0rA/featured