好多打工仔係疫情下被迫停薪留職，或者已失業，無錢畀租金、無錢開飯，甚至就黎要破產，申請綜援，望住強積金戶口入面自己錢, 又唔攞得，政府話要留番退休，唔畀攞，大家依家都未捱得過，你仲同我地講將來! 除咗不斷講粗口之外, 仲可以做咩呢，就係迫到有人揀鋌而走險囉。
好多非法勾檔應運而生，叫人假宣昏「永久離開香港」為理由，提早提取強積金。結果令到以「永久離開香港」為由而提早領取急增！被積金局捉到假宣誓，被發傳票，首次定罪最高可被處罰款10萬元及監禁一年，都咪話唔重。大部份人個強積金戶口都係得幾十萬，咁就無咗十萬。
依家各界開始迫宮，希望將提早領取由唔合法變做合法囉。依家強積金滾存的總金額已經去到1萬億咁多，畀人提早攞出黎的話，一定會損害好多既得利益者的荷包，阻力一定重重。點解呢？受託人因為你既強積金係佢度，收緊你受託費，基金經理公司收緊你基金管理費，基本上一拿走左錢，強積金總額細左，佢哋可收既錢都少左。
積金局一向的官腔回應就係，有關提取及供款的安排由法例規限，因為解決短期經濟困難而提取或暫停供款並不符合法例要求；如要改變必須修改法例，但過程需時，不能為目前情況提供最直接和及時的幫助。聽到就忟，唔解呢? 因為根據立法會議案辯論參考資料，其實10年前，大家已經有討論過失業三個月或以上，畀人提早領取強積金，只不過過唔到之嘛。一般唔畀攞的思想係：強積金係比你退休用，你失業可能一陣就搵到工。開咗先例：不同情況都可以攞，咁個MPF咪同原意違反？
之前樓市係咁升，好多人個首期本來差少少，加埋MPF就可以上車，但政府又唔畀攞出黎做首期，結果儲蓄一路都追唔上樓價升幅，上車夢愈離愈遠。政府當然係理直氣壯話舊錢係要畀你地退休用，依家攞咗出黎，咁退休無錢用。
但實際情況可能係，本來成功上到車的話，樓價增值部份已經抵得上好幾倍個強積金攞咗出黎的金額啦! 仲每個月慳番晒d租金開支，變成投資落咗個樓度，政府都唔鬼識變通，基金係投資，房地產難度不是投資嗎，大家投資都係為咗退休，有資本增值的大好機會，又焗住唔畀人買。好啦，呢十幾年就錯過咗最好的資本增值的機會了!
講番依家，想短期攞出黎應急，因為火燒眼眉真係有咁既需要，但始終你真係洗咗舊錢，同買樓投資唔同，洗咗就係洗咗，做唔到資本增值，老咗舊強積金就真係少咗錢。不過，唔通依家睇住張MPF statement 挨肚餓咩！
政府畀你依家攞，大家先洗未來錢，咁佢依家需要出的錢反而少啲囉，今年抗疫已令預算赤字急增至近2900億元，財政儲備亦跌至8000多億元，政府咁開水喉法，都支持唔到幾耐了，疫情一波一波淹至，政府以前主要擔憂嘅係人口老化為政府未來財政帶來龐大的壓力，但唔好諗住將來，就唔理現在。當佢依家手頭愈來愈緊的話，有機會轉軚畀大家攞番自己的MPF用住先，所以先愈來愈多聲音嘗試「迫宮」。
經濟有周期，可能大家遲下又有番野做，又供番呢，到咗將來，可能自己又儲到舊錢足夠退休呢，真係講唔埋。
疫情下，失業的失業，停薪留職的停薪留職，有得攞緊係最好啦。
全球數以百萬計的投資者正運用股息為自己和家人創造持續現金流收入，累積財富。您想成為一份子？在我們撰寫的《必須收藏的收息股投資指南》電子書就會分享獨特的收息股選股模型，並用實例教您挑選出真正可長期持續派息的收息股及揭示必要避開的收息「陷阱」。要知道更多打造穩健收息投資組合的竅訣，請立即按此免費下載！
本文所提供的信息僅供一般參考之用，並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)
